ខេត្តកំពង់ស្ពឺ ៖ មនុស្សយ៉ាងតិច៤នាក់ត្រូវបានសមត្ថកិច្ចស្រុកឧដុង្គធ្វើឃាត់ខ្លួន ខណៈកំពុងអង្គុយចាក់អាប៉ោងក្នុងក្បែរគុម្ពោតព្រៃជិតមាត់អូរមួយកន្លែង ដោយដកហូតបានអាប៉ោងចំនួន៤គ្រាប់
ខេត្តកំពង់ស្ពឺ ៖ មនុស្សយ៉ាងតិច៤នាក់ត្រូវបានសមត្ថកិច្ចស្រុកឧដុង្គធ្វើឃាត់ខ្លួន ខណៈកំពុងអង្គុយចាក់អាប៉ោងក្នុងក្បែរគុម្ពោតព្រៃជិតមាត់អូរមួយកន្លែង ដោយដកហូតបានអាប៉ោងចំនួន៤គ្រាប់ លុយរាប់ម៉ឺនរៀល ព្រមទាំងសម្ភារមួយចំនួនជាវត្ថុតាងធ្វើរបាយការណ៍បញ្ជូនទៅកាន់ស្នងការដ្ឋាននគរបាលខេត្តចាត់ការបន្តនោះ ពេលនេះត្រូវបានគេរត់ការដោះលែងឲ្យមានសេរីភាពវិញហើយជាថ្នូរនឹងលុយរាប់រយពាន់ដុល្លារឯណោះ។
ការដោះលែងឲ្យមានសេរីភាពក្រុមញៀនល្បែងអាប៉ោងទាំងស្រីទាំងប្រុសចំនួន៤នាក់នោះគឺធ្វើឡើងកាលពីល្ងាចថ្ងៃទី២៧ ខែមេសា ឆ្នាំ២០១៧ បន្ទាប់ពីនគរបាលស្រុកឧដុង្គបញ្ជូនមកដល់ស្នងការដ្ឋាននគរបាលខេត្តកំពង់ស្ពឺបានមួយយប់ប៉ុណ្ណោះ។ តាមការបង្ហើបឲ្យដឹងពីមន្ត្រីនគរបាលខេត្តកំពង់ស្ពឺមួយរូបនិយាយក្នុងលក្ខខណ្ឌមិនបញ្ចេញឈ្មោះថា ការដោះលែងក្រុមញៀនល្បែងអាប៉ោង៤នាក់នេះជាថ្នូរនឹងលុយជិត១ពាន់ដុល្លារឯណោះ ហើយការដោះលែងនេះមានអ្នករត់ការម្នាក់ជាអ្នកមានអំណាច និងមានតួនាទីជានាយការិយាល័យទៀតផង ដោយមនុស្សមានអំណាចនោះគេស្គាល់អស់លោកថ្នាក់ធំៗ ក្នុងខេត្តកំពង់ស្ពឺច្រើន ហើយរាល់ការរត់ការរបស់លោកនាយនោះតែងតែបានសម្រេចជាច្រើនលើកមកហើយ ដោយគេចេះលូនចេះក្រាបនឹងចេះទ្រទៀត។
តាមប្រភពព័ត៌មានពីមន្ត្រីនគរបាលស្រុកឧដុង្គម្នាក់បានលួចបង្ហើបថា ក្រុមញៀនល្បែងអាប៉ោងទាំង៤នាក់នោះ មានម្នាក់ធ្លាប់ត្រូវឃាត់ខ្លួនធ្វើកិច្ចសន្យាម្តងរួចមកហើយមិនរៀងចាលទាល់តែសោះគឺឈ្មោះ នុត នន អាយុ៥៧ឆ្នាំ ជាមេទៀតផង។នគរបាលនៅតាមបណ្តាស្រុកមួយចំនួនបានលួចខ្សឹបថាពួកគាត់លែងចង់ធ្វើការងារហើយដោយសារតែពួកគាត់ខិតខំធ្វើការបង្ក្រាបរាល់បទល្មើសជាពិសេសល្បែងស៊ីសងខុសច្បាប់ដែលសម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃដាក់បញ្ជាឲ្យធ្វើការបង្ក្រាបនោះ។
ប៉ុន្តែដល់ពួកគាត់នៅតាមបណ្តាស្រុកជាច្រើនព្យាយាមបង្ក្រាបបានបញ្ជូនមកដល់ការិយាល័យជំនាញស្នងការខេត្ត ស្រាប់តែត្រូវដោះលែងឲ្យមានសេរីភាពទៅវិញ តើពួកគាត់មានកម្លាំងឯណាធ្វើការបង្ក្រាបទៀតបើធ្វើតែរបៀបនេះនោះ។ ការចុះបង្ក្រាបនោះពួកគាត់ចំណាយពេលវេលា ចំណាយទាំងថវិកាផ្ទាល់ខ្លួនទៀត ហើយប្រឈមមុខជាមួយក្រុមជនល្មើសទាំងនោះទៀតផង តើឯណាទៅភូមិ ឃុំមានសុវត្ថិភាព៩ចំណុច ដែលថ្នាក់លើបានកំណត់នោះ បើថ្នាក់បន្ទាប់ដោះលែងរហូតជាថ្នូរនឹងលុយមិនគិតពីសុខទុក្ខ និងសុវត្ថិភាពរបស់ប្រជាពលរដ្ឋផងនោះ ហើយក្រុមជនខិលខូចស្អប់តែពួកគាត់នៅតាមមូលដ្ឋាននោះទេ។
គួររំលឹកផងដែលថា កាលពីវេលាម៉ោង២និង៣០នាទីរសៀល ថ្ងៃទី២៥ ខែមេសា ឆ្នាំ២០១៧ កម្លាំងអធិការដ្ឋានស្រុកឧដុង្គបានឃាត់ក្រុមអ្នកញៀនល្បែងអាប៉ោងប្រុសស្រីចំនួន៤នាក់ នៅចំណុចមាត់អូរខាងជើងភូមិក្រាំងទំនប់ ឃុំចាន់សែន ស្រុកឧដុង្គ ខេត្តកំពង់ស្ពឺ។ ដែលមាន ទី១-ឈ្មោះ នុត នន ភេទប្រុស អាយុ ៥៧ឆ្នាំ មុខរបរមេអាប៉ោង រស់នៅក្នុងភូមិតាលីង ឃុំក្សេមក្សាន្ត ស្រុកឧដុង្គ ទី២-ឈ្មោះ នៅ រិទ្ធី ភេទប្រុស អាយុ៤៣ឆ្នាំ មុខរបរមិនពិតប្រាកដ រស់នៅក្នុងភូមិក្រាំងទំនប់ ឃុំចាន់សែន ស្រុកឧដុង្គ ខេត្តកំពង់ស្ពឺ ទី៣-ឈ្មោះ យ៉ុង រ៉ុន ភេទស្រី អាយុ៣៧ឆ្នាំមុខរបរមិនពិតប្រាកដ រស់ក្នុងនៅភូមិក្រាំងទំនប់ ឃុំចាន់សែន ស្រុកឧដុង្គ ខេត្តកំពង់ស្ពឺ និងទី៤-ឈ្មោះ ប៉ន រ៉េម ភេទស្រី អាយុជាង៤០ឆ្នាំ មុខរបរមិនពិតប្រាកដ រស់នៅក្នុងភូមិក្រាំងទំនប់ ឃុំចាន់សែន ស្រុកឧដុង្គ ខេត្តកំពង់ស្ពឺ។
ក្រោយឃាត់ខ្លួនក្រុមញៀនល្បែងខាងលើនេះសមត្ថកិច្ចដកហូតវត្ថុតាងដើម្បីដាក់បន្ទុករួមមាន មេអាប៉ោងចំនួន៤គ្រាប់ ចាន១ ផ្តឹល១ លុយដុល្លាមានចំនួន(១០៥ដុល្លារ) លុយខ្មែរចំនួន៣៦០.០០០រៀល និងទូរសព្ទ័ចាស់ៗចំនួន៣គ្រឿងទៀតផង។ នៅចំពោះមុខសមត្ថកិច្ចមេបាញ់អាប៉ោងឈ្មោះ នុត នន បាននិយាយបែបមិនខ្លាចរអាអស់លោកសមត្ថកិច្ចសោះថា គាត់មិនចេះធ្វើស្រែនោះទេហើយការលេងអាប៉ោងនេះមិនមែនទើបតែលេងនោះទេ គឺគាត់លេងតាំងពីឆ្នាំ៧៩មកម្លេះ។
មេអាប៉ោងរូបនេះបន្តថា បើចង់ឲ្យគាត់ឈប់លេងទាល់តែដាក់គុកគាត់កុំលែង បើលែងគាត់នៅតែលេងដដែល។ ឥឡូវដូចអ្វីដែលលោក នុត នន ប្រាថ្នាហើយបានដោះលែងឲ្យមានសេរីភាពលេងល្បែងអាប៉ោងទៀត ពិបាកដល់សមត្ថកិច្ចស្រុកឧដុង្គចាប់ទៀតហើយមើលទៅ។ ប៉ុន្តែមិនបាច់ចាប់ក៏បានដែរបើចាប់បានហើយថ្នាក់លើដោះលែងវិញនោះ ទុកលោក នុត នន មេអាប៉ោងតាំងពីឆ្នាំ១៩៧៩ នៅធ្វើគ្រូបង្រៀនដល់កូនចៅជំនាន់ក្រោយឲ្យចេះលេងល្បែងអាប៉ោងដូចរូបលោកតទៅទៀតដើម្បីឲ្យមានអ្នកស្នង៕
ចែករំលែកព័តមាននេះ