រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ក្មេងស្ទាវ២នាក់ជិះម៉ូតូគេចពីក្រុមក្មេងស្ទាវមួយទៀតដែលបានដេញកា.ប់ ហើយយុវជនជាក្មេងស្ទាវទាំង២នាក់នោះក៏ជ្រុលទៅបុកជាមួយនឹងរថយន្តម៉ាក HILUX REVO ដែលចតស្ងៀមនៅលើផ្លូវ បណ្ដាលឲ្យមានអ្នករងរបួសធ្ងន់ម្នាក់ និងស្រាលម្នាក់ បង្កឱ្យមានការភ្ញាក់ផ្អើលកាលពីវេលាម៉ោង៩និង៣០នាទីយប់ ថ្ងៃទី២៥ ខែធ្នូ ឆ្នាំ២០២២ ទល់មុខស្ថានីយប្រេងឥន្ធនៈតេលា ផ្លូវដួងងៀប កែងផ្លូវវេងស្រេង ស្ថិតក្នុងសង្កាត់ស្ទឹងមានជ័យទី៣ ខណ្ឌមានជ័យ។
តាមប្រភពព័ត៌មានបានអោយដឹងថា មុនពេលកើតហេតុ មានយុវជនក្មេងស្ទាវចំនួន២នាក់ ដោយមិនដឹងថា តើមានទំនាស់រឿងអ្វីនោះទេ? បានជិះម៉ូតូម៉ាកហុងដាឌ្រីម ស៊េរីឆ្នាំ២០២១ ពណ៌ខ្មៅ ពាក់ស្លាកលេខ ភ្នំពេញ 1IV 1290 ជិះរត់គេចពីក្មេងស្ទាវមួយក្រុមទៀតដែលដេញកា.ប់ តាមបណ្ដោយផ្លូវវេងស្រេង រហូតដល់ផ្លូវកែងដួងងៀប ក៏ស្រាប់តែម៉ូតូយុវជនទាំង២នាក់នោះជ្រុលទៅបុកជាមួយនឹងរថយន្តម៉ាក HILUX REVO ពណ៌ស ពាក់ស្លាកលេខ កម្ពុជា KIMLY.36 ដែលចតស្ងៀមនៅលើផ្លូវពីក្រោយយ៉ាងពេញទំហឹង បណ្តាលឲ្យដួលម៉ូតូធ្លាក់កាំបិតប៉័ងតោ១ដើមនៅនឹងកន្លែងកើតហេតុ និងធ្វើឱ្យអ្នកបើកម៉ូតូរងរបួសធ្ងន់បែកកញ្ចប់មាត់ ចំណែកម្នាក់ទៀតអង្គុយខាងក្រោយរងរបួសរយះកែងដៃខាងឆ្វេង ដោយត្រូវគេកា.ប់។
ប្រភពដដែលបន្តថា ភា្លមៗនោះ ជនរងគ្រោះទាំង២នាក់ ត្រូវបានដឹកតាមម៉ូតូយកទៅសង្គ្រោះនៅមន្ទីរពេទ្យភ្លាមៗផងដែរ។ ដោយឡែកក្មេងស្ទាវមួយក្រុមដែលជិះដេញកា.ប់គេនោះ ឃើញហេតុការណ៍បែបនេះ ក៏បាននាំគ្នាជិះរត់គេចខ្លួនបាត់ស្រមោលអស់តែម្តងទៅ ។
ពាក់ព័ន្ធក្នុងហេតុការណ៍ខាងលើនេះដែរ បន្តិចក្រោយមកឃើញមានកម្លាំងសមត្ថកិច្ចមូលដ្ឋាន បានចុះទៅកន្លែងកើតហេតុ រួចយកបានកាំបិតប៉័ងតោ១ដើមយកទៅរក្សាទុក ហើយអោយភាគីទាំងពីរឈប់និយាយរឿងហិ.ង្សា អោយមកដោះស្រាយរឿងចរាចរណ៍វិញ តែភាគីផ្សេងទៀតរត់គេចអស់ទៅហើយ។
ក្រោយពេលកើតហេតុ តំណាងភាគីទាំងសងខាង បានសម្របសម្រួលដោយខាងម៉ូតូសងសំណងទៅខាងរថយន្ត ចំនួន២០០ដុល្លារដើម្បីបញ្ចប់រឿងតែម្ដង៕
ចែករំលែកព័តមាននេះ