ខេត្តស្វាយរៀង ៖ កងរាជអាវុធហត្ថខេត្តសហការណ៍ជាមួយកងរាជអាវុធហត្ថក្រុងបាវិត បានធ្វើការចុះបង្ក្រាបមុខសញ្ញារក្សាទុកជួញដូរ និងប្រើប្រាស់សារធាតុញៀន បានចំនួន២នាក់ រឹបអូសវត្ថុតាងគ្រឿងញៀនចំនួន០៦កញ្ចប់ និងថង់វិចខ្ចប់មួយចំនួន នៅវេលាម៉ោង០១និង២០នាទីរសៀល ថ្ងៃទី២៦ ខែមិថុនា ឆ្នាំ២០១៧ ស្ថិតក្នុងភូមិថ្នល់ទទឹង សង្កាត់ច្រកម្ទេស ក្រុងបាវិត ។
បើតាមមន្ត្រីកងរាជអាវុធហត្ថខេត្តស្វាយរៀង បានឲ្យដឹងថា ក្រោមបញ្ជាផ្ទាល់របស់លោកឧត្ដមសេនីយ៍ត្រី សែ វុទ្ធី មេបញ្ជាការកងរាជអាវុធហត្តខេត្ត និងមានការចូលរួមសម្របសម្រួលពីលោក គង់ ច័ន្ទខេមរិទ្ធ ព្រះរាជអាជ្ញា អមសាលាដំបូងខេត្តស្វាយរៀង បានចុះធ្វើប្រតិបត្តិការបង្ក្រាបមុខសញ្ញា រក្សាទុក និងជួញដូរគ្រឿងញៀន បានចំនួន០២នាក់ រឹបអុសវត្ថុតាងរួមមាន គ្រឿងញៀនប្រភេទម្សៅក្រាមពណ៍ស (ម៉ាទឹកកក) ចំនួន០៦កញ្ចប់ ធំ២កញ្ចប់ តូច៤កញ្ចប់ មានទម្ងន់៨.០២ក្រាម ។ សម្ភារថង់វិចខ្ចប់មួយចំនួន និងទូរស័ព្ទដៃចំនួន២គ្រឿង ។ ជនសង្ស័យ២នាក់មាន ១.ឈ្មោះ មុំ សៀន ភេទប្រុស អាយុ៣២ឆ្នាំ ជនជាតិខ្មែរ មុខរបរកសិករ មានទីលំនៅភូមិថ្នល់ទទឹង សង្កាត់ច្រកម្ទេស ក្រុងបាវិត ខេត្តស្វាយរៀង ។ ២.ឈ្មោះ ព្រំ ឆៃ ភេទប្រុស អាយុ១៥ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅបច្ចុប្បន្នភូមិថ្នល់ទទឹង សង្កាត់ច្រកម្ទេស ក្រុងបាវិត ខេត្តស្វាយរៀង ។
បច្ចុប្បន្នជនសង្ស័យទាំង២នាក់ និងវត្ថុតាងគ្រឿងញៀន សមត្ថកិច្ចបានកសាងសំណុំរឿងបញ្ជូនទៅសាលាដំបូងខេត្តស្វាយរៀង ដើម្បីចាត់ការតាមនីតិវិធីច្បាប់ និងឃុំខ្លួនបណ្តោះអាសន្ននៅពន្ធនាគារខេត្តនៅវេលាម៉ោង០៤និង០០នាទី ថ្ងៃទី២៧ ខែមិថុនា ឆ្នាំ២០១៧ ។
ចែករំលែកព័តមាននេះ