នៅពេលចូលឆ្នាំថ្មី២០២៣ យើងទាំងអស់គ្នាសុទ្ធតែចង់អោយរឿងរ៉ាងល្អៗជាច្រើនកើតមានចំពោះយើង។ យើងស្រម៉ៃចង់មានលុយហូរចូលច្រើន មានការងារល្អធ្វើ មានសុខភាពល្អ មានទំនាក់ទំនងស្នេហាល្អ មានឡានថ្មីជិះ មានផ្ទះកាន់តែធំស្កឹមស្កៃ ហើយមាន
នៅពេលចូលឆ្នាំថ្មី២០២៣ យើងទាំងអស់គ្នាសុទ្ធតែចង់អោយរឿងរ៉ាងល្អៗជាច្រើនកើតមានចំពោះយើង។ យើងស្រម៉ៃចង់មានលុយហូរចូលច្រើន មានការងារល្អធ្វើ មានសុខភាពល្អ មានទំនាក់ទំនងស្នេហាល្អ មានឡានថ្មីជិះ មានផ្ទះកាន់តែធំស្កឹមស្កៃ ហើយមានលុយច្រើនលានដុល្លារ នៅក្នុងគណនេយ្យធនាគារ និងមាន សុភមង្គលពេញមួយជីវិតនៅឆ្នាំ២០២៣ និងឆ្នាំខាងមុខៗ។
យើងគិតថាកាលៈទេសៈរៀបរាប់ខាងលើនេះ នឹងនាំអោយយើងសប្បាយរីករាយក្នុងចិត្ត។ ជាការពិត វាអាចធ្វើអោយអ្នកសប្បាយចិត្ត។ ប៉ុន្តែការសប្បាយចិត្តនោះ មានរយៈពេលខ្លី និងកំណត់មួយ។ ដូចជាអ្នកត្រូវឆ្នោតរាប់លានដុល្លារជាដើម។ ការត្រូវឆ្នោតនោះ អាចធ្វើអោយពួកគេសប្បាយចិត្តជាខ្លាំងនៅពេលដឹងថា ខ្លួនត្រូវឆ្នោត។ ប៉ុន្តែមិនយូរប៉ុន្មាន វាក៏លែងមានឥទ្ធិពលធ្វើអោយពួកគេសប្បាយចិត្ត។
ដូចគ្នានេះ ពេលអ្នកទិញបានឡានថ្មី អ្នកនឹងសប្បាយចិត្តជាមួយឡានថ្មីនោះ ប៉ុន្តែក្រោយមកការសប្បាយចិត្តក៏កាន់តែរសាត់បាត់ទៅនៅពេលដែលនោះកាន់តែចាស់។
តើអ្នកនៅតែមិនជឿមែនទេ?
តាមសៀវភៅ «វិធីធ្វើអោយសប្បាយចិត្ត» (How of Happiness) ៖ ការសិក្សាស្រាវជ្រាវផ្នែកវិទ្យាសាស្ត្រ បានរកឃើញថា ស្ថានភាព ឬកាលៈទេសៈទាំងអស់ដែលរៀប រាប់ខាងលើនេះ បានចូលរួមធ្វើអោយមនុស្សសប្បាយចិត្តត្រឹមតែ១០ភាគរយប៉ុណ្ណោះ។
ចំណែកការសិក្សាស្រាវជ្រាវក៏បានរកឃើញថា ការរៀបការអាចជំរុញការសប្បាយចិត្ត តែក្នុងរយៈពេលពីរឆ្នាំដំបូងប៉ុណ្ណោះ។ គេក៏រកឃើញថា អ្នករៀបការហើយ មានការសប្បាយ រីករាយខ្លាំង ជាងអ្នកនៅលីវ។ ប៉ុន្តែគេមានការភ្ញាក់ផ្អើល ដោយសាររកឃើញថា ការសប្បាយរីករាយមានលក្ខណៈខុសគ្នាតិចតួចប៉ុណ្ណោះ គឺប្រមាន៤ភាគរយ។
បើដូច្នេះមែន តើ៩០ភាគរយទៀតដែលនាំអោយយើងមានសេចក្តីសប្បាយរីករាយនោះគឺជាអ្វី?
ការសិស្សាស្រាវជ្រាវក៏បានរកឃើញថា ការសប្បាយចិត្ត៥០ភារយទៀត គឺអាស្រ័យនឹងហ្សែនតំណពូជ។ ដូច្នេះ តើអ្នកមានកត់សម្គាល់ទេ? ឃើញមនុស្សខ្លះតែងមានទឹកមុខសប្បាយរីករាយជានិច្ច បើទោះបីជាពួកគេមិនមានការងារល្អធ្វើ ឬក៏មិនមានផ្ទះធំនៅ។ គេបានសិក្សាទៅលើកូនភ្លោះដែលរស់នៅក្នុងស្ថានភាពសេដ្ឋកិច្ចខុសគ្នា។ ដោយកូនភ្លោះខ្លះរស់នៅក្នុងភាពក្រីក្រ ខណៈកូនភ្លោះខ្លះរស់នៅក្នុងជីវិតជាអ្នកមាន។ ក្រោយមកគេបានរកឃើញថា កូនភ្លោះទាំងនោះមានកម្រិតសប្បាយរីករាយខុសគ្នាបន្តិចបន្តួចប៉ុណ្ណោះ។
នេះជាមូលដ្ឋានគ្រឹះនាំដល់ការសន្និដ្ឋានការសប្បាយរីករាយ៥០ភាគរយ គឺទាក់ទងនឹងហ្សែនតំណពូជពីកំណើត។
ដូច្នេះចុះ៤០ភារយទៀតនៃការសប្បាយរីករាយបណ្តាលមកពីអ្វី?
ការសិក្សាស្រាវជ្រាវបែបវិទ្យាស្ត្ររកឃើញថា ៤០ភាគរយទៀតនៃការសប្បាយរីករាយ គឺទាក់ទងនឹងគំនិត និងអាកប្បកិរិយ៉ារបស់មនុសុ្សយើង។ និយាយអោយខ្លី គឺវាកើតចេញមកពីខ្លួនយើងខ្លួនឯង។ វាមកពីអ្វីដែលយើងធ្វើ និងអ្វីដែលយើងគិត។
១០ភាគរយនៃការសប្បាយរីករាយចិត្តទាក់ទងនឹងកាលៈទេសៈខាងក្រៅ ហើយ ៥០ភាគរយទៀតទាក់ទងនឹងហ្សែនតំណពូជ។ ដូច្នេះយើងមិនអាចកែប្រែវាបានឡើយ។ ប៉ុន្តែការសប្បាយរីករាយ ចិត្ត៤០ភាគរយទៀត ទាក់ទងអ្វីដែលយើងគិត និងអ្វីដែលយើងធ្វើ។ ដូច្នេះ ការផ្លាស់ប្តូរការគិត និងការធ្វើនឹងអាចធ្វើអោយមានការប្រែប្រួលទៅលើអារម្មណ៍សប្បាយចិត្តរបស់មនុស្ស។
ដូច្នេះការគិត និងការធ្វើសកម្មភាពមួយចំនួន នឹងជួយអោយអ្នកសប្បាយចិត្ត។ ប៉ុន្តែនៅទីនេះ យើងត្រូវ យល់ថា វាអាចខុសគ្នាពីមនុស្សម្នាក់ទៅមនុស្សម្នាក់ទៀត ចំពោះសកម្មភាពទាំងនេះ។ ឧទាហរណ៍ នៃសកម្មភាពដែលជំរុញដល់ការសប្បាយចិត្ត គឺការដឹងគុណ។ ការដឹងគុណត្រូវគេ គិតថាជាអាថ៌កំបាំង មួយនៃការធ្វើអោយមនុស្សសប្បាយចិត្ត។ អ្នកអាចសរសេរកំណត់ហេតុ សកម្មភាពប្រាំយ៉ាងក្នុងមួយថ្ងៃ ដែលអ្នក ដឹងគុណចំពោះវា។
ប៉ុន្តែចូរអ្នកចាំថា ប្រសិទ្ធភាពនៃសកម្មភាពដែលជំរុញដល់ការសប្បាយចិត្ត គឺអាស្រ័យលើពេលវេលា និងភាពញឹកញាប់នៃការធ្វើសកម្មភាពទាំងនោះផងដែរ។
ដូច្នេះអ្នកត្រូវធ្វើសកម្មភាពដែលជំរុញដល់ការសប្បាយរីករាយ តាមរបៀបមួយដែលសមនឹងរូបអ្នក ហើយទន្ទឹមនោះ អ្នកក៏ត្រូវធ្វើអោយមានការប្រែប្រួលសកម្មភាពទាំងនោះផងដែរ។ ការធ្វើអ្វីមួយ ដដែលៗពេកនឹងធ្វើអោយវាបាត់ប្រសិទ្ធភាពក្នុងការជំរុញការសប្បាយរីករាយក្នុងចិត្ត។
មានសកម្មភាពជាច្រើនដែលនឹងជំរុញដល់ការសប្បាយចិត្តរបស់អ្នក ដូចជាការហាត់ប្រាណ ការចូលរួមកម្មវិធីផ្សេងៗ ការសមាធិ ការពង្រឹងទំនាក់ទំនង ការមានចិត្តសន្តោសដល់អ្នកដទៃ ការចួលរួមកម្មវិធីសាសនាជាដើម គឺសុទ្ធតែអាចធ្វើអោយអ្នកសប្បាយចិត្ត។ ដូច្នេះចូរអ្នកធ្វើអោយខ្លួនឯងមានចិត្តវិជ្ជមាន និងសុទិដ្ឋិនិយមអំពីជីវិត ហើយទន្ទឹមនោះ ធ្វើសកម្មភាពនានាដែលអាចជួយដល់អ្នកដូចជា ធ្វើការហាត់ប្រាណ ការសរសេរកំណត់ហេតុ ការដឹងគុណចំពោះរឿងល្អៗ ដែលកើតមានប្រចាំថ្ងៃចំពោះអ្នក។ ប៉ុន្តែអ្នកត្រូវចាំថា សកម្មភាពទាំងអស់នេះ គឺអាចមានប្រសិទ្ធភាពខុសគ្នាពីមនុស្សម្នាក់ទៅមនុស្សម្នា់ទៀតក្នុងការធ្វើអោយសប្បាយចិត្ត។ ដូច្នេះអ្នកអាចសាកល្បង ហើយនឹងដឹងថា សកម្មភាពណាដែលសមនឹងអ្នក ដើម្បីធ្វើអោយអ្នកសប្បាយចិត្ត។ ទន្ទឹមនឹងនោះ ក៏ត្រូវចាំផងដែរ កុំធ្វើសកម្មភាពដដែលៗពេក ហើយត្រូវធ្វើអោយសកម្មភាពទាំងនោះមានការប្រែប្រួលខ្លះ ដើម្បីអោយវាស្រស់បំព្រងថ្មីឡើងវិញ និង មានប្រសិទ្ធភាពសម្រាប់វិថីជីវិតរបស់អ្នកពោរពេញដោយសេចក្តីសប្បាយចិត្ត៕ ដោយ ៖ សារ៉ាន់
ចែករំលែកព័តមាននេះ