រាជធានីភ្នំពេញ ៖ គណបក្សកាន់អំណាចបានប្តេជ្ញារក្សាសន្តិសុខសណ្តាប់ធ្នាប់ឲ្យល្អ ដោយត្រៀមកម្លាំងការពាររាល់សភាពនានាកើតឡើងដូចការបោះឆ្នោតជ្រើសរើសអ្នកតំណាងរាស្ត្រឆ្នាំ២០១៣ កន្លងមក។ នេះបើតាម
រាជធានីភ្នំពេញ ៖ គណបក្សកាន់អំណាចបានប្តេជ្ញារក្សាសន្តិសុខសណ្តាប់ធ្នាប់ឲ្យល្អ ដោយត្រៀមកម្លាំងការពាររាល់សភាពនានាកើតឡើងដូចការបោះឆ្នោតជ្រើសរើសអ្នកតំណាងរាស្ត្រឆ្នាំ២០១៣ កន្លងមក។ នេះបើតាមការឲ្យដឹងពីអ្នកនាំពាក្យបក្សប្រជាជនកម្ពុជា។
លោក សុខ ឥសាន អ្នកនាំពាក្យបក្សកាន់អំណាចបានឲ្យដឹងនៅថ្ងៃទី១២ ខែឧសភា តាមប្រព័ន្ធតេឡេក្រាមថា គេនៅចងចាំមិនភ្លេចនូវព្រឹត្តិការណ៍ក្រោយបោះឆ្នោតភ្លាមនាខែកក្កដា២០១៣ ដោយដឹងថាខ្លួនចាញ់ឆ្នោត ជនផ្កាប់មុខនឹងបក្សប្រឆាំងបានធ្វើសកម្មភាពអនាធិបតេយ្យអុកឡុកចង់ឆាឆៅដល់ដំណើរការបោះឆ្នោត ដូចជាចាត់តាំងកម្លាំងយុវជនដើរទៅរារាំងប្រជាពលរដ្ឋដែលគាំទ្រគណបក្សប្រជាជនកម្ពុជា មិនឲ្យបានបោះឆ្នោតដោយចោទថា ជាជនជាតិយួន ទោះបីមានឯកសារបញ្ជាក់អត្តសញ្ញាណគ្រប់គ្រាន់ និងត្រឹមត្រូវក៏ដោយ ។
លោកបញ្ជាក់ថា «ពួកគេដើរទៅរារាំងប្រជាពលរដ្ឋមិនឲ្យចូលការិយាល័យបោះឆ្នោត ។ ពួកគេដើរចេញ-ចូលការិយាល័យបោះឆ្នោត និងទៅឈរពីក្រោយខ្នងមន្ត្រីបោះឆ្នោត ដោយគ្មានភារកិច្ច មានអាកប្បកិរិយាច្រងេងច្រងាងក្នុងការិយាល័យបោះឆ្នោត ស្របដោយការគាំទ្រពីតំណាងអង្គការសង្គមស៊ីវិលមួយចំនួនផង»។
លោកគូសបញ្ជាក់ថា «មកដល់ការបោះឆ្នោតលើកនេះ និងលើកក្រោយៗទៀត មិនអាចឲ្យមានបទពិសោធន៍ដ៏ជូរចត់បែបនេះទៀតជាដាច់ខាត ។ អំណាចរដ្ឋដែលជាអំណាចរបស់ប្រជាជន ដាច់ខាតត្រូវតែចាត់វិធានការសមស្រប មិនអាចឲ្យមានអំពើអនាធិបតេយ្យ និងការបង្កើតរដ្ឋក្នុងរដ្ឋបានឡើយ»។
ចែករំលែកព័តមាននេះ