រាជធានីភ្នំពេញ ៖ បុរសជាអាជីវករលក់ដូរនៅផ្សារដំបូលក្រហមម្នាក់ បានរត់មកដាក់ពាក្យបណ្តឹងនៅនគរបាលប៉ុស្តិ៍ចោមចៅឲ្យជួយធ្វើអន្តរាគមន៍ ក្រោយពីរូបគាត់ និងប្រពន្ធកំពុងតែនាំគ្នារើអីវ៉ាន់បិទតូប ហើយត្រូវបានជនមិនស្គាល់មុខធ្វើសកម្មភាពលួចយកកាបូបដែលមានលុយរហូតទៅដល់ជាង ២ពាន់ដុល្លារ និងសម្ភារមួយចំនួនទៀតទៅបាត់ ។ ហេតុការនេះដែរ បានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង០២និង៤៥នាទីរសៀល ថ្ងៃទី១១ ខែ មិថុនា ឆ្នាំ២០១៧ នៅនគរបាលប៉ុស្តិ៍ចោមចៅ ក្នុងសង្កាត់ចោមចៅ ខណ្ឌពោធិសែនជ័យ ។
តាមប្រភពព័ត៌មានពីនគរបាលបានប្រាប់ឱ្យដឹងថា បុរសរងគ្រោះឈ្មោះ លឹម គួន អាយុ៤២ឆ្នាំ និងស្ត្រីជាប្រពន្ធឈ្មោះ ផេង សុខលីម អាយុ៤២ឆ្នាំ ដូចគ្នា មានមុខរបរជាអាជីវករលក់ដូរនៅផ្សារតំបូលក្រហម មានទីលំនៅក្នុងភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ ។ មុនពេលកើតហេតុ កាលពីវេលាម៉ោង០៨យប់ ថ្ងៃទី១០ ខែមិថុនា ឆ្នាំ២០១៧ កន្លងមកនេះ ពីរនាក់ប្តីប្រពន្ធបាននាំគ្នាធ្វើការរើអីវ៉ាន់រៀបចំទុកដាក់ដើម្បីបិទតូបនៅខាងមុខ ដោយបានទុកកាបូបលុយរបស់ខ្លួននៅខាងក្នុង ។ តាមប្រភពដដែលបានប្រាប់បន្តទៀតថា ក្រោយពេលដែលពួកគាត់បានរៀចំអីវ៉ាន់ទុកដាក់រួច ហើយចូលទៅយកកាបូបលុយរបស់គាត់ដែលនៅខាងក្នុងតូបនោះ ទើបនាំគ្នាផ្អើលឆោឡោបាត់កាបូប ដោយក្នុងនោះមានលុយជាង ២ពាន់ដុល្លារ ទូរស័ព្ទដៃចំនួន២គ្រឿង រួមទាំងសម្ភារមួយចំនួនទៀតផង ទើបរសៀលនេះរត់មកប្តឹងកម្លាំងមានសម្ថកិច្ចមូលដ្ឋានឲ្យជួយធ្វើអន្តរាគមន៍ ។
ក្រោយពេលកើតហេតុ បុរសជាប្តីបានរត់មកដាក់ពាក្យបណ្តឹងនៅនគរបាលប៉ុស្តិ៍ចោមចោ ឲ្យជួយធ្វើអន្តរាគមន៍ និងធ្វើការស្រាវជ្រាវរកកាបូបលុយរបស់គាត់មកវិញ និងចាប់ខ្លួនជនសង្ស័យយកមកធ្វើការផ្តន្ទាទោសទៅតាមផ្លូវច្បាប់ផងដែរ ។
ចែករំលែកព័តមាននេះ