ADផ្ទាំងផ្សព្វផ្សាយពាណិជ្ជកម្ម

Picture

​រាជរដ្ឋាភិបាល រៀបចំគោលនយោបាយ​ប្រែ​ក្លាយ​ កម្ពុជាឱ្យ​ទៅជាប្រទេសផលិត និងផ្គត់ផ្គង់​ផលិតផលស្វាយចន្ទីដ៏សំខាន់មួយ​

1 ឆ្នាំ មុន
  • ភ្នំពេញ

ភ្នំពេញ៖ កិច្ចប្រជុំ​​ពេញអង្គគណៈរដ្ឋមន្ត្រី នាព្រឹកថ្ងៃទី១៣ ខែមករា ឆ្នាំ២០២៣ នេះ បានអនុម័ត​​លើសេចក្តីព្រាងគោលនយោបាយ​ជាតិ ស្តីពី ស្វាយចន្ទី ឆ្នាំ២០២២-២០២៧​។…

ភ្នំពេញ៖ កិច្ចប្រជុំ​​ពេញអង្គគណៈរដ្ឋមន្ត្រី នាព្រឹកថ្ងៃទី១៣ ខែមករា ឆ្នាំ២០២៣ នេះ បានអនុម័ត​​លើសេចក្តីព្រាងគោលនយោបាយ​ជាតិ ស្តីពី ស្វាយចន្ទី ឆ្នាំ២០២២-២០២៧​។ ដំណាំស្វាយចន្ទី គឺជាដំណាំកសិឧស្សាហកម្មដ៏មានសក្តានុពល និងជាដំណាំអាទិភាពមួយ ក្នុងចំណោម​ដំណាំអាទិភាពទាំង ១២មុខ​ ដែលរាជរដ្ឋាភិបាល បាន និងកំពុង​ផ្តោតការយកចិត្តទុក​ដាក់លើការបង្កើន​ផលិត​ភាព និងការប្រកួត​ប្រជែង​ តាមរយៈការ​ធ្វើពិពិធកម្មសេដ្ឋកិច្ច​ក្នុងសកម្មភាព ដែលមានតម្លៃខ្ពស់​។

តាមលទ្ធផល​នៃកិច្ចប្រជុំពេញអង្គគណៈរដ្ឋមន្ត្រី បច្ចុប្បន្ន កម្ពុជាយើង មានខេត្តចំនួន​ ១០ ដែលមានផ្ទៃដីដាំដុះស្វាយចន្ទី រួមមាន ខេត្តកំពង់ធំ រតនគិរី ក្រចេះ កំពង់ចាម ព្រះវិហារ ស្ទឹងត្រែង ឧត្តរមានជ័យ ត្បូងឃ្មុំ មណ្ឌលគិរី និងខេត្តសៀមរាប​។ ពីឆ្នាំ២០១៥ ដល់ឆ្នាំ២០២១ ផ្ទៃដីដាំដុះស្វាយចន្ទី​កម្ពុជា មានការកើនឡើង​ពី ៩៤ ៣០៨​ហិកតា ដល់ ៤០៥ ៩៩១ហិកតា និងផ្ទៃដី​ប្រមូល​ផល បានកើនពី ៧៨ ៥៨៤​ហិកតា ដល់ ២៧៥ ៦៧៩ហិកតា ដោយទទួលបានទិន្នផល​សរុបកើនពី ៩៣ ៩៤៤​តោន ដល់ ៤៧២ ៦៣៦​តោន​។

ជាមួយគ្នានេះ ស្វាយចន្ទី​កម្ពុជា ក៏កំពុងមានកេរ្តិ៍ឈ្មោះល្បី និងត្រូវបាន​ទទួលស្គាល់​ពីទីផ្សារ លើទំហំគ្រាប់ រសជាតិ កម្រិត​កាកសំណល់កសិកម្មទាប និងសរីរាង្គ​តាមបែបប្រពៃណី ដោយក្នុងនោះ ផលិតផល​ស្វាយចន្ទីរបស់​កម្ពុជា អាចទាញយកចំណែក​ទីផ្សារ​ពីសហរដ្ឋអាមេរិក អាល្លឺម៉ង់ ហូឡង់ ចិន ចក្រ​ភពអង់គ្លេស បារាំង អូស្ត្រាលី សហភាពអារ៉ាប់រួម និងជប៉ុន​។

ក្នុងន័យនេះ សេចក្តីប្រកាស លើកឡើងថា ដើម្បីបន្តជំរុញកំណើ​នកសិពាណិជ្ជកម្ម ប្រកបដោយ​ការប្រកួតប្រជែង​ផលិតផល​មានគុណភាព​ និងសុវត្ថិភាព ការដាក់ចេញនូវគោលនយោបាយ​ជាតិ ស្តីពី ស្វាយចន្ទី ឆ្នាំ២០២២-២០២៧ គឺជាការចាំបាច់ ដែលស្របទៅនឹងគោលនយោបាយ​ និងក្របខណ្ឌ​យុទ្ធសាស្ត្រផ្សេងៗទៀត សំដៅធានានូវឧត្តម​ភាពប្រកួតប្រជែងលើទីផ្សារ​ក្នុងស្រុក តំបន់ និងពិភពលោក ព្រមទាំង​ជាផែនទីបង្ហាញផ្លូវ និងជាមូលដ្ឋាន​ក្នុងការរៀបចំ​យុទ្ធសាស្ត្រ និងផែនការសកម្មភាពអភិវឌ្ឍវិស័យ​ដំណាំស្វាយចន្ទីប្រកបដោយ​ចីរភាព​។

សេចក្តីព្រាងគោលនយោបាយ ដែលគណៈរដ្ឋមន្ត្រីបានប្រជុំ និងអនុម័ត​នេះ មានចក្ខុវិស័យ​អភិវឌ្ឍ​ផលិត​កម្ម ការកែច្នៃ និងទីផ្សារស្វាយចន្ទី ឱ្យមានលក្ខណៈ​ប្រកួតប្រជែង​ប្រកបដោយបរិយាបន្ន ធានានូវនិរន្ទរភាព និងការធ្វើ​ពិពិធកម្មសេដ្ឋកិច្ច ក្នុងគោលបំណង​ប្រែក្លាយ​កម្ពុជា ឱ្យ​ទៅជាប្រទេសផលិត និងផ្គត់ផ្គង់​ផលិតផលស្វាយចន្ទីដ៏សំខាន់មួយ សម្រាប់បម្រើដល់ទីផ្សារក្នុងស្រុក តំបន់ និងពិភពលោក​។

​របាយការណ៍របស់សមាគមស្វាយចន្ទីកម្ពុជា បង្ហាញថា កាល​ឆ្នាំ២០១៩ កម្ពុជាផលិត​គ្រាប់ស្វាយចន្ទី បាន ៦០ម៉ឺនតោន។ នៅឆ្នាំ២០២០ កើន​ដល់ ៩៥ម៉ឺនតោន។ ឆ្នាំ២០២១ កើនដល់ ១,១លានតោន។ ប៉ុន្តែនៅឆ្នាំ២០២២ គ្រាប់ស្វាយចន្ទី បានធ្លាក់ចុះ នៅត្រឹម ៦៦ម៉ឺនតោនប៉ុណ្ណោះ។

ប្រសិនបើ​អាកាសធាតុអំណោយផលល្អ ការផលិតស្វាយចន្ទី នៅកម្ពុជា អាចកើនដល់ ៨០ម៉ឺន​តោន ទៅ ១លានតោន ក្នុងឆ្នាំ២០២៣។ នេះបើតាម​សមាគម​ស្វាយចន្ទី​កម្ពុជា៕ 

អត្ថបទសរសេរ ដោយ

កែសម្រួលដោយ