រាជធានីភ្នំពេញ ៖ ក្រោយពីមានគណនីហ្វេសប៊ុកមួយ បានបង្ហោះរូបភាពរបស់អ្នកឧកញ៉ា គួច ម៉េងលី ដោយបង្ហាញភាពស្និទស្នាលជាមួយនារីម្នាក់ នៅក្នុងក្លឹបកម្សាន្តមួយកន្លែងរួចមក នៅថ្ងៃទី១៨ ខែវិច្ឆិកា…
រាជធានីភ្នំពេញ ៖ ក្រោយពីមានគណនីហ្វេសប៊ុកមួយ បានបង្ហោះរូបភាពរបស់អ្នកឧកញ៉ា គួច ម៉េងលី ដោយបង្ហាញភាពស្និទស្នាលជាមួយនារីម្នាក់ នៅក្នុងក្លឹបកម្សាន្តមួយកន្លែងរួចមក នៅថ្ងៃទី១៨ ខែវិច្ឆិកា ឆ្នាំ២០២២នេះអ្នកឧកញ៉ា បានចេញមកបកស្រាយថា ដោយសារមានកម្មវិធីលក្ខណៈគ្រួសារនៅទីនោះ ហើយមានក្មួយស្រីម្នាក់(ដូចមានក្នុងរូបថត) ក៏បានសុំថតរូបជាមួយលោក ដើម្បីទុកជាអនុស្សាវរីយ៍ តែប៉ុណ្ណោះ ប៉ុន្តែបែរជាយករូបថតនោះ មកបង្ហោះនៅលើហ្វេសប៊ុក ហើយសរសេរចំណងជើងមិនសមរម្យ ទៅវិញ ។
អ្នកឧកញ៉ា គួច ម៉េងលី បានបង្ហោះសារលើបណ្តាញសង្គម ជម្រាបជូនចំពោះប្រិយមិត្ត និងអ្នកគាំទ្រទាំងអស់យ៉ាងដូច្នេះថា ៖ «ថ្មីៗនេះ មានក្មួយស្រីម្នាក់ បានសុំខ្ញុំថតក្នុងកម្មវិធីផ្ទាល់ខ្លួនរបស់ខ្ញុំ ទុកជាអនុស្សាវរីយ៍ ប៉ុន្តែផ្ទុយទៅវិញគាត់បានយករូបថតនោះមកបង្ហោះនៅលើហ្វេសប៊ុកហើយសរសេរចំណងជើង (caption) មិនសមរម្យ ធ្វើឱ្យមានការយល់ច្រឡំ ក្នុងចំណោមសាធារណជន» ។
អ្នកឧកញ៉ា គួច ម៉េងលី បានឆ្លើយតបទៅគាត់ (ក្មួយស្រីម្នាក់ដូចមានក្នុងរូបថត) ជាសាធារណៈ ដូចខាងក្រោម ៖
«ក្មួយស្រី អរគុណច្រើន ដែលបានថត ហើយនិងបានផុស រូបភាពនេះពិតជាស្អាត ប៉ុន្តែក្មួយមក សុំលោកគ្រូ ថតទុកជាអនុស្សាវរីយ៍ ក្នុងកម្មវិធីក្រុមគ្រួសារមិត្តភ័ក្កិលោកគ្រូទេ ចុះម្ដេចបានជាក្មួយផុស ហើយនិយាយអ៊ីចឹងទៅវិញ តិចគេច្រឡំថា ក្មួយផ្ដេសផ្ដាសទៅ ? » ។
សម្រាប់ជូនដល់អ្នកដែលចែករំលែកបន្ត (share) និង troll អវិជ្ជមាន អ្នកឧកញ៉ា គួច ម៉េងលី បានបញ្ជាក់ថា សូមអស់លោកអ្នកទាំងអស់គ្នា មេត្តាចេះគិតពិចារណា ប្រកបដោយវិជ្ជាជីវៈផង។ សូមភ្ញាក់ឡើង! ខ្ញុំក៏ជាបុគ្គលម្នាក់ ដូចអ្នកទាំងអស់គ្នាដែរ ដែលអាចមានព្រឹត្តិការណ៍ផ្ទាល់ខ្លួន គ្រួសារ និងព្រឹត្តិការណ៍គ្រួសាររីករាយផ្សេងៗ ។
សូមជម្រាបថា អ្នកឧកញ៉ា វេជ្ជបណ្ឌិត គួច ម៉េងលី មានស្រុកកំណើតនៅខេត្តបាត់ដំបង ។ លោកមានសញ្ជាតិខ្មែរ-អាមេរិក ជាអ្នកឯកទេសអប់រំ វេជ្ជបណ្ឌិត ជនស្នេហាជាតិ និងជាសហគ្រិនមួយរូប ។ លោកជា ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន ដែលជាស្ថាប័នផ្ដល់សេវាអប់រំឈានមុខគេនៅក្នុងប្រទេសកម្ពុជា និងមានបុត្រសម្ពន្ធគឺ មជ្ឈមណ្ឌលភាសា អេ អាយ អាយ (Aii) និងសាលារៀន អន្ដរទ្វីប អាមេរិកាំង (AIS) ហើយលោកមានឯកទេសផ្នែក អប់រំ និងការអភិវឌ្ឍសហគមន៍ផងដែរ ។
លោកគ្រូ ត្រូវគេទទួលស្គាល់ចំពោះការចូលរួមយ៉ាងសកម្មរបស់លោកក្នុងកិច្ចការងារមនុស្សធម៌ ការអភិវឌ្ឍសហគមន៍ តាមរយៈការខិតខំប្រឹងប្រែងរបស់លោកក្នុងវិស័យអប់រំ វិស័យសុខាភិបាល និងការបម្រើសេវាសង្គម ក្នុងតួនាទីជានាយកប្រតិបត្តិនៃ មូលនិធិ ម៉េងលី ជេ. គួច ដែលបង្កើតឡើងក្នុងឆ្នាំ២០០៥ ៕
ចែករំលែកព័តមាននេះ