ខេត្តបាត់ដំបង៖ ក្រុមចោរ«ឆក់»ចំនួន០៦នាក់ ដែលកម្លាំងការិយាល័យនគរបាលព្រហ្មទណ្ឌកំរិតស្រាលនៃស្នងការខេត្ត បង្ក្រាបបានព្រមៗគ្នាចំនួន០៤ករណី ត្រូវបានលោកស្នងការខេត្ត បញ្ជាឲ្យកសាងសំណុំរឿងបញ្ជូនពួកគេទៅកាន់សាលាដំបូងខេត្តហើយ នៅរសៀលថ្ងៃទី២២ វិច្ឆិកា ក្រោយមន្ត្រីជំនាញបញ្ជប់ការសួរនាំ។ ក្រុមចោរដៃស្អិតទាំង០៦នាក់នោះ…
ខេត្តបាត់ដំបង៖ ក្រុមចោរ«ឆក់»ចំនួន០៦នាក់ ដែលកម្លាំងការិយាល័យនគរបាលព្រហ្មទណ្ឌកំរិតស្រាលនៃស្នងការខេត្ត បង្ក្រាបបានព្រមៗគ្នាចំនួន០៤ករណី ត្រូវបានលោកស្នងការខេត្ត បញ្ជាឲ្យកសាងសំណុំរឿងបញ្ជូនពួកគេទៅកាន់សាលាដំបូងខេត្តហើយ នៅរសៀលថ្ងៃទី២២ វិច្ឆិកា ក្រោយមន្ត្រីជំនាញបញ្ជប់ការសួរនាំ។
ក្រុមចោរដៃស្អិតទាំង០៦នាក់នោះ រួមមាន៖ ១.ឈ្មោះ ខៀវ យ៉ា អាយុ៣៦ឆ្នាំ ២.ឈ្មោះឡង លាវ ហៅ តក់ អាយុ២០ឆ្នាំ ៣.ឈ្មោះសុខ វីរៈ អាយុ២៥ឆ្នាំ ៤.ឈ្មោះធឿន ថន អាយុ២៥ឆ្នាំ ជន០៤នាក់នេះ នៅភូមិគង់ទុំ ឃុំពាមឯក ស្រុកឯកភ្នំ ៥.ឈ្មោះប៊ិន ស៊ីណា ហៅ ឈុយ អាយុ២៦ឆ្នាំ ភូមិព្រែកឆ្ដោរ ឃុំពាមឯក ស្រុកឯកភ្នំ និង ៦.ឈ្មោះ ភឿន ផល្លី ហៅ បឹម អាយុ២៣ឆ្នាំ នៅភូមិតាកុយ សង្កាត់ក្ដុលដូនទាវ ក្រុងបាតដំបង។
នាយការិយាល័យនគរបាលព្រហ្មទណ្ឌកំរិតស្រាល លោក ឈឿង គឹមសុង បានឲ្យដឹងថា ជនសង្ស័យទាំង០៦នាក់នេះ ត្រូវបានកម្លាំងជំនាញរបស់លោកធ្វើការស្រាវជ្រាវបង្ក្រាបបានព្រមៗ ក្រោយពីពួកគេបានធ្វើសកម្មភាពដាច់ដោយឡែកៗពីគ្នាចំនួន០៤ករណីជាបន្តបន្ទាប់។ លោកឈឿង គឹមសុង បានបញ្ជាក់ថា ក្រុមនេះ បានធ្វើសកម្មភាព«ឆក់ទ្រព្យសម្បត្តិ»អ្នកដំណើរយ៉ាងកក្រើកនាពេលកន្លងមកនេះ។
ប៉ុន្តែក្រោយពីលោកស្នងការខេត្ត ដាក់ផែនការឲ្យកម្លាំងជំនាញរបស់លោកតាមស៊ើបអង្កេត ទើបឈានដល់ការបំបែកសំបុកពួកគេបាន តែនៅមានជនមួយក្រុមទៀតកំពុងគេចខ្លួននៅឡើយទេ ព្រោះពេលធ្វើសកម្មភាពបានសម្រេចជួបគ្រោះថ្នាក់ចរាចរណ៍រត់ចោលម៉ូតូ។ បើយោងតាមរបាយការណ៏ព្រឹត្តិហេតុរបស់ការិយាល័យព្រហ្មទណ្ឌកំរិតស្រាលបានឲ្យដឹងថា ក្រុមចោរដៃស្អិតទាំង០៦នាក់នេះ បានធ្វើសកម្មភាព«ឆក់» ចំនួន០៤ករណីដាច់ដោយឡែកពីគ្នា គឺ នៅរសៀលថ្ងៃទី ១៧ វិច្ឆិកា ឆក់កាបូប នៅចំណុចភូមិចំការសំរោង២ សង្កាត់ចំការសំរោង ក្រុងបាត់ដំបង នៅវេលារំលងអាធ្រាត្រឈានចូលថ្ងៃទី៣០តុលា ឆក់កាបូបជនបរទេសម្នាក់ នៅចំណុចភូមិរតនៈ សង្កាត់រតនៈ ក្រុងបាត់ដំបង នៅព្រឹកថ្ងៃទី ២៨ កញ្ញា ឆក់ទូរស័ព្ទ នៅចំណុចផ្សារព្រែកតាច្រែង ភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ដោយឡែកមួយករណីទៀត នៅយប់ថ្ងៃទី ១៣ វិច្ឆិកា ឆក់ទូរស័ព្ទ នៅភូមិបឹងរាំង សង្កាត់អូរម៉ាល់ ក្រុងបាត់ដំបង តែក្រុមចោររត់ចោលម៉ូតូ ដោយសារជួបគ្រោះថ្នាក់ចរាចរណ៏។
ជាមួយនឹងកិច្ចប្រតិបត្តិការនេះបំបែកសំបុកក្រុមចោរដៃស្អិតយ៉ាងកក្រើកក្រុងនេះ កម្លាំងសមត្ថកិច្ចឃាត់ខ្លួនជនដៃដល់បានចំនួន០៦នាក់ ដកហូតវត្ថុតាងបានមួយចំនួន និង ម៉ូតូ០២គ្រឿង ដែលក្រុមចោរជិះធ្វសកម្មភាពប្រព្រឹត្តអំពើរចោរកម្ម។ បើតាមសមត្ថកិច្ចបានឲ្យដឹងថា ក្រុមជនសង្ស័យបានសារភាពទទូលស្គាល់នូវទង្វើរបស់ពួកគេហើយ។
លោក ឈឿង គឹមសុង បាននិយាយថា ក្នុងចំណោមក្រុមជនសង្ស័យទាំង០៦នាក់ មានជនខ្លះធ្លាប់ជាប់គុកម្ដងហើយពីបទល្មើស«ឆក់»នេះ តែពួកគេមិនរាងចាលទេ ក្រោយចេញពីគុកប្រព្រឹត្តបទល្មើសដដែលទៀត។ ទោះយ៉ាងណា នៅរសៀលថ្ងៃទី ២២ វិច្ឆិកា នេះ លោកស្នងការបានបញ្ជាឲ្យបញ្ជូនពួកគេទៅកាន់សាលាដំបូងខេត្ត ចាត់ការតាមច្បាប់ហើយ៕
ចែករំលែកព័តមាននេះ