អណ្តាតភ្លើងបានឆេះឈើបារ៉ែត ដែលទុកមុខផ្ទះ បង្កឱ្យរាលដាលឆាបឆេះដល់ផ្ទះអស់ចំនួន៣ល្វែង និងរោងស្តុកឈើមួយល្វែងហ្មត់អស់ទាំងស្រុង បង្កឱ្យមានការភ្ញាក់ផ្អើល
រាជធានីភ្នំពេញ ៖ អណ្តាតភ្លើងបានឆេះឈើបារ៉ែត ដែលទុកមុខផ្ទះ បង្កឱ្យរាលដាលឆាបឆេះដល់ផ្ទះអស់ចំនួន៣ល្វែង និងរោងស្តុកឈើមួយល្វែងហ្មត់អស់ទាំងស្រុង បង្កឱ្យមានការភ្ញាក់ផ្អើលកាលពីវេលាម៉ោង២និង៣០នាទីរំលងអធ្រាត្រឈានចូលថ្ងៃទី២៦ ខែធ្នូ ឆ្នាំ២០២២ នៅចំណុចជិតស្តុបផ្សារដើមគ ផ្ទះលេខ១៧១ ផ្លូវ២១៧ ក្រុម៤៩ ស្ថិតក្នុងភូមិ១៦ សង្កាត់បឹងសាឡាង ខណ្ឌទួលគោក។
ម្ចាស់ទីតាំងមានឈ្មោះ ហ៊ួត មុំ ភេទស្រី អាយុ៤១ឆ្នាំ ជនជាតិខ្មែរ មុខរបរលក់ឈើបារ៉ែត ប្រភេទសំណង់ឈើប្រក់ស័ង្កសីទំហំ០៨ម៉ែត្រx២៥ម៉ែត្រ ហើយត្រូវបានភ្លើងឆាបឆេះធ្វើឱ្យខូចខាតសម្ភារៈ និងរោងស្តុកឈើអស់១ខ្នង ព្រមទាំងបានឆេះរាលដាលដល់ផ្ទះអ្នកជិតខាងអស់ចំនួន០៣លែ្វងទៀត។
តាមប្រភពព័ត៌មានបានអោយដឹងថា មុនពេលកើតហេតុ គេបានឃើញមានអណ្ដាតភ្លើងឆាបឆេះចេញពីកន្លែងគរទុកឈើបារ៉ែត ដែលម្ចាស់ទុកនៅមុខផ្ទះយ៉ាងសន្ធោសន្ធៅ ដោយមិនដឹងថា មូលហេតុអ្វីនោះទេ?។ ហើយភ្លាមៗនោះ ក៏មានបងប្អូនឆោឡោថា «មានភ្លើងឆេះៗ» ទើបភ្ញាក់ផ្អើលដល់កម្មករដែលដេកយាមនៅខាងក្នុងរោងស្តុកឈើបារ៉ែតចេញមកក្រៅ។
ប្រភពដដែលបន្តថា ហើយពេលនោះ ខណៈអាកាសធាតុកំពុងធ្លាក់ខ្យល់ផង ធ្វើអោយអណ្ដាតភ្លើងកាន់តែឆាបឆេះយ៉ាងសន្ធោសន្ធៅខ្លាំងឡើងៗតែម្តង រហូតរាលដាលឆេះសល់ផ្ទះអ្នកជិតខាងអស់ចំនួន៣ល្វែង និងរោងស្តុកឈើបារ៉ែតបន្ថែមទៀត ទើបអ្នកជិតខាងបានរាយការណ៍ជូនកម្លាំងអាជ្ញាធរសមត្ថកិច្ចសុំជំនួយរថយន្ដបង្ការ និងពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញ និងបណ្តាអង្គភាពផ្សេងៗទៀត មកជួយអន្តរាគមន៍ចំនួន២១គ្រឿង ដោយប្រើប្រាស់ទឹកអស់ចំនួន៤២ឡាន និងរថយន្តក្រុមហ៊ុនស្រាបៀរកម្ពុជា០១គ្រឿង ប្រើប្រាស់ទឹកអស់ចំនួន ០១ឡាន រហូតដល់ម៉ោង៣និង៤០នាទីយប់ថ្ងៃដដែល ទើបធ្វើអោយភ្លើងរលត់ទៅវិញជាស្ថាពរ។
ពាក់ព័ន្ធក្នុងករណីខាងលើនេះដែរ គឺមិនមានគ្រោះថ្នាក់ដល់មនុស្ស ឬមានអ្នករងរបួសនោះទេ គឺគ្រាន់តែខូចខាតអស់ផ្ទះចំនួន៣ល្វែង រោងដាក់ឈើមួយ និងជញ្ជាំងផ្ទះអ្នកជិតខាងអស់ចំនួន២ រួមទាំងរថយន្តម៉ាកតាកូម៉ាមួយគ្រឿងទៀត។ ហើយចំពោះទំហំនៃការខូចខាតគិតជាទឹកប្រាក់វិញ គឺមិនទាន់ដឹងនៅឡើយ។
ដោយឡែកករណីខាងលើនេះ បើតាមប្រភពពីប្រជាពលរដ្ឋ គឺដាក់ការសង្ស័យថា មានអ្នកលួចដុត ទើបបណ្ដាលឲ្យឆាបឆេះសន្ធោសន្ធោបែបនេះ ។ ទោះជាយ៉ាងណាក៏ដោយ ចំពោះមូលហេតុដែលបណ្ដាលឲ្យមានការឆាបឆេះវិញ សមត្ថកិច្ចក៏មិនទាន់ហ៊ានសន្និដ្ឋានដែរ គឺកំពុងតែធ្វើការស្រាវជ្រាវ ៕
ចែករំលែកព័តមាននេះ