ក្រោយពីសង្កេតឃើញកូនជ្រូកនៅក្នុងទ្រុងកើតជំងឺរាករូស ក្អួតចង្អោរ មិនស៊ីអាហារ ធ្វើឱ្យកសិករម្នាក់មានការព្រួយបារម្ភយ៉ាងខ្លាំង ហើយ
ខេត្តប៉ៃលិន ៖ រហូតមកដល់ថ្ងៃទី២២ ខែវិច្ឆិកា ឆ្នាំ២០២២នេះ ក្រោយពីសង្កេតឃើញកូនជ្រូកនៅក្នុងទ្រុងកើតជំងឺរាករូស ក្អួតចង្អោរ មិនស៊ីអាហារ ធ្វើឱ្យកសិករម្នាក់មានការព្រួយបារម្ភយ៉ាងខ្លាំង ហើយគាត់ក៏បានខិតខំប្រឹងប្រែងស្វះស្វែងរកថ្នាំសង្កូវ ដើម្បីដាក់ព្យាបាលកូនជ្រូករបស់ខ្លួនផងដែរ។ ហើយជ្រូកខ្លះក៏បានធូរស្បើយឡើងវិញ តែមួយចំនួនបានងា.ប់ជាបន្តបន្ទាប់ ធ្វើឱ្យគាត់មានការសោកស្តាយយ៉ាងខ្លាំ។
បើតាមស្ត្រីម្នាក់ដែលមានឈ្មោះ ច្រឹប អាយុ៤៥ឆ្នាំ រស់នៅភូមិតាង៉ែនក្រោម ឃុំស្ទឹងកាច់ ស្រុកសាលាក្រៅ ខេត្តប៉ៃលិន បានឱ្យដឹងថា គាត់បានចិញ្ចឹមជ្រូកមេជាង១០ក្បាល ដើម្បីបង្កើតកូនលក់ឱ្យប្រជាពលរដ្ឋនៅតាមភូមិទិញយកទៅចិញ្ចឹម ហើយរហូតមកដល់ពេលនេះ គាត់បានចិញ្ចឹមជ្រូកទាំងតូចទាំងធំប្រហែល១០០ក្បាល តែការលក់កូនជ្រូកក៏មានការធ្លាក់ថ្លៃផងដែរ ដោយកូនជ្រូក១ក្បាល លក់បានត្រឹម២០ម៉ឺនរៀល ពោលគឺតម្លៃទាបជាងពីមុន ហើយក៏មិនសូវមានអ្នកទិញយកទៅចិញ្ចឹមច្រើនដែរ ទើបគាត់ពង្រីកទ្រុងបន្ថែមទៀត ដើម្បីចិញ្ចឹមឱ្យកាន់តែច្រើន។
ស្ត្រីខាងលើបន្តថា តែអ្វីដែលគួរឱ្យព្រួយបារម្ភបំផុតនោះ គឺកូនជ្រូកតូចៗរបស់គាត់ដែលទើបនឹងបានរាករូស ក្អួតចង្អោរ ធ្វើឱ្យគាត់មានការភ័យបារម្ភយ៉ាងខ្លាំង ក៏បានខិតខំស្វះស្វែងរកថ្នាំសង្កូវឱ្យផឹក និងហៅពេទ្យសត្វឱ្យចូលទៅព្យាបាលក៏បានធូរស្បើយជាងមុន។ ទោះបីជាយ៉ាងណា អ្វីដែលគួរឱ្យបារម្ភជាងគេបំផុតនោះ គឺតម្លៃទីផ្សារសាច់ជ្រូករស់ ក៏មានការធ្លាក់ថ្លៃគួរឱ្យកត់សម្គាល់ផងដែរ។
ចំណែកស្ត្រីម្នាក់ទៀតដែលមានឈ្មោះ ចែអូន រស់នៅក្នុងភូមិតាង៉ែនលើ សង្កាត់ប៉ៃលិន ក្រុងប៉ៃលិន បានឱ្យដឹងដែរថា គាត់ចិញ្ចឹមមេជ្រូកសម្រាប់បង្កើតកូនជាង១០ក្បាលដែរ ក៏មានជ្រូកសាច់សម្រាប់លក់ជាង១០០ក្បាល ហើយកាលពីមុនកូនជ្រូករបស់គាត់ក៏ធ្លាប់មានបញ្ហារាករូស ក្អួតចង្អោរដែរ តែក្រោយពីលាងសម្អាតទ្រុង ដាក់ថ្នាំសម្លា.ប់មេរោគ ព្រមទាំងយកចិត្តទុកដាក់ថែទាំ មើលពីអាការ:រោគ ពេលនេះជ្រូករបស់គាត់មិនមានបញ្ហាអ្វីនោះទេ។
ស្ត្រីឈ្មោះ ចែអូន បន្តថា តែអ្វីដែលគាត់ចង់បាននោះ គឺសូមអំពាវនាវឱ្យសាច់ជ្រូករស់មានការឡើងថ្លៃជាងមុន ព្រោះចំណី ថ្នាំសង្កូវ គឺឡើងថ្លៃទាំងអស់។ ដូច្នេះបើសាច់ជ្រូករស់ ឈ្មួញទិញ១គីឡូក្រាមត្រឹមតែ៧២០០រៀលទៅ៧៣០០រៀល គឺមានការខាតបង់ខ្លាំងណាស់ តែបើឈ្មួញទិញ១គីឡូក្រាមចាប់ពី១២០០០រៀលឡើងទៅ គឺគាត់អាចនឹងចំណេញយកដើមទៅទិញចំណីឱ្យជ្រូកស៊ីបន្តទៀត នៅសល់មួយចំនួនទុកសម្រាប់ផ្គត់ផ្គង់ជីវភាពប្រចាំថ្ងៃ៕
ចែករំលែកព័តមាននេះ