រាជធានីភ្នំពេញ ៖ ក្រសួងធនធានទឹក និងឧតុនិយមបានបញ្ជាក់ថា ក្នុងរយៈពេល១សប្តាហ៍ខាងមុខនេះ បណ្តារាជធានី-ខេត្តរបស់កម្ពុជារងឥទ្ធិពលសម្ពាធទាបនឹងអាចមានភ្លៀងធ្លាក់ពីតិចទៅបង្គួរលាយដោយផ្គររន្ទះ។ យោងតាមសេចក្តីជូនដំណឹងស្ដីពីស្ថានភាពធាតុអាកាស ចាប់ពីថ្ងៃទី២៣ ដល់ថ្ងៃទី២៩ ខែវិច្ឆិកា…
រាជធានីភ្នំពេញ ៖ ក្រសួងធនធានទឹក និងឧតុនិយមបានបញ្ជាក់ថា ក្នុងរយៈពេល១សប្តាហ៍ខាងមុខនេះ បណ្តារាជធានី-ខេត្តរបស់កម្ពុជារងឥទ្ធិពលសម្ពាធទាបនឹងអាចមានភ្លៀងធ្លាក់ពីតិចទៅបង្គួរលាយដោយផ្គររន្ទះ។
យោងតាមសេចក្តីជូនដំណឹងស្ដីពីស្ថានភាពធាតុអាកាស ចាប់ពីថ្ងៃទី២៣ ដល់ថ្ងៃទី២៩ ខែវិច្ឆិកា ឆ្នាំ២០២២ របស់ក្រសួងធនធានទឹកនៅថ្ងៃទី២២ វិច្ឆិកាបានឲ្យដឹងថា ក្នុងរយៈពេល១សបា្តហ៍ទៅមុខនេះកម្ពុជានឹងទទួលនូវឥទ្ធិពលដូចតទៅ ៖ នៅថ្ងៃទី២៣-២៤ ខែវិច្ឆិកា ទទួលឥទ្ធិពលពីសម្ពាធទាបសកម្ម ។ បន្តពីថ្ងៃទី២៤-២៩ ខែវិច្ឆិកា បណ្តាខេត្តភាគខាងលើទទួលនូវឥទ្ធិពលពីទ្រនុងសម្ពាធខ្ពស់។ឯរាជធានី-បណ្តាខេត្ត នៅភាគខាងក្រោមនៅបន្តទទួលនូវឥទ្ធិពលពីជ្រលងសម្ពាធទាប។
ក្រសួងថា ស្ថានភាពបែបនេះនឹងធ្វើឲ្យតំបន់ទំនាបកណ្ដាលមានសីតុណ្ហភាពអប្បបរមា មានពី ២៣-២៥ អង្សាសេ និងសីតុណ្ហភាពអតិបរមា មានពី៣២-៣៤អង្សាសេ។ នៅចន្លោះថ្ងៃទី២៣-២៤ អាចមានភ្លៀងធ្លាក់ក្នុងកម្រិតពីតិចទៅបង្គួរលាយឡំទៅដោយផ្គរ រន្ទះ។
នៅចន្លោះថ្ងៃទី២៥-២៩ អាចមានភ្លៀងក្នុងកម្រិតតិចតួច។ ចំណែកតំបន់ខ្ពង់រាបមានសីតុណ្ហភាពអប្បបរមាមានពី២២-២៤អង្សាសេ និងសីតុណ្ហភាពអតិបរមាមានពី៣០-៣២អង្សាសេ។នៅចន្លោះថ្ងៃទី២៣-២៤ អាចមានភ្លៀងធ្លាក់ក្នុងកម្រិតពីខ្សោយទៅមធ្យមលាយឡំទៅដោយ ផ្គរ រន្ទះ។នៅចន្លោះថ្ងៃទី២៥-២៩ អាចមានភ្លៀងធ្លាក់ក្នុងកម្រិតតិចតួច ។
ដោយឡែកតំបន់មាត់សមុទ្រមាន សីតុណ្ហភាពអប្បបរមា មានពី ២៤-២៦អង្សាសេនិងសីតុណ្ហភាពអតិបរមា មានពី ៣១-៣៣អង្សាសេ។ នៅចន្លោះថ្ងៃទី២៣-២៤ អាចមានភ្លៀងធ្លាក់ ក្នុងកម្រិតពីតិច ទៅបង្ហូរលាយឡំទៅដោយ ផ្គរ រន្ទះ ផ្ទៃសមុទ្រមានខ្យល់បក់ខ្លាំង និងរលកសមុទ្រខ្ពស់ ។ នៅចន្លោះថ្ងៃទី២៥-២៩ អាចមានភ្លៀងធ្លាក់ក្នុងកម្រិតតិចតួច ៕
ចែករំលែកព័តមាននេះ