បញ្ជូនបុរសម្នាក់ទៅតុលាការ ពាក់ព័ន្ធករណីជួញដូរគ្រឿងញៀ.ន
ខេត្តបាត់ដំបង ៖ កម្លាំងកងរាជអាវុធហត្ថបានបញ្ជូនជនសង្ស័យម្នាក់ទៅកាន់តុលាការនៅរសៀលថ្ងៃទី២៧មិថុនានេះ ដែលត្រូវឃាត់ខ្លួន ពាក់ព័ន្ធនឹងករណីជួញដូរគ្រឿងញៀ.នខុសច្បាប់
ខេត្តបាត់ដំបង ៖ កម្លាំងកងរាជអាវុធហត្ថបានបញ្ជូនជនសង្ស័យម្នាក់ទៅកាន់តុលាការនៅរសៀលថ្ងៃទី២៧មិថុនានេះ ដែលត្រូវឃាត់ខ្លួន ពាក់ព័ន្ធនឹងករណីជួញដូរគ្រឿងញៀនខុសច្បាប់ ប្រព្រឹត្តនៅភូមិអូរខ្ជាយ សង្កាត់ព្រែកព្រះស្ដេច ក្រុងបាត់ដំបង។ មន្ត្រីកងរាជអាវុធហត្ថបានឲ្យដឹងថា ជនសង្ស័យឈ្មោះ សោភ័ណ ដួងសិលា ភេទប្រុស អាយុ២៩ឆ្នាំ មុខរបលក់ដូរ នៅភូមិអូរខ្ជាយ សង្កាត់ព្រែកព្រះស្ដេច ក្រុងបាត់ដំបង។ ជននេះត្រូវកម្លាំងកងរាជអាវុធហត្ថឃាត់ខ្លួន កាលពីរសៀលថ្ងៃទី២៦ មិថុនា នៅនឹងផ្ទះរបស់ខ្លួន ដែលស្ថិតក្នុងភូមិ សង្កាត់ខាងលើ ខណៈកំពុងប្រព្រឹត្តបទល្មើសជាក់ស្ដែង។ បើតាមយោងតាមរបាយការណ៍របស់ការិយាល័យជំនាញ បានឲ្យដឹងថា ជាមួយនឹងការឃាត់ខ្លួនជនសង្ស័យរូបនេះ មន្ត្រីជំនាញដកហូតបាននូវវត្ថុតាង រួមមាន៖
ទី១-ថ្នាំញៀនប្រភេទមេតំហ្វេតាមីន ICE (ម៉ាទឹកកក) ចំនួន៨កញ្ចប់ មានទម្ងន់៧៧,២៧ក្រាម ទី២-ថ្នាំញៀនប្រភេទម្សៅពណ៌ស(ខេ)ចំនួន២កញ្ចប់ ទម្ងន់១,២៥ក្រាម ទី៣-ជញ្ជីងសម្រាប់ថ្លឹងថ្នាំញៀនចំនួន១ ទី៤-ម៉ូតូម៉ាកហុងដាឌ្រីមសេរី២០១៧មួយគ្រឿង ទី៥-ទូរស័ព្ទដៃស៊េរីទំនើបចំនួន៣គ្រឿង ទី៦-ប្រាក់ខ្មែរជាង៣លានរៀល និងទី៧-ប្រាក់ដុល្លាចំនួន៣១០ដុល្លា រួមទាំងវត្ថុតាងមួយចំនួនទៀត។ ក្រោយពីឃាត់ខ្លួនបញ្ជូនដល់ការិយាល័យប្រឆាំងបទល្មើសគ្រឿងញៀន ជនសង្ស័យឈ្មោះ សោភ័ណ ដួងសិលា បានសារភាពថា ខ្លួនពិតជាបានប្រព្រឹត្តបទល្មើសជួញដូរថ្នាំញៀននេះ ហើយថែមទាំងបានទទួលស្គាល់ថា ថ្នាំញៀនដែលសមត្ថកិច្ចដកហូតបាននោះ ពិតជារបស់ខ្លួនមែន។
ប៉ុន្តែជននេះហាក់ព្យាយាមបិទបាំងអំពីប្រវត្តិរបស់ខ្លួន ក្នុងការរកស៊ីជួញដូរគ្រឿងញៀនប្រឆាំងនឹងច្បាប់នេះ។ ទោះជាយ៉ាងណាមន្ត្រីកងរាជអាវុធហត្ថបានអះអាងថា ជនសង្ស័យរូបនេះ ជាមុខសញ្ញាជួញដូរថ្នាំញៀនយ៉ាងសកម្មមុនពេលត្រូវឃាត់ខ្លួន។ មន្ត្រីដដែលបានបញ្ជាក់ថា កម្លាំងជំនាញ បានតាមដានសកម្មភាពជននេះយូរហើយ រហូតឈានដល់ការឃាត់ខ្លួនបាន និងដកហូតបានទាំងវត្ថុតាងជាច្រើនទៀតផង ហើយមន្ត្រីជំនាញបានសួរនាំ និងកសាងសំណុំរឿងបញ្ជូនជននេះទៅតុលាការហើយ៕
ចែករំលែកព័តមាននេះ