វៀតណាមស្នើសុំជំនួយពីជប៉ុនម្ដងទៀត សម្រាប់គម្រោងផ្លូវរថភ្លើងល្បឿនលឿន
វៀតណាម ៖ ប្រទេសវៀតណាមបានស្នើសុំប្រទេសជប៉ុនជាលើកទីពីរ កាលពីថ្ងៃទី១៣ ខែមករា ឆ្នាំ
វៀតណាម ៖ ប្រទេសវៀតណាមបានស្នើសុំប្រទេសជប៉ុនជាលើកទីពីរ កាលពីថ្ងៃទី១៣ ខែមករា ឆ្នាំ២០២៣ សម្រាប់ការគាំទ្រក្នុងការកសាងផ្លូវរថភ្លើងល្បឿនលឿនពីភាគខាងជើងទៅភាគខាងត្បូង។ នេះបើយោងតាមប្រភពពីសារព័ត៌មានវៀតណាម VnExpress បានចេញផ្សាយកាលពីថ្ងៃទី១៤ ខែមករា កន្លងទៅ។
នាយករដ្ឋមន្ត្រីវៀតណាម លោក Pham Minh Chinh បានធ្វើសំណើនេះ នៅក្នុងជំនួបជាមួយរដ្ឋមន្ត្រីក្រសួងហិរញ្ញវត្ថុជប៉ុន លោក Shunichi Suzuki នៅក្នុងទីក្រុងហាណូយ ខណៈដែលនេះជាលើកទីពីរហើយ ដែលនាយករដ្ឋមន្ត្រីវៀតណាម បានធ្វើសំណើទៅកាន់ប្រទេសជប៉ុន ទាក់ទងនឹងគម្រោងផ្លូវដែកដ៏ធំរបស់ខ្លួន បន្ទាប់ពីបានស្នើឱ្យធនាគារជប៉ុន សម្រាប់កិច្ចសហប្រតិបត្តិការអន្តរជាតិ ដែលហៅកាត់ថា JBIC គាំទ្រលើគម្រោងនេះ អំឡុងពេលលោកបានទទួលលោក Maeda Tadashi ប្រធាន JBIC នៅទីក្រុងហាណូយ កាលពីខែកក្កដា ឆ្នាំ២០២២ កន្លងទៅ។
ក្រសួងដឹកជញ្ជូនរបស់វៀតណាម បានស្នើសុំខ្សែរថភ្លើងល្បឿនលឿនពីភាគខាងជើងទៅភាគខាងត្បូងប្រវែង ១.៥៥៩គីឡូម៉ែត្រ ដែលមានល្បឿនពីចាប់ ៣២០ ទៅ ៣៥០ គីឡូម៉ែត្រក្នុងមួយម៉ោង។ ផ្លូវរថភ្លើងល្បឿនលឿននេះ នឹងត្រូវប្រើសម្រាប់ដឹកជញ្ជូនអ្នកដំណើរ ខណៈដែលផ្លូវរថភ្លើងប្រពៃណីបច្ចុប្បន្ន នឹងត្រូវបានប្រើប្រាស់ដើម្បីដឹកជញ្ជូនទំនិញ។
ការវិនិយោគសរុបសម្រាប់ផ្លូវរថភ្លើងល្បឿនលឿននេះ ត្រូវបានគេរំពឹងថា នឹងមានតម្លៃជាង ៥៨ពាន់លានដុល្លារ ដោយដំណាក់កាលទី១ នៃគម្រោងនេះ នឹងត្រូវបញ្ចប់មុនឆ្នាំ ២០៣០ នឹងមានការសាងសង់២ផ្នែកគឺ ទីក្រុងហាណូយ-ទីក្រុងវីញ និងទីក្រុងហូជីមិញ-ទីក្រុងញ៉ាត្រាង។
នៅក្នុងកិច្ចប្រជុំកាលពីថ្ងៃទី១៣ ខែមករា កន្លងទៅ លោកនាយករដ្ឋមន្ត្រី Pham Minh Chinh ក៏បានស្នើឱ្យជប៉ុនជួយរៀបចំរចនាសម្ព័ន្ធភាគហ៊ុនឡើងវិញ នៅរោងចក្រចម្រាញ់ប្រេង Nghi Son និង Petrochemical ដែលជារោងចក្រចម្រាញ់ប្រេងដ៏ធំបំផុតរបស់វៀតណាម ដែលជាកម្មសិទ្ធិរបស់ក្រុមហ៊ុន Petrovietnam, Kuwait Petroleum International និងក្រុមហ៊ុន Idemitsu Kosan និង Mitsui Chemicals របស់ប្រទេសជប៉ុន។ បន្ថែមពីនេះ លោកក៏បានស្នើឱ្យប្រទេសជប៉ុន ផ្តល់ការពិគ្រោះយោបល់ក្នុងការគ្រប់គ្រង និងការផ្លាស់ប្តូរប្រព័ន្ធឌីជីថលនៅក្នុងទីផ្សារមូលបត្របំណុល និងទីផ្សារភាគហ៊ុន។
លោកនាយករដ្ឋមន្ត្រី បានអះអាងថា វៀតណាមតែងតែមើលឃើញជប៉ុនជាដៃគូយុទ្ធសាស្ត្រឈានមុខគេ និងយូរអង្វែង ព្រមទាំងគាំទ្រជប៉ុនក្នុងការរួមចំណែកជាវិជ្ជមានដល់សន្តិភាព កិច្ចសហប្រតិបត្តិការ និងការអភិវឌ្ឍន៍ក្នុងតំបន់ រួមនិងពិភពលោក។ លោកបានបន្ថែមថា រដ្ឋាភិបាលវៀតណាមនឹងបង្កើតលក្ខខណ្ឌអំណោយផលសម្រាប់ធុរកិច្ចជប៉ុន ដើម្បីធ្វើប្រតិបត្តិការនៅប្រទេសវៀតណាម។ ស្របពេលដែលលោក Shunichi Suzuki រដ្ឋមន្ត្រីក្រសួងហិរញ្ញវត្ថុជប៉ុន បាននិយាយថា ជប៉ុននឹងសិក្សាលើសំណើរបស់វៀតណាម ដើម្បីផ្តល់ជូនតាមជាក់ស្តែង។
គួរបញ្ជាក់ថា វៀតណាម និងជប៉ុនប្រារព្ធខួប ៥០ឆ្នាំនៃទំនាក់ទំនងការទូតរវាងគ្នា នៅក្នុងឆ្នាំនេះ។ ប្រទេសជប៉ុនគឺជាអ្នកឧបត្ថម្ភជំនួយអភិវឌ្ឍន៍ផ្លូវការ (ODA) ដ៏ធំបំផុតរបស់វៀតណាម ដែលឈានដល់ប្រហែល ១៧ពាន់លានដុល្លារចាប់តាំងពីឆ្នាំ ១៩៩២ រហូតដល់ឆ្នាំ ២០២១ ដែលស្មើនឹងប្រហែល ៣០% នៃជំនួយអភិវឌ្ឍន៍ផ្លូវការទាំងអស់ពីសហគមន៍អន្តរជាតិ ទៅកាន់ប្រទេសវៀតណាម៕
ចែករំលែកព័តមាននេះ