តារាកំប្លែងស្រីដ៏ល្បីឈ្មោះ កញ្ញា ណាំ វ៉ា ដែលពុកម៉ែបងប្អូនធ្លាប់បានឃើញកញ្ញារួចមកហើយនៅតាមកញ្ជាក់ទូរទស្សន៍ ជាពិសេសការសម្តែងរឿងខ្លីៗ បានជួបប្រទះនូវរឿងស៊យផ្ទួនៗ ព្រោះក្នុងរយៈពេលជាង១ខែសោះ
រាជធានីភ្នំពេញ ៖ តារាកំប្លែងស្រីដ៏ល្បីឈ្មោះ កញ្ញា ណាំ វ៉ា ដែលពុកម៉ែបងប្អូនធ្លាប់បានឃើញកញ្ញារួចមកហើយនៅតាមកញ្ជាក់ទូរទស្សន៍ ជាពិសេសការសម្តែងរឿងខ្លីៗ បានជួបប្រទះនូវរឿងស៊យផ្ទួនៗ ព្រោះក្នុងរយៈពេលជាង១ខែសោះ ផ្ទះរបស់តារាស្រីរូបនេះត្រូវបានចោរគាស់ផ្ទះជាបន្តបន្ទាប់បង្កជាការភ្ញាក់ផ្អើល ជាពិសេសអ្នកគាំទ្ររបស់កញ្ញាក៏បានបង្ហាញនូវក្តីបារម្ភពីសុខទុក្ខរបស់នាងយ៉ាងខ្លាំង។
ថ្លែងប្រាប់អ្នកយកព័ត៌មាននៃសារព័ត៌មានកោះសន្តិភាព កញ្ញា ណាំ វ៉ា បានអោយដឹងថា កាលពីល្ងាចថ្ងៃទី២២ ខែវិច្ឆិកា កញ្ញាបានទៅញ៉ាំអីជាមួយមិត្តភក្តិ។ លុះត្រឡប់មកផ្ទះវិញនៅម៉ោង៦និង៣០នាទីយប់ តារាសម្តែងស្រីរូបនេះឃើញសភាពផ្ទះរបស់នាង មានភាពរញ៉េរញ៉ៃខុសប្លែកពីធម្មតា លុះដល់ពេលទៅពិនិត្យអោយច្បាស់ទើបដឹងថា ចោរបានគាស់ផ្ទះរបស់កញ្ញា និងបានបង្កជាការភ្ញាក់ផ្អើលជាខ្លាំង។
តារាកំប្លែងស្រីរូបនេះ បានអោយដឹងបន្ថែមថា ហេតុការណ៍ចោរគាស់ផ្ទះនេះ គឺកញ្ញាបានបាត់ ចិញ្ចៀនផ្លាកទីនមួយវង់ ដែលមានតម្លៃប្រមាណជា ២០០ដុល្លារជាង, នាឡិកាដៃតម្លៃ ១៧៧០ដុល្លារ និងរបស់របរមួយចំនួនទៀត ដោយគិតសរុបទៅប្រមាណជា ២០០០ដុល្លារ។ ហើយរហូតមកដល់ពេលនេះ កញ្ញាមិនទាន់រកឃើញជនមួយណាដែលជាប់ពាក់ព័ន្ធ ឬដាក់ការសង្ស័យទៅលើនរណាម្នាក់ឡើយ។
តារាកំប្លែងស្រីដែលមានរូបសម្រស់ស្រស់សោភារូបនេះ បានបញ្ជាក់បន្ថែមថា កញ្ញាបានជួបហេតុការណ៍ ក្រុមចោរគាស់ផ្ទះរបស់នាងស្ថិតនៅសង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ ចំនួន២ដងរួចមកហើយ។ កញ្ញាបានបន្តថា ផ្ទះរបស់កញ្ញា ពុំបានបំពាក់កាំមេរ៉ាសុវត្ថិភាពនោះទេ ដូច្នេះកញ្ញា ហើយនឹងសមត្ថកិច្ចពិបាកតាមដានបន្តិចក្នុងការស្វែងរកភិនភាគចោរ ក៏ដូចជាការតាមរកសម្ភារៈដែលបានបាត់បង់នោះ។
ជាការពិតណាស់ កញ្ញា សន ស្រីលីន ហៅ ណាំវ៉ា ដែលកញ្ញាធ្លាប់មានជីវិតកម្សត់ និងជួបបញ្ហាមិនចេះចប់មិនចេះហើយ ដោយកាលពីឆ្នាំ២០១៥ តារាស្រីរូបនេះត្រូវចោរប្លន់ ឆ្នាំ២០១៧ កញ្ញាជួបគ្រោះថ្នាក់ចរាចរណ៍ នៅឆ្នាំ២០១៨ ត្រូវគេបោ.កយកឡាន និងនៅឆ្នាំ២០២២នេះ ត្រូវចោរគាស់ផ្ទះរហូតដល់ទៅ២ដង។
ទាក់ទងជាមួយនឹងរឿងរ៉ាវទាំងអស់នេះ កញ្ញាមានការសោកស្តាយជាខ្លាំង ព្រោះទ្រព្យសម្បត្តិដែលខំរកបានហើយ បែរជាត្រូវបានបាត់បង់ដោយសាររឿងបែបនេះ។ ហើយជុំវិញរឿងរ៉ាវដ៏អាក្រក់នេះ កញ្ញាពិតជាពិបាកក្នុងការទទួលយកណាស់ ដោយជួបបញ្ហាមិនចេះចប់មិនចេះហើយដូច្នេះ។ ជាចុងក្រោយ កញ្ញា ណាំវ៉ា មិនសុំអ្វីច្រើននោះទេ គ្រាន់តែសំណូមពរដល់សមត្ថកិច្ចជួយចាប់ជនល្មើសមកផ្តន្ទាទោសតាមច្បាប់៕
ចែករំលែកព័តមាននេះ