បុរសម្នាក់ពិការដៃជើងដោយសារឆ.ក់ខ្សែភ្លើង រស់នៅស្រុកក្រឡាញ់ បានទទួលអំណោយ
- សៀមរាប
ខេត្តសៀមរាប ៖ លោក វ៉ាយ ប៉ុច អាយុ៣២ឆ្នាំ ជាប្រជាពលរដ្ឋរស់នៅក្នុងភូមិរោងគោ ឃុំរោងគោ
ខេត្តសៀមរាប ៖ លោក វ៉ាយ ប៉ុច អាយុ៣២ឆ្នាំ ជាប្រជាពលរដ្ឋរស់នៅក្នុងភូមិរោងគោ ឃុំរោងគោ ស្រុកក្រឡាញ់ ខេត្តសៀមរាប ដែលរងគ្រោះដោយសារការឆ.ក់ខ្សែភ្លើង បណ្ដាលឲ្យពិការដៃជើង និងមានជីវភាពខ្វះខាត បានទទួល អំណោយរួមមាន រទេះរុញ១គ្រឿង ថវិកា៥០ម៉ឺនរៀល និងគ្រឿងឧបភោគ បរិភោគមួយចំនួន ពីឯកឧត្ដម ជា ច័ន្ទបរិបូណ៌ រដ្ឋលេខាធិការក្រសួងព័ត៌មាន និងជាប្រធានក្រុមការងារថ្នាក់ជាតិចុះជួយមូលដ្ឋានស្រុកក្រឡាញ់ ខេត្តសៀមរាប កាលពីថ្ងៃទី១៩ ខែវិច្ឆិកា ឆ្នាំ២០២២ កន្លងទៅនេះ។
ពិធីប្រគល់អំណោយនេះដែរធ្វើឡើងតាមរយៈលោក ធឹម សំផូត ទីប្រឹក្សាក្រសួងព័ត៌មាន និងក្រុមការងារស្រុកក្រឡាញ់ និងលោក សុខ ណារ៉េត អភិបាលស្រុកក្រឡាញ់ស្ដីទី ដោយមានចូលរួមពីសំណាក់ក្រុមការងារចុះជួយស្រុក រួមនឹងអាជ្ញាធរមូលដ្ឋានមួយចំនួនទៀតផងដែរ។
ក្នុងឱកាសនោះ លោក ធឹម សំផូត ទីប្រឹក្សាក្រសួងព័ត៍មាន និងក្រុមការងារស្រុកក្រឡាញ់ បានមានប្រសាសន៍ផ្ដាំផ្ញើ សួរសុខទុក្ខពីសំណាក់ លោក ជា ច័ន្ទបរិបូរណ៍ ជូនចំពោះបងប្អូនប្រជាពលរដ្ឋក្នុងមូលដ្ឋាន ដែលកន្លងមក លោក តែង តែយកចិត្តទុកដាក់អំពីសុខទុក្ខរបស់ប្រជាពលរដ្ឋក្នុងមូលដ្ឋានយើង។ ជាក់ស្ដែងក្នុងឱកាសនេះទោះ លោក មិនបានអញ្ជើញមកជួបជាមួយបងប្អូនផ្ទាល់ តែឯកឧត្តមក៏បានចាត់ឲ្យក្រុមការ ងារនាំយកនូវអំណោយជារទេះរុញ រួមនឹងគ្រឿងបរិភោគ និងថវិកាមួយចំនួនជូនដល់លោក វ៉ាយ ប៉ុច ដែលជាជនពិការ បច្ចុប្បន្នមានកូនម្នាក់រស់នៅជាមួយឪពុកម្តាយ ដោយមានជីវភាពខ្វះខាត។
លោកបានបន្តទៀតថា ដោយក្រុមការងារស្រុកបានពិនិត្យឃើញការលំបាកជាក់ស្តែងចំពោះយុវជនឈ្មោះ វ៉ាយ ប៉ុច ដែលរងគ្រោះពិការដៃ និងពិការជើងនោះ សព្វថ្ងៃនេះ ររទេះរុញរបស់គាត់បានខូចមិនអាចរុញ និងចល័តបាន ដូច្នេះរូបគាត់ និងក្រុមគ្រួសារ បានស្នើសុំមកក្រុមការ ងារ ឲ្យជួយស្វែងរកសប្បុរសជនជួយ ឧបត្ថម្ភជារទេះរុញដល់គ្រួសារគាត់។
លោកបានបន្តទៀតថា ដោយក្តីអាណិតអាសូរ ទើបក្រុមការងារបានរាយការណ៍ជូនចំពោះ លោក ប្រធានក្រុមការងារថ្នាក់ជាតិចុះជួយមូលដ្ឋានស្រុកក្រឡាញ់ ដើម្បីជួយឧបត្ថម្ភដល់លោក ទើបថ្ងៃនេះ លោក បានចាត់ឲ្យក្រុមការងារនាំយកអំណោយមកប្រគល់ជូនលោកដល់គេហដ្ឋានតែម្ដង។ ហើយចំពោះរទេះរុញនេះដែរ លោក ជឿថា វានឹងអាចជួយសម្រួលដល់សកម្មភាពប្រចាំថ្ងៃរបស់លោក សម្រាប់ការធ្វើដំណើរទៅកន្លែងផ្សេងៗផងដែរ៕
ចែករំលែកព័តមាននេះ