ខេត្តសៀមរាប ៖ ស្ត្រីជាបេក្ខជនឈ្មោះ ធឿន ចាន់ថា អាយុ១៨ឆ្នាំ ដែលមានកូនប្រុសម្នាក់ អាយុ១១ខែ ធ្លាប់ប្រឡងបាក់ឌុបធ្លាក់ថ្នាក់ជាតិឆ្នាំមុន(សិស្សស្វ័យរិន) ខណៈប្តីរត់ចោលបន្សល់នៅកូនតូចម្នាក់ សុខចិត្តតស៊ូចូលមកប្រឡងសារជាថ្មីនៅក្នុងមណ្ឌលអនុវិទ្យាល័យធ្លកអណ្តូង ទាំងបីកូន និងនាំម្តាយមកជាមួយ ដើម្បីបំបៅដោយទឹកដោះម្តាយ ហើយទុកឱ្យម្តាយមើល។
បើតាមប្រសាសនរបស់លោកគ្រូ កែវ សរាវុធ គណៈមេប្រយោគ និងជាប្រធានមណ្ឌលអនុវិទ្យាល័យ ធ្លកអណ្តូង ដែលមានទីតាំងស្ថិតនៅក្នុងភូមិធ្លកអណ្តូង សង្កាត់ស្លក្រាម ក្រុងសៀមរាប បានរៀបរាប់ប្រាប់ភ្នាក់ងារកោះសន្តិភាព នៅព្រឹកថ្ងៃទី៦ ខែវិច្ឆិកា ឆ្នាំ២០២២នេះថា បេក្ខជន ឈ្មោះ ធឿន ចាន់ថា ពិតជាមានកូនតូច អាយុ១១ខែ ពិតមែន ។ប៉ុន្តែបេក្ខជននេះជាសិស្ស (ស្វ័យរិន ) ដែលជាសិស្សប្រឡងធ្លាក់បាក់ឌុបថ្នាក់ជាតិឆ្នាំមុន ហើយបេក្ខជននេះមកប្រឡងនៅក្នុងមណ្ឌលអនុវិទ្យាធ្លកអណ្តូង បន្ទប់លេខ៣ តុលេខ៧១។
ចំណែក កូនទុកនៅជាមួយម្តាយរបស់គាត់ ខាងក្រៅរបង ហើយពេលដែលគាត់ប្រឡងបានមួយវិញ្ញាសារឃើញគាត់ចេញមកក្រៅបន្ទប់ យកកូនពីដៃម្តាយឱ្យបៅទឹកដោះរបស់គាត់ នេះបានចំជាកូន អ្នកតស៊ូមែន។លោកបានបញ្ជាក់ថា នៅមណ្ឌលប្រឡងដែលមានសិស្សមកចូលរួមប្រឡងក្នុងក្រុងសៀមរាប មាន២មណ្ឌល គឺមណ្ឌលធ្លកអណ្តូង ស្ថិតនៅក្នុងភូមិធ្លកអណ្តូង សង្កាត់ស្លក្រាម ក្រុងសៀមរាប និង មណ្ឌលមុខនាគ ស្ថិតនៅក្នុងភូមិត្រពាំងសេះ សង្កាត់គោកចក ក្រងសៀមរាប ភាគច្រើនដែលជាបេក្ខជនមកពីមន្ត្រីរាជការ , ព្រះសង្ឃ ,និងស្វ័យរិន។
ចំណែក ស្ត្រីជាបេក្ខជនឈ្មោះ ធឿន ចាន់ថា អាយុ១៨ឆ្នាំ ដែលមានស្រុកកំណើតនៅភូមិអូរចាក់ស្រា ឃុំស្រយ៉ង ស្រុកគូលែន ខេត្តព្រះវិហារ បានរៀបរាប់ប្រាប់ភ្នាក់ងារកោះសន្តិភាព នៅមុខមណ្ឌលប្រឡងថា នាងមានកូនប្រុសម្នាក់ឈ្មោះ ផាន់ ណា សិរីបុត្រ អាយុ១១ខែ ត្រូវបានប្តីបោះបង់ចោលកូនតាំងពី១កន្លះរហូតមកដល់បច្ចុប្បន្ន។ ហើយនាងមានឪពុកឈ្មោះ សេង ចាន់ថុល អាយុ៤៨ឆ្នាំមុខរបរ ធ្វើស្រែ និង ម្តាយ ឈ្មោះ ជ ស្រីង៉ា អាយុ៤២ឆ្នាំមុខរបរលក់ដូរ បច្ចុប្បន្នរស់នៅភូមិអូរចាក់ស្រា ឃុំស្រយ៉ង ស្រុកគូលែន ខេត្តព្រះវិហារ ។
នាងបានបន្តថា ពួកខ្ញុំទាំងពីរនាក់បានស្គាល់គ្នា តាមសង្គមហ្វេសប៊ុក រួចក៏ឱ្យឪពុកម្តាយទាំងសងខាងរៀបចំសែនព្រេនឱ្យតាមទំលៀមទំលាប់ប្រពៃណីចាស់ទុំ ក្នុងអំឡុងកូវីដ១៩ វាយលុកខ្លាំងទើបមិនអាចសុំច្បាប់រៀបការបាន។ បេក្ខជនឈ្មោះ ធឿន ចាន់ថា បានរៀបរាប់បន្តថា មុននឹងរូបនាងខ្ញុំមកប្រឡងបាក់ឌុបនេះ គឺនាងខ្ញុំរៀននៅវិទ្យាល័យសំរោងដំដែង ក្នុងស្រុកសូទ្រនិគម ខេត្តសៀមរាប បានប្រឡងធ្លាក់បាក់ឌុបនៅក្នុងអំឡុងឆ្នាំ២០២១ ម្តងរួចមកហើយ ប៉ុន្តែនាងខ្ញុំមិនបោះបង់ចោលការសិក្សាទេសុខចិត្តតស៊ូរៀនសូត្របន្តនៅសាលឯកជនមកប្រឡងសារជាថ្មី ក្រែងបានជាប់ និងរកការងារធ្វើយកលុយមកចិញ្ចឹមកូនរបស់នាងខ្ញុំកុំឱ្យពិបាកដល់ឪពុកម្តាយ។
ស្ត្រីជាម្តាយបាននិយាយ នាងខ្ញុំ ឈ្មោះ ជ ស្រីង៉ា អាយុ៤២ឆ្នាំ មុខរបរលក់ដូរ បច្ចុប្បន្នរស់នៅភូមិអូរចាក់ស្រា ឃុំស្រយ៉ង ស្រុកគូលែន ខេត្តព្រះវិហារ បានរៀបរាប់ថា ដោយសារឃើញកូនពិបាកក្នុងការចូលរួមប្រឡងបាក់ឌុប ជាលើកទី២ ព្រោះកូនស្រីរបស់នាងខ្ញុំ គាត់មានកូនប្រុសម្នាក់ អាយុ១១ខែ ដែលពួកខ្ញុំបានសែនព្រេនឱ្យនៅក្នុងអំឡុងកូវីដ១៩ កំពុងបិទខ្ទប់ខ្លាំងបានរយៈពេល១ឆ្នាំ កូនស្រីរបស់នាងខ្ញុំកើតបានកូនប្រុសមួយមិនសូវមានលុយ ទិញទឹកដោះគោផងទើបកូនស្រីខ្ញុំ ក៏យកកូនបំបៅទឹកដោះជំនួសទឹកដោះគោវិញ ហើយអ្នកស្រីសម្រេចចិត្តមកតាមកូន ដើម្បីមើលចៅ។
អ្នកស្រីបន្តថា ពេលកូនស្រីប្រឡងមុខវិទ្យាណាមួយរួចហើយ តែងតែចេញមកក្រៅបន្ទប់ ដើម្បីយកចៅពីដៃទៅឱ្យបំបៅជារៀងរាល់ដង ហើយចប់នៅម៉ោង១១ថ្ងៃឈប់សម្រាក ហូបបាយពួកខ្ញុំជិះម៉ូតូទៅ ហូបបាយនៅខាងក្រៅ និងទៅសម្រាកផ្ទះបងប្អូនក្នុងក្រុងសៀមរាបនេះ៕
ចែករំលែកព័តមាននេះ