ខេត្តកំពត ៖ កម្លាំងការិយាល័យនគរបាលប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្ត ដឹកនាំកម្លាំងដោយលោកវរសេនីទោ លក ញ៉ាវ នាយការិយាល័យព្រហ្មទណ្ឌ័កំរិតស្រាល នៃស្នងការដ្ឋានខេត្ត បានការសម្របសម្រួលពីលោក ខាន់ សុផល ព្រះរាជអាជ្ញារងអមសាលាដំបូងខេត្ត នៅវេលាម៉ោង១១និង៣០នាទីព្រឹក ថ្ងៃទី២០ ខែមិថុនា ឆ្នាំ២០១៧ បានចុះបង្ក្រាបមុខសញ្ញាគ្រឿងញៀនមួយកន្លែង នៅភូមិជុំគ្រៀល ឃុំជុំគ្រៀល ស្រុកទឹកឈូ ឃាត់ខ្លួនជនសង្ស័យម្នាក់ និងរឹបអូសវត្ថុតាងថ្នាំញៀនចំនួន១០កញ្ចប់ធំ ២កញ្ចប់ ។
ជនសង្ស័យដែលសមត្ថកិច្ចឃាត់ខ្លួនមានឈ្មោះ ស៊ឹម សីលា ភេទប្រុស អាយុ២៧ឆ្នាំ មានទីលំនៅភូមជុំគ្រៀល ឃុំជុំគ្រៀល ស្រុកទឹកឈូ ។ លោកវរសេនីទោ លក ញ៉ាវ បានឲ្យដឹងថា ៖ បន្ទាប់ពីឃាត់ខ្លួនជនសង្ស័យម្នាក់ខាងលើ សមត្ថកិច្ចយើងធ្វើការសាកសួរ ហើយឈានទៅឃាត់ខ្លួនជនសង្ស័យចំនួន២នាក់ទៀត នៅវេលាម៉ោង៣និង០០នាទីរសៀល ថ្ងៃដដែល នៅចំណុចភូមិក្រាំង ឃុំត្រពាំងធំ ស្រុកទឹកឈូ ខេត្តកំពត ។ ក្នុងករណីចុះបង្ក្រាបលើកទី២នេះ សមត្ថកិច្ចយើងបានឃាត់ខ្លួនជនសង្ស័យចំនួន២នាក់ និងរឹបអូសវត្ថុតាងថ្នាំញៀនចំនួន៤កញ្ចប់តូច និងឧបករណ៍ពាក់ព័ន្ធការប្រើប្រាស់ និងជួញដូរមួយចំនួន ។ ជនសង្សយ័ទាំងពីរនាក់មានឈ្មោះ ទី១.កូវ វិចិត្រ ភេទប្រុស អាយុ៣១ឆ្នាំ មានទីលំនៅភូមិក្រាំង ឃុំត្រពាំងធំ ស្រុកទឺកឈូ ខេត្តកំពត ទី២.ម៉ី រិទ្ឋី ភេទប្រុស អាយុ២៤ឆ្នាំ មានទីលំនៅភូមិស្វាយធំ សង្កាត់ក្រាំងអំពិល ក្រុងកំពត ។
សមត្ថកិច្ចបន្តទៀតថា ជនសង្ស័យទាំង៣នាក់រួម និងវត្ថុតាងថ្នាំញៀន ត្រូវបានកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់ ។
ចែករំលែកព័តមាននេះ