ថៃ ៖ យោធាថៃបានបញ្ជូននាវាចម្បាំងចំនួន ៣គ្រឿង និងឧទ្ធម្ភាគចក្រ២គ្រឿងនៅថ្ងៃចន្ទ ទី ១៩ ធ្នូនេះដើម្បីព្យាយាមស្វែងរកទាហានម៉ារីនចំនួន៣១នាក់ដែលបានបា.ត់ខ្លួន បន្ទាប់ពីនាវារបស់ពួកគេលិចនៅពេលយប់ក្នុងឈូងសមុទ្រថៃ។
ទាហានម៉ារីនថៃបានបា.ត់ខ្លួននៅដែនទឹកនៃខេត្ត Prachuap Khiri Khan ស្ថិតនៅភាគខាងត្បូងទីក្រុងបាងកក បន្ទាប់ពីនាវាចម្បាំង Sukhothai មានបញ្ហាម៉ាស៊ីន និងបានលិចមុនពេលពាក់កណ្តាលអាធ្រាត្រ ចំងាយប្រហែល ២០ម៉ាយពីឆ្នេរសមុទ្រ។
កងទ័ពជើងទឹកថៃបានឱ្យដឹងថា បញ្ហាខ្យល់បក់ខ្លាំង និងរលកបានធ្វើឱ្យទឹកសមុទ្រចូលទៅក្នុងនាវាដែលលិចនោះ បណ្តាលឱ្យខូចដល់ប្រព័ន្ធអគ្គិសនី និងធ្វើឱ្យថាមពលសំខាន់ៗបាត់បង់។
កងទ័ពជើងទឹកថៃនិយាយនៅលើទំព័រហ្វេសបុកថា «នៅពេលម៉ាស៊ីនសំខាន់ៗឈប់ដំណើរការ នាវាមិនអាចត្រូវគ្រប់គ្រងបាននោះទេ។ ជាលទ្ធផល ទឹកបានចាប់ផ្តើមចូលនាវាយ៉ាងលឿន ធ្វើឱ្យវាទ្រេត»។
ប្រតិបត្តិការស្វែង និងជួយសង្គ្រោះបានចាប់ផ្តើមតាំងពីថ្ងៃអាទិត្យ។ នៅម៉ោង ៨:៤០នាទី នាវាដែលត្រូវបានបញ្ជូនឱ្យទៅជួយសង្គ្រោះមនុស្សចំនួន ១០៦នាក់នៅលើនាវាចម្បាំង Sukhothai បានធ្វើដំណើរទៅដល់កន្លែងកើតហេតុ។ ប៉ុន្តែវាមិនអាចធ្វើប្រតិបត្តិការជួយសង្គ្រោះបានទេដោយសារខ្យល់ខ្លាំង និងរលកធំៗ។
នាវាចម្បាំង Sukhothai បានបន្តធ្វើដំណើរទៅមុខ និងបានលិចនៅម៉ោង ០០:១២នាទី។ នៅពេលនោះ ទូកឯកជនចំនួន ២គ្រឿង និងនាវាដឹកប្រេងមួយគ្រឿងបានធ្វើដំណើរទៅដល់កន្លែងកើតហេតុដើម្បីផ្តល់ជំនួយបន្ថែម។
រហូតមកដល់ពេលនេះ កងទ័ពជើងទឹកថៃនិយាយថា បេសកកម្មសង្គ្រោះបានជួយសង្គ្រោះមនុស្សបាន ៧៥នាក់ ខណៈ ៣១នាក់ទៀតបន្តបាត់ខ្លួន៕ (យោងតាមប្រភព៖ Reuters)
ចែករំលែកព័តមាននេះ