ខេត្តកំពត ៖ បញ្ជាក់ពីទឹកដីខេត្តកំពត សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានអះអាងច្បាស់ៗថា រាជរដ្ឋាភិបាលកម្ពុជា នឹងមិនបើកប្រាក់ខែជាសាច់ប្រាក់ដោយផ្ទាល់ឡើង តាមការស្នើសុំរបស់លោក…
ខេត្តកំពត ៖ បញ្ជាក់ពីទឹកដីខេត្តកំពត សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានអះអាងច្បាស់ៗថា រាជរដ្ឋាភិបាលកម្ពុជា នឹងមិនបើកប្រាក់ខែជាសាច់ប្រាក់ដោយផ្ទាល់ឡើង តាមការស្នើសុំរបស់លោក សុខ ទូច ប្រធានរាជបណ្ឌិត្យសភាកម្ពុជា ហើយរាជរដ្ឋាភិបាលនៅរក្សាការបើកប្រាក់ខែតាមប្រព័ន្ធធនាគារដដែល។
ការអះអាងរបស់ សម្ដេចតេជោនាយករដ្ឋមន្ត្រីបែបនេះ ធ្វើឡើងបន្ទាប់ពីលោក សុខ ទូច ប្រធានរាជបណ្ឌិត្យសភាកម្ពុជា ដាក់សំណើទៅរាជរដ្ឋាភិបាលសុំឲ្យបើកប្រាក់ខែជាសាច់ប្រាក់ដោយផ្ទាល់ឡើងវិញ។
សម្តេចតេជោ បានថ្លែងក្នុងពិធីបើកការដ្ឋានស្តា និងលើកកម្រិតគុណភាពផ្លូវពីរគឺផ្លូវជាតិលេខ៣១ និងលេខ៣៣ ស្ថិតក្នុងភូមិសាស្ត្រខេត្តកំពត និងខេត្តកែប នាថ្ងៃទី៣០ ធ្នូនេះថា មានបងប្អូនជាច្រើនបារម្ភខ្លាចសម្ដេចធ្វើតាមការស្នើសុំរបស់លោក សុខ ទូច។
សម្ដេចថា សម្ដេចក៏ជាអ្នកវិទ្យាសាស្ត្រដឹកនាំដែលអាចចាត់ទុកថា ជាអ្នកដឹកនាំដែលយូរជាងគេ និងគ្រប់ហេតុការណ៍គ្រប់កាលៈទេសៈ គ្មានកន្លែងណាដែលគ្មានបាតដៃសម្ដេចនៅក្នុងនោះក្នុងរយៈពេលជិត ៤៤ឆ្នាំកន្លងមកនេះ។
សម្ដេចតេជោ នាយករដ្ឋមន្ត្រីហ៊ុន សែន បានបញ្ជាក់ថា ៖ «សុខ ទូច គាត់ជាអ្នកស្រាវជ្រាវម្នាក់ ក៏ប៉ុន្តែគាត់ផ្អែកទៅលើថា គាត់គ្រប់គ្រងបុគ្គលិកខ្លួនឯងអត់បាន គាត់មកស្នើឲ្យរាជរដ្ឋាភិបាលរំសាយចោលការបើកលុយតាមធនាគារ ចឹងមួយចំនួនកំពុងមានការភ័យខ្លាចថា ក្រែងខ្ញុំតាម សុខ ទូច អត់ទេ។ សុខ ទូច គួរតែខិតខំគ្រប់គ្រងមន្ត្រីត្រឹមតែរាជបណ្ឌិត្យសភាមិនបាន ហើយមកបំផ្លាញចោលផែនការកែទម្រង់ ដែលយើងបានប្រឹងធ្វើចូលទៅក្នុងក្របខ័ណ្ឌសេដ្ឋកិច្ចឌីជីថល ហើយមកទាញឲ្យមកបើកលុយលេងមកចូលទសវត្សរ៍៩០វិញទៅមិនរួចទេ» ។
ជាមួយគ្នានោះដែរ សម្ដេចតេជោ បន្ថែមថា កំណែទម្រង់មួយនេះធំណាស់ ហើយជំរុញយើងឈានទៅដល់ដំណាក់កាលឌីជីថលអស់ទៅហើយ ដោយគ្រាន់តែប្រើកាតមួយទៅបើកលុយ២អាទិត្យម្ដង នៅធនាគារ។
សម្ដេចតេជោ ក៏បានផ្ដាំទៅលោក សុខ ទូច ឲ្យពង្រឹងការគ្រប់គ្រងមន្ត្រី ក្នុងរាជបណ្ឌិត្យសភាកម្ពុជាឲ្យបានល្អកុំមកទាមទារឲ្យរាជរដ្ឋាភិបាល បើកលុយសុទ្ធឡើងវិញ៕
ចែករំលែកព័តមាននេះ