ខេត្តកំពង់ស្ពឺ ៖ មុខសញ្ញាលួចម៉ូតូដ៏សកម្មដែលតែងតែធ្វើសកម្មភាពមិនថាយប់ឬថ្ងៃក្នុងភូមិសាស្ត្រស្រុកបសេដ្ឋ ខេត្តកំពង់ស្ពឺ ត្រូវបានសមត្ថកិច្ចចម្រុះតាមក្របួចបានមួយសម្បុក ។
ខេត្តកំពង់ស្ពឺ ៖ មុខសញ្ញាលួចម៉ូតូដ៏សកម្មដែលតែងតែធ្វើសកម្មភាពមិនថាយប់ឬថ្ងៃក្នុងភូមិសាស្ត្រស្រុកបសេដ្ឋ ខេត្តកំពង់ស្ពឺ ត្រូវបានសមត្ថកិច្ចចម្រុះតាមក្របួចបានមួយសម្បុក ។ ការឃាត់ខ្លួននេះធ្វើឡើងថ្ងៃទី២០ ខែមេសា ឆ្នាំ២០១៧ នៅភូមិម្រាលត្នោតខាងជើង ឃុំពោធិម្រាល ស្រុកបសេដ្ឋ ខេត្តកំពង់ស្ពឺ ។
ជនសង្ស័យទី១-ឈ្មោះ ឌុច រដ្ឋា ភេទប្រុស អាយុ៣២ឆ្នាំ រស់នៅកន្លែងឃាត់ខ្លួនខាងលើ, ទី២-ឈ្មោះ ហោ ធូក ភេទប្រុស អាយុ៤១ឆ្នាំ, ទី៣-ឈ្មោះ ពេជ្រ ចាន់ អាយុ៣៣ឆ្នាំ ជាមុខសញ្ញាទើបចេញពីពន្ឋនាគារ, ទី៤-ឈ្មោះ ប៉ែន ណុប ភេទប្រុស អាយុ២៩ឆ្នាំ ក៏ជាមុខសញ្ញាទើបចេញពីពន្ធនាគារដែរ និងទី៥-ឈ្មោះ ញ៉ឹក ស្រីណាក់ ភេទស្រី អាយុ១៩ឆ្នាំ ត្រូវជាប្រពន្ធរបស់ ហោ ធូក ។ នៅក្នុងការឃាត់ខ្លួននេះដែរសមត្ថកិច្ចក៏បានធ្វើការដកហូតបានម៉ូតូចំនួន២គ្រឿងផងដែរ ។ នៅចំពោះមុខសមត្ថកិច្ចក្រុមជនសង្ស័យបានសារភាពថាពួកគេធ្លាប់ធ្វើសកម្មភាពលួចម៉ូតូក្នុងភូមិសាស្ត្រខេត្តកំពង់ស្ពឺចំនួន១១លើក ខេត្តកណ្តាល៤លើក ខេត្តកំពង់ចាម៣លើក ។
ក្នុងចំណោមជនសង្ស័យទាំងអស់មានជនសង្ស័យម្នាក់ឈ្មោះ ឌុច រដ្ឋា អាចមានជាប់ពាក់ព័ន្ធនឹងមន្ត្រីនគរបាលស្រុកបសេដ្ឋផងដែរក្នុងការបើកដៃឱ្យពួកគេធ្វើសកម្មភាពលួចម្តងៗ នេះបើតាមការបង្ហើបប្រាប់ពីមន្ត្រីនគរបាលព្រហ្មទណ្ឌមួយរូបនៅពេលសួរចម្លើយជននេះ ។ បច្ចុប្បន្នក្រុមជនសង្ស័យទាំងនេះត្រូវបានឃាត់ខ្លួននៅស្នងការដ្ឋាននគរបាលខេត្តដោយកម្លាំងជំនាញកំពុងធ្វើការសាកសួរ និងស្រាវជ្រាវរកបក្ខពួកដែលនៅសេសសល់ជាបន្តទៀត ៕
ចែករំលែកព័តមាននេះ