ខេត្តកំពង់ចាម ៖ លំនៅឋាន១ខ្នងមានទំហំ៥គុណ៩ម៉ែត្រ ធ្វើអំពីឈើប្រក់ស័ង្កសីស្ថិតនៅភូមិចុងថ្នល់ទី២ សង្កាត់បឹងកុក ក្រុងកំពង់ចាម ត្រូវបានអគ្គីភ័យលេបត្របាក់អស់ ដោយឆាបឆេះសន្ធោសន្ធៅនៅវេលាម៉ោង១២និង១០នាទីថ្ងៃត្រង់ ថ្ងៃទី២៤ ខែឧសភា ឆ្នាំ២០១៧ ។ ហើយត្រូវបានរថយន្តពន្លត់អគ្គីភ័យរបស់ស្នងការដ្ឋាននគរបាលខេត្ត ចេញទៅអន្តរាគមន៏បាញ់ទឹកពន្លត់ ។ ដោយកិច្ចអន្តរាគមន៏នោះ មិនបានធ្វើឲ្យភ្លើងឆេះរាលដាលទៅផ្ទះ របស់ប្រជាពលរដ្ឋផ្សេងទេ ។
លោកវរសេនីយ៏ឯក យ៉ន ឌីន ប្រធានការិយាល័យពន្លត់អគ្គីភ័យខេត្តប្រាប់ឲ្យដឹងថា ក្រោយពីទទួលបានពីសេចក្តីរាយការណ៍នៅមូលដ្ឋានខាងលើថា មានគ្រោះអគ្គីភ័យកើតឡើងនោះ រូបលោកបានដឹកនាំកម្លាំងចេញរថយន្តពន្លត់អគ្គីភ័យចំនួន២គ្រឿងទៅកាន់ទីនោះជាបន្ទាន់ ដោយបានបាញ់ទឹកនៅលើផ្ទះដែលកំពុងតែឆេះនោះ សមត្ថកិច្ចមានផលវិបាកដោយសារតែម្ចាស់ ចាក់សោរចោលហើយចេញទៅធ្វើការបាត់មិនមានអ្នកណានៅផ្ទះនោះទេ ។ លោកវរសេនីយ៏ឯក យ៉ន ឌីន ប្រធានការិយល័យពន្លត់អគ្គីភ័យខេត្តប្រាប់បន្តថា ក្នុងពេលដែលភ្លើងកំពុងតែឆេះនោះមានផ្ទះរបស់ប្រជាពលរដ្ឋ១ខ្នងដែលនៅក្បែរ បាននាំគ្នាធាក់ជញ្ជាំងផ្ទះទំលាក់ចេញដើម្បីការពារកុំឲ្យភ្លើងឆេះរាលដាល់ទៅដល់នោះ ។ កម្លាំងអគ្គីភ័យខេត្តបានបាញ់ទឹកនៅលើផ្ទះដែលឆេះនោះប្រើប្រាស់អស់ទឹកចំនួន២រថយន្ត ដោយបានរលត់នៅសល់តែជើងតាងសសរផ្ទះ ចំពោះសម្ភារនៅលើផ្ទះត្រូវបានឆេះខ្ទេចអស់តែម្តង ហើយមូលហេតុដែលបង្កឲ្យមានអគ្គីភ័យនេះដោយសារតែទុស្សេខ្សែភ្លើង ម្ចាស់ផ្ទះបានចាក់សោរផ្ទះចោលចេញទៅធ្វើការបាត់ ។ ក្រោយពីទទួលបានដំណឹងថាផ្ទះរបស់ខ្លួនឆេះនោះម្ចាស់ផ្ទះបានត្រឡប់មកដល់ ឃើញផ្ទះរបស់ខ្លះត្រូវបានភ្លើងឆេះអស់ក៏បានយំទួញសោកស្តាយស្រណោះរបស់របរត្រូវបានឆេះខ្ទេចអស់ ។
សូមបញ្ជាក់ថាផ្ទះដែលឆេះនេះមានម្ចាស់ឈ្មោះ កឹម កុក ភេទប្រុស អាយុ៤៤ឆ្នាំ បាត់បង់មានប្លង់ដីអត្តសញ្ញាណប័ណ្ណ២ លុយ២០០ដុល្លារ ហើយសម្ភារនៅក្នុងផ្ទះត្រូវបានឆេះអស់ទាំងស្រុងតែម្តង ៕
ចែករំលែកព័តមាននេះ