វឌ្ឍនភាពវិស័យការងាររបស់កម្មករសំណង់នៅខេត្តសៀមរាប

ថ្ងៃទី ១៣ ខែ កក្កដា ឆ្នាំ ២០១៧2017-07-13T09:36:17+00:00
ម៉ោង ០៩:៣៦
mony

ខេត្តសៀមរាប ៖ ក្នុងរយៈពេល១៤ឆ្នាំមកនេះ វិស័យសំណង់នៅក្នុងខេត្តសៀមរាប មានការរីកចម្រើនគួរឱ្យកត់សម្គាល់ ដែលបានជួយលើកកម្ពស់នូវជីវភាពរស់នៅនៃក្រុមគ្រួសារកម្មករនៅតាមបណ្តាក្រុង ស្រុកក្នុងខេត្ត កាន់តែមានភាពល្អប្រសើរទ្វេឡើង។ កត្តាទាំងនេះបានបញ្ជាក់ឱ្យកាន់តែឃើញច្បាស់ នៃម្លប់សន្តិភាពដ៏រឹងមាំ ក្រោមគោលមាគ៌ាដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រី បានធ្វើឱ្យអ្នកវិនិយោគទុនទាំងក្នុងស្រុក និងក្រៅស្រុក មានភាពជឿជាក់ចំពោះកម្ពុជា ទើបធ្វើឱ្យកំណើនវិស័យការងារសំណង់ មានការកើនឡើងឥតឈប់នៅក្នុងខេត្តសៀមរាប ដើម្បីបំពេញនូវតម្រូវការចាំបាច់របស់ភ្ញៀវទេសចរណ៍ជាតិ អន្តរជាតិ ហើយក៏ជាខេត្តគោលដៅនៃភ្ញៀវទេសចរណ៍លើពិភពលោក ចូលមកទស្សនាកម្សាន្ត។

តាមការសាកសួរបងប្អូនកម្មករសំណង់ ដែលបានកំពុងប្រតិបត្តិការងាររបស់ខ្លួន បានប្រាប់ថា កម្រៃថ្លៃពលកម្មរបស់ពួកគាត់ គឺគិតទៅតាមមុខជំនាញបច្ចេកទេសរបស់ខ្លួន ធ្វើប្រចាំថ្ងៃដែលមានតម្លៃ ក្នុងមួយថ្ងៃចាប់ពី២ម៉ឺនរៀល ទៅដល់៦ម៉ឺនរៀល តែទោះបីកម្រៃដ៏តិចតូចពិតមែន ក៏ពួកគាត់មានការជឿជាក់លើមេការរបស់ខ្លួន ដែលបានបើកផ្តល់ប្រាក់ពលកម្មបានទៀងទាត់ មិនដូចបងប្អូនកម្មករយើងមួយចំនួន ដែលបានធ្វើចំណាកស្រុកទៅធ្វើការងារនៅក្រៅស្រុក ហើយបានចាញ់បោកមេខ្យល់ ព្រមទាំងតម្រួតចាប់ដាក់ទោសទណ្ឌ ដោយទៅធ្វើការគ្មានច្បាប់ត្រឹមត្រូវ ធ្វើឲ្យខាតបង់ពេលវេលា ក្នុងការរកចំណូលចិញ្ចឹមក្រុមគ្រួសារ ព្រមទាំងបានជំពាក់បំណុលធនាគារទៀតផង។

ពួកគាត់បានឱ្យដឹងទៀតថា បច្ចុប្បន្ននេះជីវភាពរបស់ពួកគាត់មានភាពប្រសើរណាស់ ហើយកាលពីជាង១០ឆ្នាំមុន ពួកគាត់បានក្រោកមកពីយប់ជិះកង់ មកធ្វើការកម្មករសំណង់មកពីតាមបណ្តាស្រុក ក្នុងខេត្តសៀមរាប ដែលមានចម្ងាយពីផ្ទះ២០គីឡូម៉ែត្រ ទៅ៤០គីឡូម៉ែត្រ តែបច្ចុប្បន្នពួកគាត់មានមធ្យោបាយធ្វើដំណើរដោយម៉ូតូ ឬរឺម៉ក់ម៉ូតូ ហើយមិនក្រោកឡើងពីយប់ដូចពីមុនទៀតឡើយ ហើយម៉ូតូទាំងនេះពួកគាត់បានខ្ចីប្រាក់ធនាគារទិញ និងខិតខំធ្វើការយកប្រាក់សង់ធនាគារវិញ ទោះបីមានការលំបាកបន្តិចក៏ពិតមែន តែបានរស់នៅជួបជុំបងប្អូនក្រុមគ្រួសារក្នុងភាពសុខសាន្ត និងបានធ្វើស្រែចម្ការទៀតផង។

ចំណែកមេការសំណង់ ឈ្មោះ ធឿន រស់នៅស្រុកប្រាសាទបាគង ខេត្តសៀមរាប បានប្រាប់ថា ការធ្វើសំណង់នេះ គឺវាពិបាកណាស់ ក្នុងការដើរប្រមូលកម្មករ មានស្រី មានប្រុស ក្នុងម្នាក់ឱ្យគេថ្លៃចាប់ពី៤០០០០រៀល ដល់៦០០០០រៀល ហើយនៅតែរកមិនសូវបានទៀត ដោយសារមានមេខ្យល់មកនាំយកទៅក្រៅបករទេស បានថ្លៃជាងនៅស្រុកខ្មែរយើង។ លោកបានបញ្ជាក់ថា សព្វថ្ងៃនេះ ដោយពួកគាត់បានមើលឃើញ និងមានការណែនាំពីប្រសាសន៍របស់សម្តេច តេជោ ហ៊ុន សែន ជាប្រមុខដឹកនាំដ៏ឈ្លាសវៃ ប្រកបដោយកត្តិបណ្ឌិត ទើបបងប្អូនស្រីប្រុសយើងមួយចំនួនខិតខំនៅបម្រើការងារជួយ ម៉ែឪ អ្នកខ្លះចាប់ពីការដកស្ទួង នាំគ្នាមកធ្វើសំណង់ គ្រាន់បានលុយចំណូល ជួយដល់ក្រុមគ្រួសារបានមួយចំណែកផងដែរ៕