វៀតណាមរំពឹងថា ការនាំចេញអាហារសមុទ្រនឹងកើនដល់១១ពាន់លានដុល្លារជាលើកដំបូង នៅដំណាច់ឆ្នាំនេះ
វៀតណាម ៖ យោងតាមសមាគមអ្នកនាំចេញ និងផលិតអាហារសមុទ្ររបស់ប្រទេសវៀតណាម
វៀតណាម ៖ យោងតាមសមាគមអ្នកនាំចេញ និងផលិតអាហារសមុទ្ររបស់ប្រទេសវៀតណាម
វៀតណាម ៖ យោងតាមសមាគមអ្នកនាំចេញ និងផលិតអាហារសមុទ្ររបស់ប្រទេសវៀតណាម (VASEP) បានឱ្យដឹងថា ការនាំចេញអាហារសមុទ្ររបស់វៀតណាមនៅឆ្នាំនេះ អាចឈានដល់ចំនួន ១១ពាន់លានដុល្លារអាមេរិកជាលើកដំបូង ខណៈដែលបង្គា និងត្រីធូណា ឈានមុខគេសម្រាប់ការនាំចេញ។
លោក Truong Dinh Hoe អគ្គលេខាធិការនៃសមាគមអ្នកនាំចេញ និងផលិតអាហារសមុទ្រវៀតណាម បានថ្លែងក្នុងសន្និសីទសារព័ត៌មាន ធ្វើឡើងនៅទីក្រុងហូជីមិញ កាលពីពេលថ្មីៗកន្លងទៅ ថា គិតត្រឹមខែវិច្ឆិកា ការនាំចេញអាហារសមុទ្របានឈានដល់ចំនួន ១០ពាន់លានដុល្លាររួចទៅហើយ ដូច្នេះនៅដំណាច់ឆ្នាំនេះ វាអាចកើនដល់ ១១ពាន់លានដុល្លារជាលើកដំបូង ដែលមិនធ្លាប់មានពីមុនមក។
ទីផ្សារនាំចេញអាហារសមុទ្រធំជាងគេរបស់វៀតណាម គឺ សហរដ្ឋអាមេរិក ជប៉ុន ចិន និងសហភាពអឺរ៉ុប។ សហភាពអឺរ៉ុប សហរដ្ឋអាមេរិក និងចិន មានចំណែករហូតដល់ ៦០% នៃពាណិជ្ជកម្មគ្រឿងសមុទ្រពិភពលោក ក៏ដូចជា ៥០% នៃចំណូលនាំចេញរបស់វៀតណាម ក្នុងរយៈពេល ១០ខែដំបូងនៃឆ្នាំនេះ។
លោក Hoe បានបន្តទៀតថា គ្រប់វិស័យទាំងអស់នៃឧស្សាហកម្មអាហារសមុទ្របានកើនឡើងពី ១៨-៧៧% ប៉ុន្តែការនាំចេញកំពុងចាប់ផ្តើមធ្លាក់ចុះ ចំពេលមានការទិញទាប ការប្រាក់ខ្ពស់ និងអត្រាប្តូរប្រាក់ប្រែប្រួល។
លោកបានបន្ថែមថា នៅពេលពិភពលោកធ្លាក់ចូលក្នុងវិបត្តិសេដ្ឋកិច្ច និងអតិផរណាកើនឡើង តម្រូវការក៏កំពុងធ្លាក់ចុះនៅទូទាំងពិភពលោក។ ដូច្នេះហើយ ឧស្សាហកម្មគ្រឿងសមុទ្ររបស់វៀតណាម នឹងប្រឈមមុខជាមួយការប្រកួតប្រជែងដ៏ស្វិតស្វាញពីដៃគូប្រកួតប្រជែងដែលផ្តល់តម្លៃទាប ដូចជាប្រទេសអេក្វាឌ័រ ឬឥណ្ឌាជាដើម។
ដោយឡែក សេដ្ឋវិទូ លោក Dinh The Hien បាននិយាយថា សេដ្ឋកិច្ចពិភពលោកនឹងកាន់តែអាក្រក់នៅឆ្នាំ២០២៣ ដែលប៉ះពាល់ដោយផ្ទាល់ដល់ឧស្សាហកម្មអាហារសមុទ្រ ប៉ុន្តែទោះជាយ៉ាងណាក៏ដោយ អាជីវកម្មមិនគួរទុទិដ្ឋិនិយមខ្លាំងពេកនោះទេ ព្រោះពួកគេគួរតែស្វែងរកឱកាសថ្មីៗ ដើម្បីការរីកចម្រើន។ (ដកស្រង់ចេញពី Vn Express)
ចែករំលែកព័តមាននេះ