ក្រោយពីបានអាក់ខានក្នុងការប្រណាំងទូកលក្ខណៈប្រពៃណីរយៈពេល២ឆ្នាំ ដោយសារវិបត្តិជំងឺកូវីដ១៩ និងក្រោមការយកចិត្តទុកដាក់ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី ក្នុងយុទ្ធនាការ
ខេត្តសៀមរាប ៖ ក្រោយពីបានអាក់ខានក្នុងការប្រណាំងទូកលក្ខណៈប្រពៃណីរយៈពេល២ឆ្នាំ ដោយសារវិបត្តិជំងឺកូវីដ១៩ និងក្រោមការយកចិត្តទុកដាក់ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី ក្នុងយុទ្ធនាការចាក់វ៉ាក់សាំងជូនប្រជាពលរដ្ឋកម្ពុជា ដោយមិនបានប្រកាន់និន្នាការនយោបាយ និងពូជសាសន៍ ចាប់ពីដូសមូលដ្ឋានរហូតដល់ដូសជំរុញ បានធ្វើឲ្យស្ថានភាពនៃជំងឺកូវីដ១៩ នៅកម្ពុជាមានភាពធូរស្រាលមក ព្រះគ្រូចៅអធិការគណៈកម្មការវត្ត និងប្រជាពុទ្ធបរិស័ទចំណុះជើងវត្តបារាយមហានទីរតនារាម ហៅវត្តស្វាយរមៀត បានរៀបចំពិធីប្រណាំងទូកលក្ខណៈប្រពៃណីលើកទី៥ ក្នុងគោលបំណងរឹតចំណងបង្កើនសាមគ្គីភាពរវាងវត្តអារាម និងពុទ្ធបរិស័ទ រក្សាប្រពៃណីទំនៀមទំលាប់របស់ខ្មែរ ដើម្បីរំលឹកនឹកគុណដល់កងទ័ពជើងទឹក ដែលបានទទួលជោគជ័យលើខ្មាំងសត្រូវឈ្លានពានមកលើទឹកដីខ្មែរកាលពីអតីតកាល។
ព្រះសច្ចានុបាល នឿម វុទ្ឋី ព្រះចៅអធិការវត្តស្វាយរមៀត មានសង្ឃដីកាថា ថ្វីត្បិតតែមេរោគកូវីដ-១៩ មិនទាន់សាបរលាបអស់ពីកម្ពុជា និងក្នុងពិភពលោកក្តី តែកម្ពុជា ក្រោមការដឹកនាំប្រកបដោយគតិបណ្ឌិត និងឈ្លាវៃរបស់សម្តេចតេជោ ហ៊ុន សែន នាយករដ្ឋមន្ត្រី សម្តេចបានខិតខំប្រឹងប្រែងពុះពារស្វែងរកវ៉ាក់សាំងចាក់ការពារជូនបងប្អូនប្រជាពលរដ្ឋនៅទូទាំងប្រទេសដោយឥតគិតថ្លៃ តាំងពីដូសមូលដ្ឋានដល់ដូសជម្រុញ និងបានធ្វើឲ្យស្ថានភាពនៃការឆ្លងមានការថយចុះជាលំដាប់ ហើយសម្រេចបើកប្រទេសពេញលេញឡើងវិញតាមរយៈការណែនាំឲ្យបងប្អូនគ្រប់ទីកន្លែងរៀនរស់តាមបែបគន្លងថ្មី ដើម្បីទប់ស្កាត់ការពារការឆ្លងរីករាលដាលទៅក្នុងសហគមន៍ អាស្រ័យដោយគុណបំណាច់ដ៏ធំធេងនេះ ទើបយើងមានការជួបជុំធ្វើបុណ្យផ្សេងៗដោយរីករាយ។
ព្រះគ្រូចៅអធិការបន្តថា ពិធីប្រណាំងទូកបែបប្រពៃណីនេះ ប្រារព្ធឡើងក្នុងគោលបំណងដើម្បីចូលរួមប្រារព្ធព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុករបស់ជាតិ ដើម្បីថែរក្សាប្រពៃណីរវាងវត្ត និងសហគមន៍ ដែលធ្លាប់មានមកកុំឲ្យបាត់បង់ និងដើម្បីរំឭកដឹងគុណចំពោះវត្ថុសក្កិសិទ្ធិ និងអស់លោកអ្នកទាំងឡាយដែលតែងតែអភិបាលរក្សានូវទីអារាមរបស់យើងនេះ ឲ្យបានសុខសាន្ត និងសម្បូរសប្បាយ។
ថ្លែងសង្ឃដីកាបើកពិធីប្រណាំងទូក ព្រះវិជ័យរង្សី បណ្ឌិត ឡាច លាង ព្រះរាជាគណៈថ្នាក់កិត្តិយស ព្រះគ្រូប្រាសាទ រង្សី អនុគណក្រុងសៀមរាប ព្រះធម្មធរគណៈខេត្ត បានចាត់ទុកការរៀបចំឲ្យមានពិធីប្រណាំងទូក ក្នុងការលើកតម្កើងវប្បធម៌ជាតិ តាមរយៈព្រះពុទ្ធសាសនា ព្រោះថា ព្រះពុទ្ធសាសនាបានដើរតួនាទីយ៉ាងសំខាន់ និងមានគុណតម្លៃមិនអាចកាត់បានចំពោះសង្គមខ្មែរស្ទើរគ្រប់វិស័យ ដូចជាវិស័យសុខាភិបាល វិស័យសង្គមកិច្ច វប្បធម៌ នយោបាយអប់រំជាដើម។
ព្រះអង្គមានសង្ឃដីកាថា ប្រទេសជាតិយើងទទួលបាននូវសុខសន្តិភាព និងភាពរីកចម្រើនជឿនលឿនលើគ្រប់វិស័យ ជាពិសេសវិស័យពុទ្ធចក្រក៏មានសន្ទុះរីកចម្រើនខ្លាំងក្លាគួរឲ្យមោទនភាពផងដែរ។
តែយ៉ាងណាក៏ដោយ ក៏យើងត្រូវតែធ្វើឲ្យប្រសើរឡើងថែមទៀតនូវកត្តាសំខាន់ៗមួយចំនួន ក្នុងការពង្រឹងអនុវត្តនូវខ្លឹមសារអនុសំវច្ឆរៈមហាសន្និបាតមន្ត្រីសង្ឃទូទាំងប្រទេសឲ្យមានប្រសិទ្ធភាព ការពង្រឹងតួនាទី និងភារកិច្ចមន្ត្រីសង្ឃគ្រប់ថ្នាក់ឱ្យកាន់តែប្រសើរឡើង។ កាត់បន្ថយអធិករណ៍ក្នុងវត្តអារាមឱ្យកាន់តែតិចទៅៗ និងឈានទៅលុបបំបាត់ទាំងស្រុង និងពង្រឹងប្រសិទ្ធភាពនៃការគ្រប់គ្រងវត្តអារាម និងពង្រឹងពុទ្ធិកសិក្សាគ្រប់ភូមិសិក្សា ជាពិសេស ការបង្កើនគំនិតបណ្តុះគុណធម៌ សីលធម៌ ចរិយាធម៌ ឲ្យមានទឹកចិត្តស្រឡាញ់ ការគោរព សន្តោសប្រណី និងការដឹងគុណចំពោះអ្នកមានគុណទាំងឡាយ ជាដើម។
ក្នុងឱកាសនោះដែរ លោកឧត្តមសេនីយ៍ទោ តេង ច័ន្ទណាត ស្នងការនៃស្នងការដ្ឋាននគរបាលខេត្តសៀមរាប មានប្រសាសន៍ថា រាជរដ្ឋាភិបាល បានទទួលស្គាល់នូវតួរនាទីយ៉ាងសំខាន់របស់ព្រះពុទ្ធសាសនាក្នុងសង្គមខ្មែរ ព្រមទាំងបានចារិកទុកក្នុងរដ្ឋធម្មនុញ្ញថា «ព្រះពុទ្ធសាសនា ជាសាសនារបស់រដ្ឋ»។
ក្រោមការដឹកនាំផ្ទាល់របស់សម្តេចតេជោ ហ៊ុន សែន ជានាយករដ្ឋមន្ត្រីជាស្ថាបនិត មគ្គុទេសក៏ឯកសន្តិភាព បានធ្វើឲ្យមានការអភិវឌ្ឍប្រទេសជាតិ និងបានប្រែក្លាយប្រទេសជាតិពីការយកជីវិតជាដើមទុនមកជានីតិរដ្ឋ ការគោរពសិទ្ធិមនុស្ស លទ្ធិប្រជាធិបតេយ្យ និងការអភិវឌ្ឍប្រកបដោយចីរភាព តាមកម្មវិធីនយោបាយ និងយុទ្ធសាស្ត្រចតុកោណគ្រប់ដំណាក់កាល ។
ម្យ៉ាងទៀត វត្តអារាម ព្រះពុទ្ធសាសនា បានរួមចំណែកស្ទើរគ្រប់វិស័យក្នុងការកសាងអភិវឌ្ឍសង្គមកម្ពុជាយើង តាំងពីអតីតរៀងរហូតដល់បច្ចុប្បន្ន ហើយក៏បន្តទៅអនាគតផងដែរ។ ព្រះពុទ្ធសាសនា និងវត្តអារាម ជាចំណុចកណ្ដាលនៃធ្លុងសាមគ្គី ភាពជាតិ និងប្រជាធិបតេយ្យ ពោលគឺគ្មានកន្លែងណាដែលនាំឱ្យប្រជាជនខ្មែរទៅរកសាមគ្គីភាព និងប្រជាធិបតេយ្យបានល្អប្រសើរដូចទីវត្តអារាមឡើយ។
ការរៀបចំពិធីប្រណាំងទូក លក្ខណៈប្រពៃណីឆ្នាំនេះមានរយៈពេលពីរថ្ងៃនៅថ្ងៃទី៥ និងទី៦ ខែវិច្ឆិកា ឆ្នាំ២០២២ មានទូកចូលរួមចំនួន១៣គូរ មកពីបណ្តាភូមិក្នុងសង្កាត់ទឹកវិល ដែលទូកនីមួយៗមានចំណុះ៦នាក់។ លទ្ធផលនៅវគ្គផ្តាច់ព្រ័ត្រ ទូកលេខ១ ដល់លេខ៣ នឹងទទួលបានថវិកាឧបត្ថម្ភប្រមាណជាង១លានរៀល និងពាន១។ ចំណែកទូកដែលមិនជាប់ទទួលពានរង្វាន់១ ក៏ទទួលបានថវិកាលើកទឹកចិត្តផងដែរ៕
ចែករំលែកព័តមាននេះ