រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា មានករណីគ្រោះថ្នាក់ចរាចរណ៍រវាងម៉ូតូហុងដាឌ្រីមមួយគ្រឿង ជាមួយនឹងម៉ូតូកង់បីមួយមួយគ្រឿង ដោយបានប៉ះគ្នាបន្តិចបន្តួច តែបែរភាគីទាំងពីរឈ្លោះប្រកែកគ្នា រហូតក្លាយជាហិ.ង្សាវា.យតប់គ្នាទៅវិញទៅមក បង្កឲ្យអោយមានការភ្ញាក់ផ្អើលកាលពីវេលាម៉ោង៨និង៣០នាទីយប់ ថ្ងៃទី២ ខែមករា ឆ្នាំ២០២៣ នៅត្រង់ចំណុចក្បែរសណ្ឋាគារស្រែលាភ តាមបណ្តោយផ្លូវR8 ស្ថិតក្នុងសង្កាត់ស្រះចក ខណ្ឌដូនពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញបុរសពីរនាក់ជិះម៉ូតូកង់មួយគ្រឿងមិនចាំម៉ាក បានធ្វើដំណើរតាមបណ្ដោយផ្លូវR8 ទិសដៅពីកើតទៅលិច។ ស្របពេលនោះដែរ ក៏មានម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ2JG-0984 ដែលជិះដោយបុរស៣នាក់ ស្របទិសដៅគ្នា តាមពីក្រោយម៉ូតូកង់បីនោះ។
ប្រភពដដែលបន្តថា លុះមកដល់ចំណុចកើតហេតុ ម៉ូតូនោះក៏បានព្យាយាមជិះវ៉ាជែងខាងឆ្វេងម៉ូតូកង់បី តែខណៈពេលនោះម៉ូតូកង់បីក៏បានបត់ឆ្វេង ហើយក៏ទៅបុកជាមួយម៉ូតូ បណ្តាលឲ្យដួលរងការខូចខាតបន្តិចបន្តួច ចំណែកអ្នកបើកបររងរបួសស្រាល។ រីឯម៉ូតូកង់បីវិញ បានបើកចេញពីកន្លែងកើតហេតុប្រមាណ១០ម៉ែត្រ ក៏ត្រូវម្ចាស់ម៉ូតូងើបរត់ដេញតាមឃាត់ម៉ូតូកង់បីនោះតែម្តង។
ប្រភពដដែលបន្តទៀតថា បន្ទាប់មកភាគីទាំងពីរក៏បានឈ្លោះប្រកែកគ្នា ពេលនោះដែរក៏មានគ្នីគ្នាម៉ូតូកង់បីចំនួន៤ទៅ៥នាក់ទៀតបានដើរចេញមកពីម្តុំនោះ រួចក៏ភាគីទាំងពីរក្រុមក៏បានវា.យតប់គ្នាទៅវិញទៅមក បណ្តាលឲ្យម្ចាស់ម៉ូតូកង់បីរងរបួសបែកមាត់ និងអ្នករួមដំណើរខាងម៉ូតូម្នាក់ហើមមុខ។ បន្ទាប់មកម្ចាស់ម៉ូតូកង់បី និងបក្សពួកបាននាំគ្នាបើកម៉ូតូកង់បីរត់គេចខ្លួនបាត់ស្រមោល ដោយបន្សល់ទុកអ្នកដែលរួមដំណើរពីក្រោយម្នាក់នៅកន្លែងកើតហេតុ ហើយក៏ត្រូវបានសមត្ថកិច្ចមូលដ្ឋានចុះមកអន្តរាគមន៍ភ្លាមៗតែម្ដង។
តាមសម្តីពីភាគីខាងម៉ូតូ បានឲ្យដឹងថា នៅមុនពេលកើតហេតុ ពួកគេបានជិះដឹកគ្នា ក្នុងទិសដៅស្របទិសគ្នាជាមួយនឹងម៉ូតូកង់បី គោលបំណងជិះវ៉ាជែងខាងឆ្វេងម៉ូតូកង់បី តែដោយសារម៉ូតូកង់បីបត់ដោយមិនបានស៊ីញ៉ូ ក៏បានបុកនឹងម៉ូតូពួកគេ ថែមទាំងព្យាយាមបើករត់ ពួកគេក៏បានងើបរត់ដេញតាម តែពេលនោះក៏ស្រាប់តែមានបក្សពួករបស់ម៉ូតូកង់បីជាច្រើននាក់បានចេញមក និងបានប្រើប្រាស់អំពើហិ.ង្សាមកលើពួកគេថែមទៀត រួចក៏គេចខ្លួនបាត់ស្រមោលអស់ តែត្រូវបានពួកគេឃាត់បានម្នាក់។
តាមសម្តីបុរសដែលរួមដំណើរលើម៉ូតូកង់បី បានអោយដឹងថា គាត់ និងម្ចាស់ម៉ូតូកង់បី គឺជាអ្នកស្គាល់គ្នា នៅពេលកើតហេតុ ម៉ូតូនោះបានជិះបុកពីក្រោយម៉ូតូកង់បីដែលគាត់ជិះ ពេលនោះពួកគាត់មិនបានបើករត់ទេ គ្រាន់តែបើកម៉ូតូកង់បីអែបទៅលើចិញ្ចើមផ្លូវតែប៉ុណ្ណោះ។ ខណៈពេលនោះ ស្រាប់តែភាគីខាងម៉ូតូបានរត់មកចាប់ក្របួច.កអាវម្ចាស់ម៉ូតូកង់បី ដោយសារអ្នកស្គាល់ម្ចាស់ម៉ូតូកង់បីដែលនៅក្បែរនោះឃើញថា គេមករឿងម្ចាស់ម៉ូតូកង់បីក៏រត់មកជួយ ហើយក៏កើតជាហិ.ង្សាវា.យតប់គ្នាតែម្ដង ប៉ុន្តែគាត់មិនបានចូលរួមនោះទេ គ្រាន់តែជួយឃាត់តែប៉ុណ្ណោះ។
ក្រោយពេលកើតហេតុ សមត្ថកិច្ចមូលដ្ឋានក៏បាននាំគ្នាម្ចាស់ម៉ូតូ និងបុរសដែលជាអ្នករួម ដំណើរនៅលើម៉ូតូកង់បី ទៅកាន់ប៉ុស្តិ៍នគរបាលរដ្ឋបាលស្រះចក ដើម្បីធ្វើការសាកសួរ និងដោះស្រាយគ្នាជាបន្តទៀត៕
ចែករំលែកព័តមាននេះ