លោក សយ ស៊ីណុល ប្រធានមន្ទីរទេសចរណ៍ខេត្តកំពត បានឲ្យដឹងថា ថ្ងៃដំបូងនៃពិធីបុណ្យអុំទូក បណ្ដែតប្រទីប និងអកអំបុក សំពះព្រះខែ នៅខេត្តកំពត ទទួលភ្ញៀវទេសចរចូលរួមមកលេងកម្សាន្ត ដែលបានប្រព្រឹត្ត
ខេត្តកំពត ៖ លោក សយ ស៊ីណុល ប្រធានមន្ទីរទេសចរណ៍ខេត្តកំពត បានឲ្យដឹងថា ថ្ងៃដំបូងនៃពិធីបុណ្យអុំទូក បណ្ដែតប្រទីប និងអកអំបុក សំពះព្រះខែ នៅខេត្តកំពត ទទួលភ្ញៀវទេសចរចូលរួមមកលេងកម្សាន្ត ដែលបានប្រព្រឹត្តនារសៀលថ្ងៃទី៦ ខែវិច្ឆិកា រហូតដល់ថ្ងៃទី០៧ ខែវិច្ឆិកា ឆ្នាំ២០២២ មានភ្ញៀវទេសចរទៅទស្សនាចំនួន២០៧,២៤៥នាក់ ក្នុងនោះភ្ញៀវទេសចរជាតិចំនួន២០៥,៥២២នាក់ និងភ្ញៀវអន្តរជាតិផ្ទៃក្នុងចំនួន១,៧២៣នាក់។
លោកបន្តថា ពិធីបុណ្យនេះ បានប្រព្រឹត្តឡើងយ៉ាងគគ្រឹកគគ្រេងប្រកបដោយភាពសប្បាយរីករាយបំផុត។ ហើយប្រជាពលរដ្ឋក្នុងខេត្ត និងភ្ញៀវទេសចរបានមកចូលរួមទស្សនាការប្រណាំងទូកប្រពៃណី ក៏ដូចជាការដើរកម្សាន្តនៅតាមរមណីយដ្ឋាននានាដ៏ច្រើនកុះករដែរ។
លោកបញ្ជាក់ថា សម្រាប់ថ្ងៃដំបូងនេះ មានអ្នកមកលេងកម្សាន្តប្រមាណជាង២០ម៉ឺននាក់។ ចំណែកសន្តិសុខសណ្តាប់ធ្នាប់ផ្សេងៗ មិនមានអ្វីកើតឡើងគួរឱ្យកត់សម្គាល់ឡើយ។ លោកអះអាងថា បើតាមការព្យាករណ៍នៅថ្ងៃទី២ អាចនឹងមានអ្នកចូលរួមកាន់តែច្រើន ដោយសារការរៀបចំបានល្អ និងមានភាពសប្បាយករាយពិតៗ។
សូមជម្រាបថា ពិធីបុណ្យអុំទូកនៅកំពត មានកម្មវិធីកម្សាន្តជាច្រើន ដូចជាការប្រណាំងទូកង ការប្រកួត និងបង្ហាញក្បាច់គុនល្បុក្កតោ សមិទ្ធផលភូមិមួយផលិតផលមួយ ស្តង់លក់ផលិតផល ការសម្ដែងសិល្បៈ តន្ត្រីខ្នាតធំជាច្រើនទីតាំង ការជិះម៉ូតូហោះ សកម្មភាពបាញ់កាំជ្រួច បណ្ដែតប្រទីប និងបង្ហោះគោមជាដើម៕
ចែករំលែកព័តមាននេះ