បុរសម្នាក់កំពុងតែជិះម៉ូតូសណ្តោងរ៉ឺម៉កទៅទិញផ្លែពោតអោយម៉ូយ ស្រាប់តែត្រូវជនសង្ស័យមួយក្រុមធ្វើសកម្មភាពឆក់កាបូបស្ពាយដែលមានលុយជាង១លានរៀលយកទៅបាត់បង្កឱ្យមានការភ្ញាក់ផ្អើល
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់កំពុងតែជិះម៉ូតូសណ្តោងរ៉ឺម៉កទៅទិញផ្លែពោតអោយម៉ូយ ស្រាប់តែត្រូវជនសង្ស័យមួយក្រុមធ្វើសកម្មភាពឆក់កាបូបស្ពាយដែលមានលុយជាង១លានរៀលយកទៅបាត់បង្កឱ្យមានការភ្ញាក់ផ្អើលកាលពីវេលាម៉ោង១១និង៥០នាទីយប់ ថ្ងៃទី២៩ ខែវិច្ឆិកា ឆ្នាំ២០២២ នៅចំណុចជិតផ្សារស្ទឹងមានជ័យ ផ្លូវ២១៧ ស្ថិតក្នុងសង្កាត់ស្ទឹងមានជ័យទី២ ខណ្ឌមានជ័យ។
សេចក្តីរាយការណ៍បន្តថា ជនរងគ្រោះខាងលើមានឈ្មោះ អឿន ចានធៀប ភេទប្រុស អាយុ៣០ឆ្នាំ មុខរបររត់រ៉ឺម៉កម៉ូតូ ស្នាក់នៅម្តុំផ្សារដើមគ សង្កាត់ផ្សាដើមគ ខណ្ឌទួលគោក ចំណែកសម្ភារៈដែលបាត់បង់ក្នុងកាបូប រួមមានលុយខ្មែរជាង១លានរៀល និងអត្តសញ្ញាណប័ណ្ឌសញ្ជាតិខ្មែរចំនួន១សន្លឹកផងដែរ។
តាមការរៀបរាប់របស់ជនរងគ្រោះ បានអោយដឹងថា មុនពេលកើតហេតុ រូបគាត់បានជិះម៉ូតូសណ្តោងរ៉ឺម៉កចេញពីម្តុំជំពូវ័ន្ត ខណ្ឌពោធិ៍សែនជ័យ ក្នុងគោលបំណងទៅទិញផ្លែពោតយកអោយម៉ូយនៅម្តុំផ្សារដើមគ ដោយធ្វើដំណើរតាមបណ្ដោយផ្លូវ២១៧ ក្នុងទិសដៅពីលិចទៅកើត លុះមកដល់ចំណុចកើតហេតុ ក៏ស្រាប់តែលេចមុខជនសង្ស័យមួយក្រុមមានគ្នា៤នាក់ បានជិះម៉ូតូ២គ្រឿងម៉ាកហុងដាឌ្រីម មិនចាំស្លាកលេខ បានមកធ្វើសកម្មភាពឆក់យកកាបូបស្ពាយរបស់គាត់ បណ្ដាលឲ្យខ្សែកាបូបទាក់ជាមួយនឹងដៃចង្កូតម៉ូតូសណ្តោងរ៉ឺម៉កធ្វើឱ្យក្រឡាប់ផ្ងារជើងមួយចំហៀង និងបត់ក្បាលម៉ូតូត្រឡប់ក្រោយវិញ ថែមទាំងធ្វើឲ្យរូបគាត់រងរបួសស្រាល និងម៉ូតូរងការខូចខាតផងដែរ។
ប្រភពដដែលបានបន្តទៀតថា បន្ទាប់ពីជនសង្ស័យធ្វើសកម្មភាពឆក់កាបូបបានសំរេចហើយ ជនសង្ស័យក៏បានបន្ថែមល្បឿនម៉ូតូ ដោយបានយកកាបូបស្ពាយដែលមានលុយជាង១លានរៀល យកទៅបាត់ដោយសុវត្ថិភាពតែម្តងទៅ។
ក្រោយពេលកើតហេតុ រូបគាត់ត្រូវបានបងប្អូនប្រជាពលរដ្ឋជួយជូនទៅប៉ុស្តិ៍នគរបាលរដ្ឋបាលស្ទឹងមានជ័យទី២ ដើម្បីអោយសមត្ថកិច្ចជួយស្រាវជ្រាវរកជនសង្ស័យមកចាត់ការតាមនីតិវិធី និងយករបស់ទ្រព្យគាត់មកវិញផងដែរ៕
ចែករំលែកព័តមាននេះ