ទីក្រុងបាងកក៖ តុលាការថៃចេញដីកាចាប់ខ្លួនមនុស្ស១៧នាក់ដែលជាអ្នកទទួលខុសត្រូវនៅចំពោះមុខច្បាប់ករណីបាក់រលំអគារនៅទីក្រុងបាងកកនៅពេលមានហេតុការណ៍រញ្ជួយដីកាលពីចុងខែមីនាបណ្ដាលឱ្យស្លាប់កម្មកររាប់សិបនាក់ដែលបម្រើការនៅក្នុងអគារកំពុងសាងសង់នោះ។ អគ្គស្នងការនគរបាលថៃ ឧត្ដមសេនីយ៍ស៊ីយ៉ាម ប៊ុនសម បានចេញសេចក្ដីប្រកាសអំពីការទទួលបានដីកាចាប់ខ្លួនពីតុលាការដើម្បីជម្រាបជូនអ្នកសារព័ត៌មាន។
ប៉ុន្តែលោកសូមមិនធ្វើអត្ថាធិប្បាយលម្អិតអំពីភិនភាគ ឬអត្តសញ្ញាណរបស់ជនដែលត្រូវចាប់ខ្លួននោះទេ។ សារព័ត៌មានក្នុងស្រុកចុះផ្សាយថានៅក្នុងចំណោមជនសង្ស័យទាំងនោះក៏មានបុគ្គលិកបម្រើការនៅក្រុមហ៊ុនអភិវឌ្ឍអ៊ីតាលី-ថៃ ហៅកាត់ថាអាយធីឌីផងដែរ (ITD)។ នេះជាក្រុមហ៊ុនមួយនៅក្នុងចំណោមក្រុមហ៊ុនដទៃទៀតដែលទទួលម៉ៅការសាងសង់អគារនោះ។
សូមរំលឹកថាអគារសវនកម្មថ្មីរបស់រដ្ឋាភិបាលថៃដែលកំពុងសាងសង់កម្ពស់៣០ជាន់នោះនៅពេលកើតមានគ្រោះរញ្ជួយដីកម្រិត៧,៧រ៉ិចទ័រដែលវាយប្រហារខ្លាំងទៅលើទីក្រុងម៉ាន់ដាឡេ (Mandalay) របស់ប្រទេសមីយ៉ាន់ម៉ាស្រាប់តែអគារនេះបាក់រលំគ្រឹបដល់ដីតែម្ដង។ គេកត់សម្គាល់ថាអគារនេះត្រូវតែមានបញ្ហាព្រោះករណីបាក់អគាររាប់ពាន់ខ្នងនៅមីយ៉ាន់ម៉ាមិនចម្លែកទេ។
ប៉ុន្តែករណីនៅប្រទេសថៃបាក់តែអគារសវនកម្មនេះ១តែប៉ុណ្ណោះ។ ចំណែកអគារដទៃទៀតហាក់ដូចជាគ្មានបញ្ហាអ្វីធំដុំទេ យ៉ាងខ្លាំងត្រឹមតែប្រេះស្រាំជញ្ជាំង ឬពិតានបន្តិចបន្តួចតែប៉ុណ្ណោះ។ នេះហើយដែលជាបញ្ហាសំខាន់ដែលអាជ្ញាធរនៅតែបន្តស៊ើបអង្កេតយ៉ាងក្ដៅគគុកព្រោះនេះមិនមែនជាករណីរដ្ឋប្បវេណីទេ ប៉ុន្តែចូលសំណុំរឿងព្រហ្មទណ្ឌហើយ។ សំខាន់ទុកលទ្ធភាពជូនតុលាការជាអ្នកសម្រេចទៅចុះ។
ក្រុមអ្នកស៊ើបអង្កេតរកឃើញថានៅទូទាំងទីក្រុងបាងកកមានតែអគារសវនកម្មកំពុងសាងសង់នេះតែប៉ុណ្ណោះដែលបាក់រលំ។ ជាពិសេស ការបាក់រលំនេះហាក់ដូចជាឆាប់រហ័សពេកដល់ថ្នាក់មនុស្សនៅក្នុងអគារជម្លៀសខ្លួនមិនទាន់។ ហេតុនេះ គេដាក់ការសង្ស័យថាក្រុមហ៊ុនម៉ៅការអាចនឹងកេងបន្លំដើម្បីយកចំណេញឱ្យបានច្រើន ហើយប្រើប្រាស់សម្ភារៈដូចជាដែក និងស៊ីម៉ង់ជាដើមមិនតាមកម្រិតស្តង់ដារ។
រហូតមកដល់ពេលនេះ អាជ្ញាធរថៃប្រមូលបានសាកសពជនរងគ្រោះ៨៩នាក់ទាំងមុនទាំងក្រោយដែលបានកប់នៅក្នុងគំនរបាក់បែកនៃអគារ។ មនុស្ស៧នាក់ទៀតនៅបាត់ខ្លួននៅឡើយ។ អាជ្ញាធរបានពិនិត្យមើលដែកដែលយកទៅសាងសង់នោះឃើញថាក្រោមកម្រិតស្តង់ដារ។ ខាងលើនេះជាការដកស្រង់ប្រភពពីគេហទំព័រវៀតណាមអ៊ិចប្រែស និងប្រភពដទៃទៀត៕
ចែករំលែកព័តមាននេះ