រាជធានីភ្នំពេញ ៖ ទីបំផុតចៅក្រមសាលាដំបូងរាជធានីភ្នំពេញ លោក ហេង កេសរោ នៅថ្ងៃទី២៦ មេសា ២០១៧ បានចេញដីកាសម្រេចឃុំខ្លួនបុរសជនជាតិចិនដាក់ពន្ធនាគារជាបណ្ដោះអាសន្ន ក្រោមការចោទប្រកាន់ពីបទឃាតកម្មគិតទុកមុន តាមមាត្រា២០០នៃក្រមព្រហ្មទណ្ឌ ពាក់ព័ន្ធការសម្លាប់ថៅកែហាងម្ហូបចិនយកសពទៅទម្លាក់ចោលនៅស្ពានអ្នកលឿង។ ចំណែកបុរសជនជាតិខ្មែរម្នាក់ទៀតដែលជួយជ្រោមជ្រែងជនដៃដល់ដឹកសពយកទៅបោះចោល ត្រូវបានចោទប្រកាន់ពីបទសមគំនិតក្នុងអំពើឃាតកម្មគិតទុកជាមុន។
ជនត្រូវចោទទាំង២នាក់ត្រូវបានបញ្ជូនទៅកាន់ពន្ធនាគារព្រៃសរួចហើយ ។ សូមរំលឹកថា នៅព្រឹកថ្ងៃទី២១ មេសា ២០១៧ សមត្ថកិច្ចបាននាំជនដៃដល់ទៅចង្អុលបង្ហាញទីកន្លែងដែលពួកគេទម្លាក់សាកសពជនរងគ្រោះចូលទឹកទន្លេដើម្បីបញ្ជាក់ឲ្យក្រុមគ្រួសារសពអស់មន្ទិលសង្ស័យ ព្រោះកន្លងមកនេះគ្រួសារជនរងគ្រោះមិនជឿថា សាកសពជាសមាជិកគ្រួសាររបស់ខ្លួនទេ ដោយសារសាកសពហើមស្អុយរលួយបាត់ទ្រង់ទ្រាយដើមអស់ទៅហើយ។
ជនសង្ស័យដែលសមត្ថកិច្ចចាប់ខ្លួនម្នាក់ឈ្មោះ GAO KEYAN ភេទប្រុស អាយុ៤០ឆ្នាំ ជាជនជាតិចិន និងមានមុខរបរជាចុងភៅនៅហាងអាហាររបស់ជនរងគ្រោះ ហើយម្នាក់ទៀតឈ្មោះ ម៉ុង ចំរើន ភេទប្រុស អាយុ២១ឆ្នាំ ជនជាតិខ្មែរ ជាបក្ខពួករបស់ជនដៃដល់ ។ កាលពីថ្ងៃទី១២ មេសា ២០១៧ មានករណីចាប់ថៅកែហាងភោជនីដ្ឋានមួយកន្លែង ជាជនជាតិចិនម្នាក់ នៅខណ្ឌពោធិសែនជ័យ ដើម្បីជំរិតទារប្រាក់ ប៉ុន្តែក្រោយមកព័ត៌មាននោះបានស្ងាត់បាត់ឈឹងទៅវិញ។
លុះដល់វេលាម៉ោង៥ និង៤៥នាទីព្រឹក ថ្ងៃទី១៣ មេសា ប្រជាពលរដ្ឋបានប្រទះឃើញសាកសពជនជាតិចិនម្នាក់ស្លាប់អណ្តែតទឹកទន្លេ នៅចំណុចភូមិព្រែកបាក់ ឃុំព្រែកទន្លាប់ ស្រុកលើកដែក ខេត្តកណ្តាល ដែលសាកសពនោះមិនត្រូវបានស្គាល់អត្តសញ្ញាណទេ ។ ពាក់ព័ន្ធករណីនេះ បន្ទាប់ពីមានព័ត៌មានអំពីករណីជំរិតទារប្រាក់ សមត្ថកិច្ចនគរបាលព្រហ្មទណ្ឌកម្រិតធ្ងន់រាជធានីភ្នំពេញ និងនាយកដ្ឋាននគរបាលព្រហ្មទណ្ឌក្រសួងមហាផ្ទៃ បានបើកការស៊ើបអង្កេតលើបទល្មើសជំរិតទារប្រាក់នេះ ដោយយោងទៅលើក្រុមគ្រួសារជនជាតិចិនម្នាក់បានបាត់សមាជិករបស់ខ្លួន។
ក្រោយពីសមត្ថកិច្ចរួមគ្នាសហការបើកការស៊ើបអង្កេត ទើបដឹងពីមុខសញ្ញាឧក្រិដ្ឋដែលធ្វើសកម្មភាពនោះ ហើយក៏ទទួលបានបទបញ្ជាពីលោកនាយឧត្តមសេនីយ៍ កង សុខន អគ្គស្នងការងនគរបាលជាតិ ទទួលការងារនគរបាលព្រហ្មទណ្ឌ និងលោកនាយឧត្តមសេនីយ៍អគ្គស្នងការរង ទទួលស្នងការនគរបាលរាជធានីភ្នំពេញ បានចង្អុលបង្ហាញទៅនាយកដ្ឋាននគរបាលព្រហ្មទណ្ឌដែលមានលោកឧត្តមសេនីយ៍ឯក សុខ ខេមរិន្ទ ជាប្រធាន និងបានអនុញ្ញាតឲ្យលោកឧត្តមសេនីយ៍ទោ ង៉េង ជួរ អនុប្រធាននាយកដ្ឋានចុះសហការជាមួយនាយកដ្ឋាននគរបាលសន្តិសុខ នគរបាលការិយាល័យព្រហ្មទណ្ឌរាជធានីភ្នំពេញ និងបានសហការជាមួយលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ក្រោមការសម្របសម្រួលពីស្ថាប័នអយ្យការបានចាប់ជនសង្ស័យនៅក្រុងព្រះសីហនុ ហើយបញ្ជូនមករាជធានីភ្នំពេញ។
ចំណែករឿងពិតពាក់ព័ន្ធការបាត់ខ្លួនថៅកែហាងជនជាតិចិនតាំងពីមុនថ្ងៃចូលឆ្នាំខ្មែររហូតប្រទះឃើញសាកសពនោះ ថៅកែចិនដែលស្លាប់បានដេញជនសង្ស័យឈ្មោះ GAO KEYAN ឲ្យឈប់ធ្វើចុងភៅនៅហាងនោះ។ ដោយសារតែរឿងនេះជនសង្ស័យបានមានគំនិតខឹងថៅកែចិន ក៏ផ្តើមគំនិតចាប់ថៅចិនយកទៅឃុំទុកមួយកន្លែង ហើយគំរាមទារប្រាក់ពីក្រុមគ្រួសារ។ ប៉ុន្តែការជំរិតនោះមិនបានប្រាក់ ជនដៃដល់បានសម្លាប់ជនរងគ្រោះ ហើយរួមគ្នាជាមួយជនសង្ស័យខ្មែរម្នាក់ដឹកសាកសពជនរងគ្រោះតាមរថយន្តម៉ាកវីស្តូ ជាកម្មសិទ្ធិរបស់ជនរងគ្រោះយកសពទៅទម្លាក់ចោលនៅទឹកទន្លេអ្នកលឿង ទើបបានសពនោះអណ្តែតទៅដល់ចំណុចខាងលើ ដែលប្រជាពលរដ្ឋបានប្រទះឃើញ តែមិនស្គាល់អត្តសញ្ញាណ។
លោក ខៀវ ផល្លា ព្រះរាជអាជ្ញារងអមសាលាដំបូងរាជធានីភ្នំពេញ កាលពីថ្ងៃទី២៥ មេសា ២០១៧ បានសម្រេចចោទប្រកាន់ GAO KEYAN ពីបទឃាតកម្មគិតទុកជាមុន ចំណែកឈ្មោះ ម៉ុង ចំរើន ត្រូវបានចោទប្រកាន់ពីបទសមគំនិតក្នុងអំពើឃាតកម្មគិតទុកជាមុន តាមមាត្រ២៩នៃក្រមព្រហ្មទណ្ឌ៕
ចែករំលែកព័តមាននេះ