អតីតតារាសម្តែងហូលីវូដលោកស្រី Angelina Jolie បាននិយាយថាគាត់នឹងលាលែងពីតួនាទីឯកអគ្គរដ្ឋទូតទីភ្នាក់ងារជនភៀសខ្លួនរបស់អង្គការសហប្រជាជាតិ បន្ទាប់ពីបំពេញតួនាទីនេះរយៈពេលជាង ២០ឆ្នាំ។
លោកស្រីថ្លែងដូច្នេះថា «ខ្ញុំជឿជាក់លើកិច្ចការជាច្រើនដែលអង្គការសហប្រជាជាតិបានធ្វើ ជាពិសេសជីវិតដែលអង្គការបានជួយសង្គ្រោះ»។
អតីតតារាសម្តែងឈ្នះពានរង្វាន់ Oscar វ័យ ៤៧ឆ្នាំរូបនេះបានបន្ថែមថា «ឥឡូវនេះ ខ្ញុំនឹងធ្វើការជាមួយអង្គការដឹកនាំដោយប្រជាជនដែលទទួលរងផលប៉ះពាល់ដោយផ្ទាល់ដោយជម្លោះ ដែលផ្តល់សំឡេងខ្លាំងបំផុតដល់ពួកគេ»។
ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនបាននិយាយថា លោកស្រី Angelina Jolie ជាអ្នកតស៊ូមតិសម្រាប់ជនភៀសខ្លួនដ៏មានឥទ្ធិពលបំផុតម្នាក់។
លោកស្រីបង្ហោះសារនៅលើ Instagram ដូច្នេះថា «បន្ទាប់ពីជាង ២០ឆ្នាំ នៅថ្ងៃនេះ ខ្ញុំលាឈប់ពីការងារជាមួយទីភ្នាក់ងារជនភៀសខ្លួនរបស់អង្គការសហប្រជាជាតិ»។
«ជនភៀសខ្លួនជាមនុស្សដែលខ្ញុំកោតសរសើរបំផុតក្នុងពិភពលោក ហើយខ្ញុំប្តេជ្ញាធ្វើការជាមួយពួកគេពេញមួយជីវិត»៕ (យោងតាមប្រភព៖ BBC)
ចែករំលែកព័តមាននេះ