យើងរស់នៅក្នុងយុគសម័យមានព័ត៌មានផ្សេងៗនៅក្បែរខ្លួន ។ ព័ត៌មានល្អជួយណែនាំឱ្យយើងទទួលបានភាពជោគជ័យតាមគោលដៅកំណត់ទុក ។ ផ្ទុយទៅវិញ ការចូលទៅកាន់ព័ត៌មានដោយងាយពេក ពេលខ្លះ
យើងរស់នៅក្នុងយុគសម័យមានព័ត៌មានផ្សេងៗនៅក្បែរខ្លួន ។ ព័ត៌មានល្អជួយណែនាំឱ្យយើងទទួលបានភាពជោគជ័យតាមគោលដៅកំណត់ទុក ។ ផ្ទុយទៅវិញ ការចូលទៅកាន់ព័ត៌មានដោយងាយពេក ពេលខ្លះក៏រំខានផងដែរ នៅពេលយើងផ្តោតអារម្មណ៍ទៅលើការងារ ។
ការធ្វើការងារតាមគោលដៅ និងការផ្លាស់ប្តូរថ្មីៗ គឺជារឿងលំបាកមួយ ព្រោះវាអាស្រ័យលើការបំផុសគំនិតជាបន្តបន្ទាប់ និងច្រើនផងដែរ ដើម្បីជួយជំរុញឱ្យយើងទៅដល់គោលដៅនោះ ។ ដូច្នេះ ការទាញចិត្ត និងបំផុសគំនិតជាប្រចាំ វាជារឿងសំខាន់ណាស់ ។ ៧វិធីនេះអាចជួយដល់ការបំពេញការងារប្រកបដោយប្រសិទ្ធភាព ។
១-កំណត់គោលដៅច្បាស់លាស់ ៖
ដើម្បីទទួលបានជោគជ័យ ត្រូវផ្តើមចេញពីផែនការការងារមួយច្បាស់លាស់ ហើយផែនការនឹងកើតឡើងបាន គឺត្រូវកំណត់គោលដៅទុក។ គោលដៅ គឺជាហេតុផលដែលអ្នកដើរតាមផ្លូវមួយ និងត្រូវការពេលវេលាជាក់លាក់ផងដែរ ។ អ្នកអាចកត់ត្រាក្នុងទូរស័ព្ទ កុំព្យូទ័រ សៀវភៅ ឬអ្វីផ្សេងៗ ។ ការបំពេញការងារជោគជ័យ លុះត្រាតែដឹងថា ត្រូវការអ្វីខ្លះ ហើយគោលដៅដែលកំណត់ទុកអាចជួយនាំអ្នកទៅដល់ចំណុចនោះយ៉ាងដូចម្តេច ។
២-សរសេរផែនការទុកមុនចូលសម្រាក ៖
បន្ទាប់ពីកំណត់គោលដៅច្បាស់លាស់ហើយ ការបែងចែកផែនការផ្សេងៗឱ្យជាក់លាក់ ក៏ជារឿងសំខាន់ដូចគ្នា ។ អ្នកគួរប្រើពេលវេលាខ្លះមុនចូលសម្រាកដើម្បីធ្វើផែនការសម្រាប់ថ្ងៃស្អែក ដោយរៀបតាមលំដាប់ភាពសំខាន់នៃការងារទាំងនោះ និងផែនការបម្រុងដើម្បីធ្វើបានគ្រប់ចំណុចទៅតាមគោលដៅ ។
៣-សម្រាកគ្រប់គ្រាន់ ៖
មូលហេតុធំមួយទៀតដែលធ្វើឱ្យអ្នកខ្វះការបំផុសគំនិត គឺការសម្រាកមិនគ្រប់គ្រាន់។ ពេលវេលាសម្រាក គឺខុសគ្នាពីមនុស្សម្នាក់ទៅមនុស្សម្នាក់ ។ អ្នកអាចសង្កេតមើលថា រាងកាយត្រូវការសម្រាកប៉ុន្មានម៉ោង ឬសម្រាកនៅពេលណា ដែលធ្វើឱ្យអ្នកភ្ញាក់ឡើងមានភាពស្រស់ស្រាយ និងមានប្រសិទ្ធភាពក្នុងការបំពេញការងារ ។ ការសម្រាកចាត់ទុកថា មានសារសំខាន់ខ្លាំងណាស់ មិនចាញ់គោលដៅឡើយ។ បើចង់ទទួលបានជោគជ័យតាមគម្រោង អ្នកត្រូវមានពេលវេលាសម្រាកឱ្យបានគ្រប់គ្រាន់ ។
៤-មានពេលវេលាសម្រាប់ខ្លួនឯងនៅពេលព្រឹក ៖
ទោះបីជាបច្ចេកវិទ្យាមានតួនាទីជួយយើងឱ្យមានគំនិតច្នៃប្រឌិត និងជោគជ័យក្នុងជីវិតយ៉ាងអស្ចារ្យក្តី ប៉ុន្តែពេលខ្លះក៏ត្រូវកំណត់វាផងដែរ។ ពេលព្រឹក អ្នកគួរតែនៅឱ្យឆ្ងាយពីឧបករណ៍បច្ចេកវិទ្យាទាំងនោះ និងចំណាយពេលបន្តិចដើម្បីប្រមូលអារម្មណ៍ ដោយអង្គុយសមាធិ ឬក៏បិទភ្នែកឱ្យខួរក្បាលស្រឡះពីរឿងរ៉ាវស្មុគស្មាញ និងអាចបំពេញការងារបានល្អផងដែរ ។
៥-ចៀសវាងរឿងរំខានផ្លូវចិត្ត ៖
ក្រៅពីបច្ចេកវិទ្យា និងអុីនធើរណេតហើយ ការផ្តោតអារម្មណ៍លើការងារ អ្នកត្រូវតែចៀសវាងរឿងណាដែលរំខានផ្លូវចិត្ត ដូចជា ចៀសវាងបុគ្គលគិតក្នុងផ្លូវអវិជ្ជមាន ព្រោះពាក្យសម្តី ឬការប្រព្រឹត្តរបស់ពួកគេអាចនឹងប៉ះពាល់ដល់ទំនុកចិត្ត និងបំផ្លាញអារម្មណ៍របស់អ្នកផងដែរ ។ ដូច្នេះ អ្នកអាចនៅក្បែរៗមនុស្សផ្តល់កម្លាំងចិត្តវិញប្រសើរជាង ។
៦-រៀបចំតារាងពេលវេលាបំផុសគំនិត ៖
ការរៀបចំតារាងពេលវេលាក្នុងជីវិតប្រចាំថ្ងៃ អ្នកគួរទុកពេលណាមួយបំផុសគំនិត មិនថាការអានសៀវភៅល្អៗ អានបទសម្ភាសន៍ផ្សេងៗដើម្បីជំរុញកម្លាំងចិត្តដល់អ្នក ឬក៏មើលវីដេអូបង្ហាញពីទស្សនៈនានា និងគោលដៅថ្មីៗ។ ការបំផុសគំនិតរៀងរាល់ថ្ងៃបែបនេះ នឹងជួយអ្នកកាន់តែជឿជាក់លើខ្លួនឯងឡើង ។
៧-ដាស់តឿនជានិច្ចថា ពេលវេលាមានតម្លៃ ៖
មនុស្សគ្រប់រូបបានដឹងហើយថា ជីវិតគឺខ្លីសម្រាប់ពួកគេ ប៉ុន្តែជាញឹកញាប់ ពួកគេបែរជាចំណាយពេលវេលាដោយឥតប្រយោជន៍ទៅវិញ ។ ទោះជាយ៉ាងណា ប្រសិនជាអ្នកគិតថា ជីវិត និងពេលវេលាពិតជាមានតម្លៃ អ្នកនឹងមិនចង់ចំណាយពេលវេលាដោយខ្ជះខ្ជាយទៀតទេ ។ ដូច្នេះ ចូរដាស់តឿនខ្លួនឯងក្នុងហេតុផលដែលអ្នកចង់ទទួលបានជោគជ័យតាមគោលដៅកំណត់ជានិច្ច ។ វិធីល្អបំផុតក្នុងការសម្រេចគោលដៅ គឺការមានគោលដៅធំ និងគោលដៅជារៀងរាល់ថ្ងៃ ដែលនឹងជួយផ្តល់កម្លាំងចិត្ត ព្រមទាំងផ្តោតអារម្មណ៍លើការងារយ៉ាងមានប្រសិទ្ធភាព ។
នៅពេលយើងបានត្រៀមខ្លួនហើយ គួរតែផ្លាស់ប្តូរ និងតាំងចិត្តធ្វើតាមគោលដៅឱ្យសម្រេច ព្រោះអ្វីដែលមនុស្សភាគច្រើនគិតថាមិនអាចទៅរួច បើសិនជាអ្នកមានទំនុកចិត្ត និងសាកល្បងអនុវត្តតាមវិធីសាស្ត្រទាំងនេះ អ្នកនឹងទទួលជោគជ័យក្នុងការបំពេញការងារយ៉ាងពិតប្រាកដ ៕
ចែករំលែកព័តមាននេះ