ឃាត់ខ្លួនមន្ត្រីនគរបាលម្នាក់ បា.ញ់ប្រហារលើរថយន្ដប្រជាពលរដ្ឋ
រាជធានីភ្នំពេញ ៖ នាយរងការិយាល័យនគរបាលចរាចរណ៍ខេត្តកណ្តាលម្នាក់ ដែលបានបើករថយន្តបុក និងបា.ញ់គំរាមមួយគ្រាប់លើរថយន្ដរបស់ប្រជាពលរដ្ឋនៅតាមដងផ្លូវនោះបានសារភាព
រាជធានីភ្នំពេញ ៖ នាយរងការិយាល័យនគរបាលចរាចរណ៍ខេត្តកណ្តាលម្នាក់ ដែលបានបើករថយន្តបុក និងបាញ់គំរាមមួយគ្រាប់លើរថយន្ដរបស់ប្រជាពលរដ្ឋនៅតាមដងផ្លូវនោះបានសារភាព និងទទួលស្គាល់ពីកំហុសរបស់ខ្លួនត្រូវបានបញ្ជូនទៅស្នងការដ្ឋាននគរបាល ខេត្តកណ្ដាល ដើម្បីចាត់វិធានការតាមផ្លូវច្បាប់ និងដាក់ទោសពិន័យរបស់កងកម្លាំងនគរបាលជាតិបន្ទាប់ពីសមត្ថកិច្ចជំនាញនគរបាលចរាចរណ៍រាជធានីភ្នំពេញ បញ្ចប់ការសួរនៅរសៀលថ្ងៃទី១២ ខែមិថុនា ឆ្នាំ២០១៧។ នាយរងការិយាល័យចរាចរណ៍ នៃស្នងការដ្ឋាននគរបាលខេត្តកណ្តាលរូបនេះ ឈ្មោះ លឹម ចំណាន មានទីលំនៅភូមិស្វាយតាអុក សង្កាត់វាលស្បូវ ខណ្ឌច្បារអំពៅ ជាកូនប្រុសរបស់មន្ត្រីជាន់ខ្ពស់មួយរូបនៅក្រសួងមហាផ្ទៃជាម្ចាស់រថយន្តបាឡែន ស្លាកលេខ ភ្នំពេញ 2AM-2762 ដែលបើកប៉ះគេហើយ ដកកាំភ្លើងបាញ់គំរាម ថែមទៀតផង។
នាយឧត្តមសេនីយ៍ ជួន សុវណ្ណ បានបញ្ជាក់ប្រាប់ប្រព័ន្ធផ្សព្វផ្សាយកាលពីរសៀលថ្ងៃទី១២ ខែមិថុនា ថា «បន្ទាប់ពីយើងបានធ្វើកំណត់ហេតុ ជនបង្កបានសារភាពពីហេតុផលនៃការវ៉ាជែង និងការផ្ទុះអាវុធមួយគ្រាប់នោះហើយ ហើយម្យ៉ាងទៀត គឺយើងរង់ចាំដល់ម៉ោង១២នេះ យើងមិនទាន់បានឃើញ ជនរងគ្រោះចូលរួមដោះស្រាយទេ ហើយខ្ញុំសុំគោលការណ៍ពីនាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ រួចនាយឧត្តមសេនីយ៍ ឲ្យបញ្ជូនជនបង្កទៅឲ្យស្នងការនគរបាលខេត្តកណ្ដាល ដោយសារស្នងការនគរបាលខេត្តកណ្ដាល បានដកអាវុធរបស់ជនបង្កទុកហើយ ហើយយើងនឹងបញ្ជូន ជនបង្កនេះឲ្យឧត្តមសេនីយ៍ត្រី សុង លី ស្នងការរងនគរបាលរាជធានីភ្នំពេញ ទទួលផែនព្រហ្មទណ្ឌ ដឹកជនល្មើសទៅកាន់ស្នងការដ្ឋាននគរបាលខេត្តកណ្ដាល ហើយរថយន្ដជនបង្កក៏ត្រូវបាននគរបាលព្រហ្មទណ្ឌ បើកយកទៅឲ្យស្នងការខេត្តកណ្ដាល ដើម្បីចាត់ការនីតិវិធីច្បាប់ និងលក្ខន្តិកៈ នៃវិន័យរបស់កងកម្លាំងនគរបាលជាតិ»។
សូមបញ្ជាក់ថា ជុំវិញករណីកូនប្រុសមន្ត្រីជាន់ខ្ពស់ ក្រសួងមហាផ្ទៃមួយរូប ដែលជាម្ចាស់រថយន្តស្លាកលេខ ភ្នំពេញ 2AM-2762 ដែលបើកប៉ះគេហើយ ដកកាំភ្លើងបាញ់គំរាមទៀតនោះ ត្រូវបានអ្នកនាំពាក្យក្រសួងយុត្តិធម៌លោក គឹម សន្តិភាព បានសង្កត់ធ្ងន់ប្រាប់បណ្តាញព័ត៌មានថា បើទោះជននោះជាមន្ត្រីអនុវត្តច្បាប់ក៏ដោយ បើប្រព្រឹត្តអំពើល្មើសច្បាប់ ត្រូវទទួលខុសត្រូវចំពោះមុខច្បាប់ជាដាច់ខាត។ គួររំលឹកថា នៅថ្ងៃទី១០ ខែមិថុនា ឆ្នាំ២០១៧ វេលាម៉ោង៥និង៥៨ល្ងាច មានករណីមួយបានកើតឡើងនៅ នៅតាមបណ្តោយផ្លូវជាតិលេខ១ ជិតបុរីប៉េងហួតបឹងស្នោក្នុងខណ្ឌច្បារអំពៅ មានរថយន្តបាឡែន ពណ៌ទឹកមាស ពាក់ស្លាកលេខ ភ្នំពេញ 2AM-2762 មួយគ្រឿង ក្នុងទិសដៅស្របគ្នា បានជិះវ៉ាខាងស្តាំ ហើយប៉ះជាមួយរថយន្តមួយគ្រឿងទៀតមិនព្រមឈប់ បែរជាបង្អង់ល្បឿនហើយ បើកកញ្ចក់រថយន្តបាញ់មួយគ្រាប់គំរាម និងបើករត់គេចខ្លួនបាត់៕
ចែករំលែកព័តមាននេះ