Meta កាត់បន្ថយបុគ្គលិកជាង១ម៉ឺននាក់ ខណៈតម្លៃក្រុមហ៊ុនធ្លាក់ចុះជាង៧០%
អាមេរិក ៖ ក្រុមហ៊ុន Meta បាននិយាយកាលពីថ្ងៃពុធ ទី ៩ វិច្ឆិកាថា ខ្លួននឹងកាត់បន្ថយបុគ្គលិក
អាមេរិក ៖ ក្រុមហ៊ុន Meta បាននិយាយកាលពីថ្ងៃពុធ ទី ៩ វិច្ឆិកាថា ខ្លួននឹងកាត់បន្ថយបុគ្គលិកចំនួន ១១.០០០នាក់ ឬស្មើ ១៣ភាគរយនៃកម្លាំងការងារសរុបរបស់ខ្លួន ខណៈក្រុមហ៊ុនកំពុងជួបវិបត្តិយ៉ាងខ្លាំងចំពេលការផ្សាយពាណិជ្ជកម្មនៅលើបណ្តាញសង្គមនេះធ្លាក់ចុះ និងអតិផរណាខ្ពស់។
ការកាត់បន្ថយការងារដ៏ច្រើនឆ្នាំនេះរបស់ Meta កើតឡើងបន្ទាប់ពីមានការកាត់បន្ថយបុគ្គលិករាប់ពាន់នាក់ពីក្រុមហ៊ុនបច្ចេកវិទ្យាធំៗជាច្រើនដូចជា Twitter របស់មហាសេដ្ឋីលេខមួយពិភពលោក Elon Musk ក្រុមហ៊ុន Microsoft និង Snap។
ស្ថាបនិក និងជានាយកប្រតិបត្តិរបស់ក្រុមហ៊ុន Facebook លោក Mark Zuckerberg បាននិយាយថា «ពាណិជ្ជកម្មអនឡាញមិនត្រឹមតែត្រឡប់ទៅរកនិន្នាការដូចមុនប៉ុណ្ណោះទេ ប៉ុន្តែការធ្លាក់ចុះនៃម៉ាក្រូសេដ្ឋកិច្ច ការកើនឡើងនៃការប្រកួតប្រជែង និងការបាត់បង់សញ្ញាផ្សាយពាណិជ្ជកម្មបានបណ្តាលឱ្យប្រាក់ចំណូលរបស់យើងទាបជាងអ្វីដែលខ្ញុំរំពឹងទុក»។
សូមបញ្ជាក់ថា Meta ដែលជាមេរបស់ Facebook ធ្លាប់មានតម្លៃជាង ១លានលានដុល្លារ ប៉ុន្តែឥឡូវនេះវាមានតម្លៃត្រឹម ២៥៦ពាន់លានដុល្លារប៉ុណ្ណោះ បន្ទាប់ពីបាត់បង់តម្លៃអស់ជាង ៧០ភាគរយនៅក្នុងឆ្នាំនេះ។
កាលពីថ្ងៃពុធម្សិលមិញ ភាគហ៊ុនរបស់ Meta កើនឡើង ៤ភាគរយ។
ក្រៅពីការកាត់បន្ថយបុគ្គលិក ក្រុមហ៊ុនក៏នឹងកាត់បន្ថយទំហំការិយាល័យផង បន្ថយការចំណាយ និងបន្តការបង្កកការជួលផងដែររហូតដល់ត្រីមាសទី ១ ដើម្បីកម្រិតការចំណាយ៕ (យោងតាមប្រភព៖ Reuters)
ចែករំលែកព័តមាននេះ