ខេត្តក្រចេះ ៖ លោក គង់ គឹមនី អភិបាលរងខេត្តក្រចេះ ជំរុញឲ្យអាជ្ញាធរក្រុងស្រុក និងមន្ទីរ អង្គភាពពាក់ព័ន្ធទាំងអស់ត្រូវពង្រឹងឡើងវិញនូវការបង្ក្រាប និងទប់ស្កាត់បទល្មើសធនធានធម្មជាតិ…
ខេត្តក្រចេះ ៖ លោក គង់ គឹមនី អភិបាលរងខេត្តក្រចេះ ជំរុញឲ្យអាជ្ញាធរក្រុងស្រុក និងមន្ទីរ អង្គភាពពាក់ព័ន្ធទាំងអស់ត្រូវពង្រឹងឡើងវិញនូវការបង្ក្រាប និងទប់ស្កាត់បទល្មើសធនធានធម្មជាតិ
ជាពិសេស ការដឹកជញ្ជូនធ្យូងនិងឈើនាំឆ្លងដែនទៅប្រទេសវៀតណាម ។
ការជំរុញបែបនេះធ្វើឡើងនៅក្នុងកិច្ចប្រជុំគណៈកម្មការខេត្ត ដើម្បីទប់ស្កាត់និងបង្ក្រាបបទល្មើសធនធានធម្មជាតិ និងគណៈគ្រប់គ្រងអភិរក្ស អភិវឌ្ឍន៍តំបន់ទេសចរណ៍សត្វផ្សោតទន្លេមេគង្គខេត្តក្រចេះ នាខែមករា ឆ្នាំ២០២៣នេះ ។
លោក គង់ គីមនី អភិបាលរងខេត្តក្រចេះបានស្នើឱ្យកងកម្លាំងសមត្ថកិច្ចជំនាញពាក់ព័ន្ធចាត់វិធានការ និងទប់ស្កាត់ចំពោះការដឹកជញ្ជូនផលអនុផលព្រៃឈើឆ្លងដែនខុសច្បាប់ដែលមានធ្យូងនិងឈើដែលបានដឹកជញ្ជូនចេញទៅតាមបណ្ដាច្រករបៀងមួយចំនួន ស្ថិតនៅក្នុងស្រុកស្នួល ខេត្តក្រចេះ ។
ដោយឡែក ពាក់ព័ន្ធទៅនឹងការសកម្មភាពដឹកជញ្ជូនឈើវែងៗតាមរថយន្តសាំងយ៉ុងដែលតែងតែមានភាពអនាធិបតេយ្យប៉ះពាល់ទៅដល់សណ្តាប់ធ្នាប់សាធារណៈ លោកក៏បានស្នើឲ្យមន្ត្រីជំនាញត្រួតពិនិត្យជាក់ស្ដែងធ្វើយ៉ាងណាកុំឱ្យមានបញ្ហាគ្រោះថ្នាក់កើតឡើង ។
លោក គង់ គីមនី បានបញ្ជាក់ថា កកាលពីថ្ងៃ២៨ ខែធ្នូ ឆ្នាំ២០២២ កន្លងទៅ គណៈកម្មការបង្ក្រាបបទល្មើសធនធានជាតិថ្នាក់ជាតិ បានចង្អុលបង្ហាញថា រាល់បទល្មើសព្រៃឈើសត្វព្រៃ និងអ្វីដែរប៉ះពាល់ដល់ធនធានធម្មជាតិ អាជ្ញាធរមានសមត្ថកិច្ចត្រូវតែទប់ស្កាត់ និងបង្ក្រាប់ឲ្យខានតែបាន ដោយត្រូវអនុវត្តតាមសេចក្ដីណែនាំលេខ.០៥ ស្ដីពីវិធានការចាំបាច់នានាក្នុងការពង្រឹងការគ្រប់គ្រងធនធានធម្មជាតិ ។
ជាពិសេស វិស័យព្រៃឈើតាមរយៈការជម្រុញ ឲ្យមានការអនុវត្តច្បាប់ និងលិខិតបទដ្ឋានគិតិយុត្ត ក៏ដូចជាការបែងចែកបំពេញសមត្ថកិច្ចរបស់ស្ថាប័នពាក់ព័ន្ធទាំងថ្នាក់ជាតិ និងថ្នាក់ក្រោមជាតិ ដើម្បីធានានូវការលើកកម្ពស់ប្រសិទ្ធភាព និងនិរន្ដរភាពក្នុងការគ្រប់ គ្រងធនធានធម្មជាតិ ។
លោកថា ដើម្បីទប់ស្កាត់និងបង្ក្រាបបុគ្គលមួយចំនួនដែលកំពុងឆ្លៀតឱកាសប្រព្រឹត្តបទល្មើសធនធានធម្មជាតិ ក្នុងតំបន់ការពារ និងតំបន់អភិរក្សគណៈបញ្ជាការឯកភាពស្រុកក្រុងត្រូវដឹកនាំកម្លាំងអធិការដ្ឋាន ផ្នែករដ្ឋបាលព្រៃឈើ ផ្នែករដ្ឋបាលជលផល មន្ទីរបរិស្ថាន កងកម្លាំង មានសមត្ថកិច្ច ដែលស្ថិតនៅក្នុងដែនសមត្ថកិច្ចរបស់ខ្លួន ត្រូវអនុវត្តឲ្យបានត្រឹមត្រូវតាមតួនាទីភារកិច្ចរបស់ខ្លួនសំដៅទៅលើសមត្ថកិច្ចនិងការទទួល ខុសត្រូវក្នុងការគ្រប់គ្រងការថែរក្សា និងការការពារធនធានធម្មជាតិ ដោយត្រូវចាត់វិធានការណ៍ឲ្យបានហ្មត់ចត់ ដើម្បីបង្ក្រាបនិងលុបបំបាត់បទល្មើសធនធានជាតិ ព្រមទាំងការទន្ទ្រានដីយកដីធ្វើជាកម្មសិទ្ធក្នុងតំបន់ការពារ និងអភិក្សផងដែរ។
ចែករំលែកព័តមាននេះ