ខេត្តមណ្ឌលគិរី ៖ ជនជាតិវៀតណាម០៦នាក់ ត្រូវបានសមត្ថកិច្ចកម្ពុជាបញ្ជូនទៅប្រទេសវៀតណាមវិញ បន្ទាប់ពីរកឃើញថា ឆ្លងដែនចូលមកដោយខុសច្បាប់ និងស្នាក់នៅក្នុងទឹកដីខេត្តមណ្ឌលគិរី
ខេត្តមណ្ឌលគិរី ៖ ជនជាតិវៀតណាម០៦នាក់ ត្រូវបានសមត្ថកិច្ចកម្ពុជាបញ្ជូនទៅប្រទេសវៀតណាមវិញ បន្ទាប់ពីរកឃើញថា ឆ្លងដែនចូលមកដោយខុសច្បាប់ និងស្នាក់នៅក្នុងទឹកដីខេត្តមណ្ឌលគិរី ដោយបន្លំខ្លួនជាកម្មករក្រុមហ៊ុនដីសម្បទានកៅស៊ូ ប៊ិញហ្វឿក១ ភូមិសាស្ត្រឃុំស្រែឈូក ស្រុកកែវសីមា។ ការឃាត់ខ្លួនសាកសួរគឺបានធ្វើឡើងកាលពីថ្ងៃទី២៧ ខែមេសា ឆ្នាំ២០១៧ ក្រោមការចុះអនុវត្តន៍ពីនគរបាលអន្តោប្រវេសន៍ នៃអធិការដ្ឋានស្រុកកែវសីមា។
សមត្ថកិច្ចបានឱ្យដឹងថា ជនជាតិវៀតណាមទាំងនោះ មានស្រីចំនួន០២នាក់ និងប្រុស០៤នាក់។ ពួកគេបានចូលមកកម្ពុជាតាមច្រករបៀងស្ថិតក្នុងដែនសមត្ថកិច្ចវរៈកាពារលេខ៦១៧ ក្នុងទឹកដីស្រុកមេមត់ ខេត្តត្បូងឃ្មុំ និងបន្តស្នាក់នៅក្នុងក្រុមហ៊ុនសម្បទានសេដ្ឋកិច្ចឈ្មោះប៊ិញហ្វឿក០១រយៈពេលជាង១ខែ ដើម្បីធ្វើជាកម្មកររបស់ក្រុមហ៊ុន។ សមត្ថកិច្ចថា ពួកគេមានស្រុកកំណើត និងទីលំនៅខេត្តតៃនិញ ប្រទេសវៀតណាម មានអាយុចន្លោះពី១៧ទៅ២០ឆ្នាំ។
ទោះជាយ៉ាងណាក្រោយការសាកសួរពីមន្ត្រីអន្តោប្រវេសន៍ ពលករលួចឆ្លងដែនទាំង០៦នាក់ ត្រូវបានបញ្ជូនចេញពីកម្ពុជា តាមច្រកទ្វេភាគីឡាប៉ាខេ ក្នុងស្រុកកែវសីមា ខេត្តមណ្ឌលគិរី នាថ្ងៃទី២៨ មេសានេះ។ ពាក់ព័ន្ធនឹងការទទួលជនអន្តោប្រវេសន៍មកធ្វើការក្នុងក្រុមហ៊ុន ខុសច្បាប់ និងនីតិវិធីច្បាប់នេះផងដែរ តំណាងក្រុមហ៊ុនប៊ិញហ្វឿក អ្នកកាសែតមិនអាចស្វែងរកការបញ្ជាក់បន្ថែមបាននោះទេ នាថ្ងៃ២៨មេសានេះ៕
ចែករំលែកព័តមាននេះ