ខេត្តព្រៃវែង ៖ ហិ.ង្សាមួយរវាងបងប្អូនជីដូនមួយបានកើតឡើង ដោយគ្រាន់តែប្រកែកគ្នារឿងលេងបាល់ទះធ្វើឲ្យបងប្រុសដាច់ចិត្តទាញជើងគ្រែវាយមកលើប្អូនដែលជាដៃគូទំនាស់បណ្ដាលឲ្យប៉ោងភ្នែក។
ខេត្តព្រៃវែង ៖ ហិង្សាមួយរវាងបងប្អូនជីដូនមួយបានកើតឡើង ដោយគ្រាន់តែប្រកែកគ្នារឿងលេងបាល់ទះធ្វើឲ្យបងប្រុសដាច់ចិត្តទាញជើងគ្រែវាយមកលើប្អូនដែលជាដៃគូទំនាស់បណ្ដាលឲ្យប៉ោងភ្នែក។ ហេតុការណ៍ហិង្សាខាងលើបានកើតឡើងកាលពីថ្ងៃទី១៨ ខែមេសា ឆ្នាំ២០១៧ វេលាម៉ោង៥ និង០០នាទីល្ងាចនៅចំណុចភូមិ ព្រៃព្នៅ ឃុំព្រៃព្នៅ ស្រុកពារាំង ខេត្តព្រៃវែង។ លោក ស៊ឹម កុសល អធិការស្រុកពារាំង បានឲ្យដឹងថា ជនសង្ស័យដែលជាបងឈ្មោះ ង៉ុយ ខឿន ភេទប្រុស អាយុ២៨ឆ្នាំ មានទីលំនៅភូមិព្រៃព្នៅ ឃុំព្រៃព្នៅ ស្រុកពារាំង ខេត្តព្រៃវែង។
បានទាញជើងគ្រែវាយមកលើជនរងគ្រោះឈ្មោះ រឿន និត ភេទប្រុស អាយុ២៦ឆ្នាំ មានទីលំនៅភូមិឃុំជាមួយគ្នា ដែលត្រូវជាបងប្អូនជីដូនមួយរបស់ខ្លួនបណ្តាលឲ្យរងរបួសជាំភ្នែកខាងឆ្វេងយ៉ាងដំណំ។ លោកអធិការបន្តថា ជនសង្ស័យត្រូវបានឃាត់ខ្លួននៅព្រឹកថ្ងៃទី១៩ ខែមេសានេះគឺបន្ទាប់ពីបានទទួលបណ្ដឹងពីក្រុមគ្រួសារជនរងគ្រោះភ្លាមៗ។
លោកបន្ថែមថា ករណីហិង្សានេះគឺផ្ដើមចេញពីលេងបាល់ទះ ហើយមកប្រកែកគ្នានៅផ្ទះដណ្ដើមរកខុសត្រូវរហូតកើតជាទំនាស់ទើបឈានដល់កើតហិង្សាបែបនេះទៅ។ បច្ចុប្បន្នវត្ថុតាង និងជនសង្ស័យត្រូវបានសមត្ថកិច្ចកសាងសំណុំរឿងដើម្បីចាត់ការតាមនីតិវិធី។ ដោយឡែកជនរងគ្រោះត្រូវបានបញ្ជូនទៅព្យាបាលនៅមន្ទីរពេទ្យ៕
ចែករំលែកព័តមាននេះ