ការធ្វើដំណើរកម្សាន្តនៅក្រៅប្រទេស ការផ្លាស់ប្តូរការងារទៅតាមខេត្ត ឬមូលហេតុផ្សេងៗទៀត ដែលត្រូវចាកចេញពីខុនដូដ៏សែនស្រឡាញ់ក្នុងរយៈពេលយូរ ពេលខ្លះអ្នកមិនព្រួយបារម្ភមិនបានថា
ការធ្វើដំណើរកម្សាន្តនៅក្រៅប្រទេស ការផ្លាស់ប្តូរការងារទៅតាមខេត្ត ឬមូលហេតុផ្សេងៗទៀត ដែលត្រូវចាកចេញពីខុនដូដ៏សែនស្រឡាញ់ក្នុងរយៈពេលយូរ ពេលខ្លះអ្នកមិនព្រួយបារម្ភមិនបានថា ពេលដែលមិននៅ នឹងមានអ្វីកើតឡើងខ្លះ ហើយគ្រប់យ៉ាងនឹងដូចដើមឬទេពេលត្រឡប់មកវិញ ។
យើងគួរត្រៀមខ្លួន ខណៈពេលបិទខុនដូរយៈពេលយូរ ឬចាប់ពី៣ថ្ងៃឡើងទៅ ។
១-ដកចេញនូវតំណចរន្តអគ្គិសនីមិនប្រើប្រាស់ក្នុងបន្ទប់ ៖
ទុកតែចរន្តណាដែលចាំបាច់ប៉ុណ្ណោះ ដូចជាទូទឹកកក ព្រោះពេលដែលយើងដោតចរន្ត នឹងធ្វើឱ្យខ្សែភ្លើងរត់ឆ្លងកាត់ក្នុងឧបករណ៍អគ្គិសនីគ្រប់ពេល ដែលអាចធ្វើឱ្យវាខូចយ៉ាងឆាប់រហ័ស។ លើសពីនេះ វានឹងឡើងកម្តៅហើយបណ្តាលឱ្យមានភ្លើងឆេះ បាន ។ ដូច្នេះ ការដកចេញនូវចរន្តភ្លើង និងឧបករណ៍ដែលខូចខាតនេះនឹងមិនរាលដាលដល់បន្ទប់របស់អ្នកទេ ។
២-បិទទ្វារ-បង្អួចឱ្យជិតគ្រប់ផ្នែក ៖
ការរស់នៅក្នុងខុនដូអាចធ្វើឱ្យមនុស្សជាច្រើនធ្វេសប្រហែស ព្រោះគិតថា មានទ្វារចូលចេញតែមួយប៉ុណ្ណោះ ទើបបើកទ្វារ ឬបង្អួចខ្លះ ឬមិនបានចាក់សោទ្វាររានហាល ។ ការធ្វើបែបនេះ គឺវាគ្រោះថ្នាក់បំផុត ព្រោះនឹងមានអ្នកលួចផ្លោះឡើងមកយ៉ាងស្រួល ។ នេះមិនរួមទាំងការខូចខាតពីភ្លៀងសាចចូលមកក្នុងបន្ទប់ផង ។ អ្នកគួរចំណាយពេលបន្តិចដើម្បីបិទទ្វាររានហាល ឬបង្អួចគ្រប់ផ្នែកឱ្យរៀបរយ ។
៣-ចាក់សោទ្វារមុខ ៖
បន្ទាប់ពីបានចាក់សោទ្វាររានហាល ឬបិទបង្អួចជិតរួចរាល់ហើយ អ្នកត្រូវចាក់សោទ្វារមុខឱ្យរៀបរយមុននឹងចាកចេញពីបន្ទប់ផងដែរ ជាពិសេស សម្រាប់អ្នកប្រើប្រាស់ឧបករណ៍បិទទ្វារ (Door Stopper) ។ ពេលខ្លះ យើងចេញពីបន្ទប់ហើយបណ្តោយឱ្យទ្វារបិទតាមក្រោយដោយប្រព័ន្ធស្វ័យប្រវត្តិ ត្រង់នេះគឺគ្រោះថ្នាក់ណាស់ ប្រសិនបើមានអ្វីនៅបាំងទ្វារ គឺធ្វើឱ្យទ្វារមិនមាំ ឬបិទមិនជិតដូចដើម ខណៈសោទ្វារមិនដំណើរការ ដែលវាជាឱកាសរបស់អ្នកមានបំណងអាក្រក់ចូលក្នុងបន្ទប់បានដោយងាយ ។ អ្នកអាចចំណាយពេលរង់ចាំ រហូតដល់ទុកចិត្តថា ទ្វារបានចាក់សោជិតរួចរាល់ហើយ ។
៤-ជូនដំណឹងដល់អ្នកគ្រប់គ្រងខុនដូ ៖
ប្រសិនបើយើងមិនបានរស់នៅក្នុងខុនដូលើសពី៣ថ្ងៃ គួរតែជូនដំណឹងដល់អ្នកគ្រប់គ្រងខុនដូឱ្យបានដឹងផងដែរ ដើម្បីរក្សាសុវត្ថិភាពផ្សេងៗ ហើយអ្នកក៏មិនបារម្ភថា ក្នុងអំឡុងពេលចាកចេញ អាចកើតបញ្ហាទឹកនឹងជ្រាប ឬបែកទុយោ ។ ចំណែកប្រព័ន្ធភ្លើង ទោះបីជាមិនបានផ្តាច់ភ្លើង ប៉ុន្តែអ្នកគ្រប់គ្រងនឹងពិនិត្យទៅលើភាពខុសប្រក្រតីផ្សេងៗដែលអាចកើតឡើងដូចជា មានភ្លើងឆេះ ឬផ្សែងភ្លើងចេញពីបន្ទប់ ពួកគេនឹងដឹងថា បន្ទប់នោះគ្មានមនុស្សរស់នៅ ហើយប្រញាប់ចាត់ការបន្ត ។
គ្រប់ពេលដែលអ្នកមិននៅក្នុងខុនដូរយៈពេលយូរថ្ងៃ គួរតែត្រៀមខ្លួនជាស្រេចសម្រាប់សុវត្ថិភាពផ្ទាល់ខ្លួន ក៏ដូចជាការពារទ្រព្យសម្បត្តិរួមផងដែរ ៕
ចែករំលែកព័តមាននេះ