ខេត្តកំពង់ចាម ៖ រថយន្តម៉ាក LEXUS RX300 ពណ៌ស ១គ្រឿង ពាក់ស្លាកលេខ ភ្នំពេញ ២AQ-១៥៥៤ ត្រូវបានជនមិនស្គាល់មុខ ជិះយកមកប្លុងចោលត្រង់ផ្លូវលេខ៩០ ក្នុងភូមិទី១ សង្កាត់វាលវង់ ក្រុងកំពង់ចាម កាលពីវេលាម៉ោង០១រសៀលថ្ងៃទី២៣ ខែមិថុនា ឆ្នាំ២០១៧ ។ រហូតដល់វេលាម៉ោងជាង០៧យប់ ដោយមិនមានឃើញម្ចាស់នោះទេ បង្កឲ្យមានការភ្ញាក់ផ្អើលដល់សមត្ថកិច្ច ចុះទៅពិនិត្យ និងបានបង្កើតគណៈកម្មការចម្រុះ ស្រូចយករថយន្តនេះមករក្សាទុក នៅអធិការដ្ឋាននគរបាលក្រុងកំពង់ចាម ។
លុះមកដល់ព្រឹក ថ្ងៃទី២៤ ខែមិថុនា នេះ តំណាងលោក ប្លង់ សុផល ព្រះរាជអាជ្ញារងអមសាលាដំបូងខេត្ត ចុះមកពិនិត្យ ទើបដឹងថារថយន្តនេះ ពិតជាចោរប្លន់ពីទឹកដីខេត្តកំពង់ធំ ហើយជិះយកមកប្លុងចោលនៅក្រុងកំពង់ចាម ។ លោកវរសេនីយ៏ទោ ស៊ឹង ចាន់អូន អធិការនគរបាលក្រុងកំពង់ចាម ប្រាប់ឲ្យដឹងថា ៖ តាមរយៈសាក្សី ក្នុងពេលដែលរថយន្តខាងលើ បានបើកមកឈប់ចតត្រង់ដីឡូត៏មួយកន្លែងក្នុងភូមិទី១ សង្កាត់វាលវង់ដោយបានឃើញក្មេងប្រុសម្នាក់ អាយុប្រមាណជាង១០ឆ្នាំ បានដើរចេញពីត្រង់ចំណុចរថយន្តនោះ ចេញទៅបាត់រហូតដល់យប់ មិនបានឃើញវិញត្រឡប់មកវិញនោះទេ ទើបពលរដ្ឋមូលដ្ឋាន បានរាយការណ៍មកប៉ុស្តិ៍រដ្ឋបាលសង្កាត់វាលវង់ ។ លោកវរសេនីយ៏ទោ ស៊ឹង ចាន់អូន អធិការនគរបាលក្រុងកំពង់ចាម ប្រាប់បន្តថា ក្រោយពីបានសួរនាំពលរដ្ឋនៅម្តុំក្បែររថយន្តនេះ មិនមានអ្នកណាម្នាក់ចេញមុខមកអះអាងថា ជារថយន្តរបស់ខ្លួននោះទេ នៅយប់ថ្ងៃទី២៣ ខែមិថុនា ក៏បានបង្កើតគណៈកម្មការចម្រុះមាន មេភូមិ ចៅសង្កាត់ ព្រមទាំងស្ថាបនពាក់ព័ន្ធ និងដោយមានការឯកភាពពីលោកឧត្តមសេនីយ៏ត្រី ឯម កុសល ស្នងការនគរបាលខេត្ត និងលោកឧត្តមសេនីយ៏ត្រី ហេង វុទ្ធី ស្នងការរងនគរបាលខេត្ត ទទួលផែនកកណ្តាលយុត្តិធម៌ សម្រេចឲ្យស្ទូចយករថយន្តនេះមករក្សាទុក ជាបណ្តោះអាសន្ន នៅអធិការដ្ឋាននគរបាលក្រុងកំពង់ចាម ។ រហូតមកដល់ព្រឹកថ្ងៃទី២៤ ខែមិថុនា នេះ លោក ប្លង់ សុផល ព្រះរាជអាជ្ញារងអមសាលាដំបូងខេត្ត បានចាត់ឲ្យមន្ត្រីក្រឡាបញ្ជីម្នាក់ ចុះមកធ្វើការឆែកឆេររកវត្ថុតាង នៅក្នុងរថយន្ត ក្រែងមានការពាក់ព័ន្ធទៅនឹងករណីអ្វីមួយនោះ ។ ចំពោះវត្ថុតាងរួមមាន កេសដាក់ប្រអប់កុងទ័រ១ឡាំង មាន២០គ្រឿង នំប៉ាវផ្អែម និងប្រៃជាច្រើនឡាំង ឯកសារមួយចំនួនទៀត ដែលគេបានផ្ញើតាមរថយន្តតាក់ស៊ីនេះ ពីភ្នំពេញមកកាន់ខេត្តសៀមរាប ។ អាវុធ K54 ១ដើម គ្រាប់២០គ្រាប់ ដោយមានទាំងមានស្នាមឈាមប្រឡាក់ក្រោមពូក ដែលចោរបានបាញ់សម្លាប់អ្នកបើកបររថយន្តនេះ ត្រូវចំក្បាលធ្លាយ ហើយក្បាលគ្រាប់បានហោះមកបុកបែកកញ្ចក់ទ្វារខាងឆ្វេងផ្នែកខាងមុខថែមទៀត ។ លោកវរសេនីយ៏ទោ ស៊ឹង ចាន់អូន អធិការនគរបាលក្រុងកំពង់ចាម បញ្ជាក់ថា ក្រោយពីបានត្រួតពិនិត្យរបស់នគរបាលការិយាល័យបច្ចេកទេសខេត្ត ឃើញថា កញ្ចក់រថយន្តដែលចោរបាញ់បែកនេះ ទើបតែដូរដាក់ថ្មី ។ អ្នកបើកតាកស៊ីនេះឈ្មោះ ធឿន ឡារី ហៅ គិរី ភេទប្រុស អាយុ៣៦ឆ្នាំ មានទីលំនៅរាជធានីភ្នំពេញ មានមុខរបររត់តាក់ស៊ី ភ្នំពេញ-សៀមរាប ។ ក្រោយពីមានការភ្ញាក់ផ្អើលករណីបាញ់សម្លាប់ប្លន់យករថយន្តតាក់ស៊ី១គ្រឿងនៅខេត្តកំពង់ធំ លុះសាច់ញាតិរងគ្រោះបានបង្ហាញពីស្លាកលេខរថយន្ត ដែលចោរយកទៅបាត់នោះ និងរថយន្តដែលសមត្ថកិច្ចបានរឹបអូសមករក្សាទុក នៅអធិការដ្ឋាននគរបាលក្រុងកំពង់ចាម គឺត្រូវគ្នា ដូច្នេះរថយន្តនេះពិតជារបស់អ្នករងគ្រោះពិតមែន ។ ព្រោះថានៅលើរថយន្តឃើញមានស្នាមឈាមស្រក់ប្រឡាក់ក្រោមពូក ដែលចោរប្លន់បានបាញ់សម្លាប់អ្នកបើកបររថយន្តតាក់ស៊ី អាវុធខ្លីដែលចោរបានបាញ់ប្រហារសម្លាប់ប្លន់យករថយន្តនេះ ចោរមិនបានយកអាវុធនេះទៅជាមួយទេ គឺបានទុកនៅលើរថយន្ត រួមនឹងគ្រាប់ចំនួន២០គ្រាប់ទៀត ។
សមត្ថកិច្ចបានធ្វើការសន្និដ្ឋានថា ក្នុងពេលដែលរថយន្តបានបើកចេញពីរាជធានី មកកាន់ខេត្តសៀមរាបនោះ ក្រុមចោរអាចមានគ្នាចាប់ពី២នាក់ឡើង ស្របពេលដែលមកដល់ទឹកដីខេត្តកំពង់ធំ ចោរធ្វើជាឈឺបត់តូចតាមផ្លូវ កន្លែងណាមួយដែលស្ងាត់ មិនមានផ្ទះប្រជាពលរដ្ឋនៅក្បែរ ។ លុះពេលបានឱកាសហុចឲ្យ ក៏បាញ់ជនរងគ្រោះពីក្រោយត្រូវក្បាល១គ្រាប់ ធ្លាយមកបុកកញ្ចក់ទ្វាររថយន្តឡើងបែក ។ ស្របពេលមកដល់ត្រង់ចំណុចស្ពានគោល ឃុំប្រឡាយ ស្រុកស្ទោង ខេត្តកំពង់ធំ កាលពីយប់ថ្ងៃទី២២ ខែមិថុនា ឆ្នាំ២០១៧ ទម្លាក់សាកសពចោល ហើយបានប្លន់យករថយន្តខាងលើ បើកត្រលប់មកក្រោយឆ្ពោះមកកាន់ក្រុងកំពង់ចាម ហើយបានដោះដូរកញ្ចក់នោះ មិនដឹងជានៅជាងណាទេ ទាល់តែតម្លៃថ្លៃទើបជាងធ្វើឲ្យ ។ ហើយសមត្ថកិច្ច ក៏មិនទាន់ដឹងពីមូលហេតុអ្វីច្បាស់លាស់ ដែលក្រុមចោរប្លន់រថយន្តនេះបានហើយ បែរជាបើកយកមកប្លុងចោលនៅក្នុងភូមិទី១ សង្កាត់វាលវង់ ក្រុងកំពង់ចាមនេះទៅវិញ ។ នៅរសៀលថ្ងៃទី២៤ ខែមិថុនា ឆ្នាំ២០១៧ រថយន្ត និងវត្ថុតាងផ្សេងៗ ត្រូវបានប្រគល់ឲ្យនគរបាលខេត្តកំពង់ធំ ដើម្បីចាត់ការបន្តស្រាវជ្រាវបន្តតាមនីតិវិធីច្បាប់ ៕
ចែករំលែកព័តមាននេះ