ខេត្តបាត់ដំបង ៖ រថយន្តពាក់ផ្លាកលេខព្រឹទ្ធសភាកម្ពុជាមួយគ្រឿង សង្ស័យផ្លាកលេខក្លែងក្លាយ ត្រូវបានឆ្មាំព្រំដែននៃភាគីថៃ ចាប់កាលពីព្រឹកថ្ងៃទី១៨ ឧសភា ខណៈពេលបើកឆ្លងដែនចូលក្នុងប្រទេសថៃ តាមច្រកទ្វារអន្តរជាតិដូង ក្នុងស្រុកកំរៀង ។ ប្រភពមន្ត្រី
ខេត្តបាត់ដំបង ៖ រថយន្តពាក់ផ្លាកលេខព្រឹទ្ធសភាកម្ពុជាមួយគ្រឿង សង្ស័យផ្លាកលេខក្លែងក្លាយ ត្រូវបានឆ្មាំព្រំដែននៃភាគីថៃ ចាប់កាលពីព្រឹកថ្ងៃទី១៨ ឧសភា ខណៈពេលបើកឆ្លងដែនចូលក្នុងប្រទេសថៃ តាមច្រកទ្វារអន្តរជាតិដូង ក្នុងស្រុកកំរៀង ។ ប្រភពមន្ត្រីច្រកទ្វារព្រំដែនអន្តរជាតិដូង ដែលភាគីថៃ ហៅ ច្រកឡែមនោះ បានឲ្យដឹងថា រថយន្តនោះម៉ាក FORTUNER ពណ៌ស្ករចង្កូតស្ដាំ ពាក់ផ្លាកលេខព្រឹទ្ធសភា3 2-033 តែគេនៅមិនទាន់ស្គាល់ឈ្មោះ អ្នកបើកបរនៅឡើយទេ ។
ប្រភពដដែលបានបន្តថា រថយន្តពាក់ផ្លាកលេខព្រឹទ្ធសភារបស់កម្ពុជានេះ ធ្វើដំណើរមកពីខេត្តប៉ៃលិន ហើយបានសុំបើកចូលក្នុងប្រទេសថៃ តាមច្រកអន្តរជាតិដូង ស្រុកកំរៀង ។ ប៉ុន្តែគេមិនច្បាស់ថា អ្នកបើករថយន្តនេះចូលដីថៃក្នុងបំណងអ្វីទេ លុះចូលដល់ក្នុងទឹកដីថៃ ក៏ត្រូវសមត្ថកិច្ចថៃសួរនាំ ហើយឃាត់មិនឲ្យបើកចេញមកដីខ្មែរវិញទេ ។ ប៉ុន្តែបើតាមមន្ត្រីព្រំដែនខ្មែរដែលបានទំនាក់ទំនងសួរទៅភាគីថៃ បានប្រាប់ថា រថយន្តចង្កូតស្ដាំដែលត្រូវសមត្ថកិច្ចថៃចាប់នេះ គឺដោយសារជាប់ពាក់ព័ន្ធនឹងបណ្ដឹងរបស់ក្រុមហ៊ុនលក់រថយន្តនៅប្រទេសថៃ ។
មន្ត្រីដដែលនិយាយថា ដំបូងរថយន្តនេះត្រូវម្ចាស់ដើមដែលជាជនជាតិថៃ បានទិញបង់រំលស់ពីក្រុមហ៊ុននៅប្រទេសថៃ ហើយមិនទាន់បង់លុយគ្រប់ចំនួនផង ស្រាប់តែម្ចាស់បានលួចលក់រថយន្តនេះមកឲ្យខ្មែរ ទើបខាងក្រុមហ៊ុនគេដាក់ពាក្យបណ្ដឹងឲ្យតាមបណ្ដាច្រកទ្វារព្រំដែននានាជួយអន្តរាគមន៍ ។ លុះឃើញរថយន្តនេះបើកឆ្លងចូលដីថៃ ហើយផ្ទៀងផ្ទាត់លេខម៉ាស៊ីន លេខតួស៊ីសង្វាក់គ្នានឹងពាក្យបណ្ដឹង ទើបសមត្ថកិច្ចថៃ ចាប់ឃាត់ទាំងរថយន្តទាំងអ្នកបើកបរតែម្ដងទៅ ។ ពាក់ព័ន្ធនិងករណីភាគីថៃចាប់រថយន្តពាក់ផ្លាកលេខព្រឹទ្ធសភាខ្មែរខាងលើនេះ កោះសន្តិភាពបានព្យាយាមទំនាក់ទំនងទៅលោក ហម សំខាន់ ប្រធានច្រកទ្វារអន្តរជាតិដូង ស្រុកកំរៀង នៅព្រឹកថ្ងៃទី១៩ ឧសភា តែមិនអាចសុំការបំភ្លឺបានឡើយ ដោយសារលោកមិនលើកទូរស័ព្ទ ។
ប៉ុន្តែលោក គឹម ពន្លក អធិការស្រុកកំរៀង បានប្រាប់ឲ្យដឹងដែរថា ពិតជាមានការឃាត់រថយន្តខ្មែរពីសំណាក់ភាគីថៃមែន ។ លោកបានបញ្ជាក់ថា លោកមិនបានដឹងលំអិតទេ អំពីបញ្ហានេះ តែលោកថា បន្ទាប់ពីភាគីថៃឃាត់រថយន្តខ្មែរ កាលពីថ្ងៃទី១៨ ឧសភា ភាគីថៃបានឃាត់ទាំងមនុស្សទាំងរថយន្ត តែនៅព្រឹកថ្ងៃទី១៩ឧសភា ភាគីថៃបានដោះលេងអ្នកបើកបររថយន្តឲ្យត្រឡប់មកវិញហើយ ។ រីឯរថយន្ត ភាគីថៃនៅតែឃាត់ទុកនៅឡើយ ព្រោះភាគីថៃអះអាងថា មានជាប់ពាក់ព័ន្ធនឹងបទល្មើសដែលប្រព្រឹត្តនៅប្រទេសថៃប្រៀបដូចសុខៗ រត់រកម្ចាស់ដើមវិញ ។
គួរកត់សម្គាល់ផងដែរថា រយៈពេលមួយឆ្នាំចុងក្រោយនេះ គេសង្កេតឃើញមានរថយន្តចង្កូតស្ដាំស៊េរីទំនើបៗ ដែលឈ្មួញលួចនាំចូលពីប្រទេសថៃ មិនស្របច្បាប់ កំពុងធ្វើចរាចរណ៍យ៉ាងគគ្រឹកគគ្រែងលើដងផ្លូវក្នុងខេត្តបាត់ដំបង ។ គេសង្ស័យថា ការលួចនាំចូលរថយន្តចង្កូតស្ដាំពីប្រទេសថៃយ៉ាងគគ្រឺកគគ្រែងបែបនេះ អាចមានការឃុបឃិតគ្នាពីស្ថាប័នជំនាញ ។ ជាពិសេសសា្ថប័នគយ និងរដ្ឋាករតាមច្រកទ្វារព្រំដែនតែម្ដង ។
បើតាមប្រភពព័ត៌មានបានឲ្យដឹងថា បច្ចុប្បន្នមានរថយន្តចង្កូតស្ដាំជាច្រើន កំពុងធ្វើចរាចរណ៍ពាសពេញខេត្តបាត់ដំបង ដែលរថយន្តខ្លះបានបង់ពន្ធ និងពាក់ផ្លាកលេខត្រឹមត្រូវ ។ រីឯរថយន្តខ្លះទៀតមិនបង់ពន្ធ ហើយពាក់ផ្លាកលេខក្លែងបន្លំទៀតផង ។ ដោយឡែកមន្ត្រីគយវិញបានដឹងអំពីរថយន្តចង្កូតស្ដាំដែលលួចនាំចូលមិនបង់ពន្ធ ហើយពាក់ផ្លាកលេខក្លែងបន្លំ តែមិនហ៊ានចាប់ទេ ព្រោះជារថយន្តបក្សពួកខ្លួន ឬជាមន្ត្រីមានអំណាច ម្លោះហើយនាំគ្នាបិតភ្នែកដើរហូសទៅ ព្រោះគ្មានអ្នកណាយកដៃបាំងមេឃបានទេ ។ មិនហ៊ានប៉ះពាល់ទេ សុំតែសុខប៉ុណ្ណោះ ៕
ចែករំលែកព័តមាននេះ