ស័ក្ដិ4បា.ញ់ស័ក្ដិ4ធ្លាយស្មានៅច្រកទ្វារព្រំដែនប៉ោយប៉ែត
រាជធានីភ្នំពេញ ៖ តាមប្រភពពីនាយកដ្ឋានអន្តោប្រវេសន៍ ឱ្យដឹងថា លោកនាយឧត្ដមសេនីយ៍អគ្គនាយក បានស្នើទៅក្រសួងមហាផ្ទៃឱ្យដកមន្ត្រី
រាជធានីភ្នំពេញ ៖ តាមប្រភពពីនាយកដ្ឋានអន្តោប្រវេសន៍ ឱ្យដឹងថា លោកនាយឧត្ដមសេនីយ៍អគ្គនាយក បានស្នើទៅក្រសួងមហាផ្ទៃឱ្យដកមន្ត្រីក្រោមឱវាទឈ្មោះ ឈាន ពិសិដ្ឋ ចេញពីក្របខ័ណ្ឌមន្ត្រីនគរបាលអន្តោប្រវេសន៍ បន្ទាប់ពីប៉ូលិសស័ក្ដិ៤រូបនោះ បានបាញ់ប៉ូលិសស័ក្ដិ៤អន្តោប្រវេសន៍ ដែលធ្វើការជាមួយគ្នាឲ្យរបួសត្រង់ស្មា ហើយបានគេចខ្លួនបាត់ ។
បើរំលឹកពីឈ្មោះ ឈាន ពិសិដ្ឋ នេះ ត្រូវបានគេនឹកទៅដល់រឿងដួលធ្វើជាសន្លប់កណ្ដាលផ្លូវមុខរថយន្ដ លោក ឌិន វុទ្ធី ដែលជាប្រធានសមាគមពង្រឹងសេដ្ឋកិច្ចក្រៅប្រព័ន្ធ ដោយចោទថា រថយន្ដបុក ។ សូម្បីលោក ឌិន វុទ្ធី ខ្លួនឯងក៏មិននឹកស្មានថារឿងដួលមុខរថយន្ដចោទថាបុកទៅវិញបែបនេះទេ ។ អ្វីដែលគួរឱ្យកត់សម្គាល់ពេលនោះ គឺលោក ឈាន ពិសិដ្ឋ ដែលជានាយរងប៉ូលិសអន្ដោប្រវេសន៍ច្រកប៉ោយប៉ែត ត្រូវបានអង្គភាពតុលាការ រហូតដល់មន្ដ្រីជាន់ខ្ពស់នានា ចេញមុខគាំទ្រពីការដួលមុខរថយន្ដនោះទៀតផង ធ្វើឱ្យលោក ឌិន វុទ្ធី ត្រូវចាប់ខ្លួនដាក់ពន្ធនាគារជាបណ្ដោះអាសន្ន ហើយក៏ត្រូវបានដោះលែងឱ្យនៅក្រៅឃុំបណ្ដោះអាសន្នរបស់សាលាឧទ្ធរណ៍ ។
ពេលនេះកើតមានរឿងថ្មីទៀត ដែលប្រព្រឹត្ដិឡើងដោយនាយប៉ូលិសអន្ដោប្រវេសន៍រូបនេះ បានបង្ហាញថា មន្ដ្រីប៉ូលិសម្នាក់នេះបាន «លក់មុខ» ថ្នាក់លើរបស់ខ្លួនគួរឱ្យអាម៉ាសណាស់ ។ អគ្គស្នងការរងនគរបាលជាតិ និងជាអគ្គនាយកនៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ លោកនាយឧត្ដមសេនីយ៍ សុខ ផល ត្រូវបានវិទ្យុអាស៊ីសេរីនៅព្រឹកថ្ងៃទី១០ មេសា បានផ្សាយថា ការស្នើដកមន្ត្រីរូបនេះ ជាការអនុវត្តតាមវិន័យកងកម្លាំង និងដើម្បីឲ្យជនរងគ្រោះប្ដឹងបុគ្គលនោះទៅតុលាការតាមច្បាប់ ។ លោក ឈាន ពិសិដ្ឋ ក៏មិនបានបង្ហាញខ្លួនដល់ប្រធានអង្គភាពដែលបានកោះហៅមកបំភ្លឺនៅព្រឹកថ្ងៃដដែលនេះដែរ ដែលតាមប្រភពថា លោក ពិសិដ្ឋ ទំនងដាក់សាប៊ូគូទផ្លោងខ្លួនចូលស្រុកថៃបាត់ទៅហើយ ។
មានរឿងធំមួយកើតឡើងកាលពីថ្ងៃទី០៩ មេសា មានការផ្ទុះអាវុធមួយក្នុងប៉ុស្តិ៍ប៉ូលិសអន្តោប្រវេសន៍ច្រកទ្វារអន្តរជាតិប៉ោយប៉ែត។ ហេតុការណ៍កើតឡើងនេះត្រូវបានមន្ត្រីនគរបាលអន្តោប្រវេសន៍ច្រកទ្វារព្រំដែនប៉ោយប៉ែត ឲ្យដឹងថា នាយរងប៉ុស្តិ៍អន្តោប្រវេសន៍លោក ឈាន ពិសិដ្ឋ បានបាញ់មន្ត្រីនគរបាលធ្វើការជាមួយគ្នា គឺនាយផ្នែកសេនាធិការ លោក សេម មករា ពីក្រោយបណ្ដាលឲ្យរបួសត្រង់ស្មា តែមិនប៉ះពាល់ដល់អាយុជីវិតទេ ដោយសារតែការបាញ់នេះមិនចំគោលដៅ ។
ចំណែកមន្ត្រីប៉ូលិសរងគ្រោះ គឺលោក សេម មករា ត្រូវបានប្រភពដកស្រង់សម្ដីថា នៅថ្ងៃកើតហេតុនោះ លោកបានហៅបុគ្គលដែលមានជម្លោះនឹងគ្នា គឺលោក ឈាន ពិសិដ្ឋ និងមន្ត្រីបំពេញបែបបទឆ្លងដែន លោក គឹម កែវរក្សា មកធ្វើការអប់រំ ។ ពេលនោះឈ្មោះ ឈាន ពិសិដ្ឋ បានជិះរថយន្តមកដល់ ហើយស្រែកជេរខ្លាំងៗ ទៅលើរូបលោកតែម្ដង ដោយមិនបានដឹងពីមូលហេតុអ្វីច្បាស់លាស់ឡើយ ។
លោកក៏បានចេញពីបន្ទប់មកសួរនាំ ហើយ ក៏ដើរចូលទៅក្នុងបន្ទប់វិញ ស្រាប់តែឈ្មោះ ឈាន ពិសិដ្ឋ ដកកាំភ្លើងបាញ់មកលើរូបលោកពីក្រោយក្នុងចេតនាប៉ុនប៉ងសម្លាប់ តែសំណាងល្អគ្រាប់ត្រូវចំស្មា ។ លោកនាយផ្នែកសេនាធិការរូបនេះប្រាប់ទៀតថា លោកនឹងដាក់បណ្តឹងទៅថ្នាក់ដឹកនាំដេីម្បីទាមទាររកយុត្តិធម៌ ។
ករណីរងការចោទប្រកាន់ខាងលើ លោកសក្ដិ៤ ឈាន ពិសិដ្ឋ មិនអាចទាក់ទងសុំការបំភ្លឺបានទេ ដោយទូរស័ព្ទរបស់លោកចុចមិនចូលជាច្រើនដងខណៈប្រភពពីសមត្ថកិច្ចនិយាយថា ក្រោយកើតមានបញ្ហាលោក ឈាន ពិសិដ្ឋ បានចេញពីកម្ពុជាទៅប្រទេសថៃ មិនទាន់វិលត្រឡប់នៅឡើយទេ គិតត្រឹមព្រលប់ថ្ងៃដដែលនោះ ។
ជុំវិញបញ្ហាខាងលើ លោកឧត្តមសេនីយ៍ត្រី ស៊ឹម សំអាត នាយប៉ុស្តិ៍នគរបាលអន្តោប្រវេសន៍ព្រំដែនច្រកទ្វារអន្តរជាតិប៉ោយប៉ែត មិនអាចទាក់ទងសុំការបំភ្លឺបានទេនៅរសៀលថ្ងៃដដែលនេះ ។
យោងតាមរបាយការណ៍បំភ្លឺពីការផ្ទុះអាវុធចំនួនមួយគ្រាប់នៅក្នុងអង្គភាព គឺប៉ុស្ដិ៍នគរបាលច្រកទ្វារព្រំដែនអន្ដរជាតិប៉ោយប៉ែត បានឱ្យដឹងថា កាលពីថ្ងៃទី៧ ខែមេសា ឆ្នាំ២០១៧ វេលាម៉ោង១៩និង៣០នាទី លោកអនុសេនីយ៍ទោ នៅ លីដា ដែលជាមន្ដ្រីផ្នែករដ្ឋបាល បានយកលិខិតឆ្លងដែនចំនួន៦ក្បាល ដែលជាភ្ញៀវរបស់អង្គភាពទៅប្រថាប់ត្រាចូលប្រទេស ។ នៅពេលទៅដល់ផ្នែកបែបបទ ដែលមានអនុសេនីយ៍ឯក កឹម កែវរក្សា ដែលជាមន្ដ្រីប្រថាប់ត្រា បានពោលពាក្យមិនគួរគប្បីដែលធ្វើឱ្យលោកអនុសេនីយ៍ទោ នៅ លីដា ខឹងនឹងមិនអាចទទួលយកបាននោះ គឺពាក្យប្រមាថថា «អាកញ្ចៈគេ» ។ បន្តាប់ពីប្រថាប់ត្រារួចរាល់ហើយ លោកអនុសេនីយ៍ទោ នៅ លីដា បាននិយាយតបវិញថា អញមិនអាចទទួលយកបានទេនូវសម្ដីរបស់ឯង ហើយក៏ដើរចេញត្រឡប់មកផ្នែករដ្ឋបាលវិញទាំងឈឺចាប់ ។
លុះមកដល់ព្រឹកថ្ងៃទី៩ ខែមេសា ឆ្នាំ២០១៧ លោកអនុសេនីយ៍ទោ នៅ លីដា បានយកលិខិតឆ្លងដែនចំនួន៤ក្បាលទៀត ជាភ្ញៀវរបស់អង្គភាពយកទៅប្រថាប់ត្រាចូលប្រទេស ពេលនោះលោកអនុសេនីយ៍ឯក កឹម កែវរក្សា បានស្រែកទៅក្រៅថា នែ «អាកញ្ចៈគេ» មកនេះ ។ ពេលនោះលោកអនុសេនីយ៍ទោ នៅ លីដា ឮពាក្យប្រមាថដដែល ក្នុងហ្វូងមនុស្សដ៏ច្រើន ក៏បានជេរតបវិញ រួចក៏ដើរសំដៅទៅរកលោកអនុសេនីយ៍ឯក កឹម កែវរក្សា ក្នុងគោលបំណងវៃគ្នា ។ ពេលនោះលោកសក្ដិ៤ ឈាន ពិសិដ្ឋ ស្រែកឱ្យលោកអនុសេនីយ៍ទោ នៅ លីដា ថា ហ្អែងមកឡូឡាស្អីនៅកន្លែងនេះ? បន្ទាប់មកត្រូវបានកម្លាំងប្រចាំការនៅទីនោះឃាត់ និងបំបែកឱ្យត្រឡប់ទៅកាន់កន្លែងរៀងៗខ្លួន ព្រោះពួកគេក្រហមមុខដាក់គ្នាពេក ។
ក្រោយមកនៅវេលាម៉ោង៨និង១៥នាទីថ្ងៃទី៩ ខែមេសា ឆ្នាំ២០១៧ លោកសក្ដិ៤ សេម មករា នាយផ្នែករដ្ឋបាលបានដឹងរឿងនេះ ក៏បញ្ជាឱ្យហៅអ្នកទាំងពីរ (លោក កឹម កែវរក្សា និងលោក នៅ លីដា) មកអង្គភាពដើម្បីសួរនាំក្នុងគោលបំណង ឱ្យសម្របសម្រួលគ្នាឡើងវិញ ។ ស្រាប់តែពេលនោះលោកសក្ដិ៤ ឈាន ពិសិដ្ឋ បានបើករថយន្ដមកជាមួយលោកអនុសេនីយ៍ឯក កឹម កែវរក្សា ចូលក្នុងអង្គភាព រួចក៏ដើរសំដៅទៅបន្ទប់រដ្ឋបាល ។
ពេលនោះលោកសក្ដិ៤ សេម មករា ក៏បើកទ្វារចេញមកល្មម ហើយត្រូវលោកសក្ដិ៤ ឈាន ពិសិដ្ឋ ដើរចូលដកកាំភ្លើងភ្ជង់និងជេរប្រមាថ ទៅលើលោកសក្ដិ៤ សេម មករា ។ តែលោកសក្ដិ៤ សេម មករា មិនតបតទេ ក៏ដើរទៅគោះទ្វារបន្ទប់លោកនាយប៉ុស្ដិ៍ ដែលនៅជិតបន្ទប់រដ្ឋបាលឱ្យជួយអន្ដរាគន៍ ។ ភ្លាមៗនោះលោកនាយប៉ុស្ដិ៍ បានបើកទ្វារចេញមកសួរថាមានរឿងអ្វី? លោកសក្ដិ៤ សេម មករា បានរាយការណ៍ថា លោកសក្ដិ៤ ឈាន ពិសិដ្ឋ រកបាញ់គាត់ ហើយគាត់ក៏ដើរត្រឡប់មកបន្ទប់រដ្ឋបាលវិញ ។
ប្រភពព័ត៌មានដដែលប្រាប់ទៀតថា នៅវេលាម៉ោង៨និង៤៥នាទី នៅពេលដែលគាត់មកដល់មុខបន្ទប់ ក៏ត្រូវបានលោកសក្ដិ៤ ឈាន ពិសិដ្ឋ បាញ់មួយគ្រាប់ពីក្រោយខ្នងសំដៅលោកសក្ដិ៤ សេម មករា ត្រូវចំសក្ដិដាច់ធ្លាក់លើឥដ្ឋ ។ បន្ទាប់ពីផ្ទុះអាវុធរួចមក លោកនាយប៉ុស្ដិ៍ និងលោកអនុសេនីយ៍ឯក កឹម កែវរក្សា បានចាប់ដកយកកាំភ្លើងខ្លីពីលោកសក្ដិ៤ ឈាន ពិសិដ្ឋ ដោយឱ្យលោកសក្ដិ៤ នួន ច័ន្ទសុភ័ក្រ ទៅសម្របសម្រួលលោកសក្ដិ៤ សេម មករា ព្រោះនៅក្នុងបន្ទប់រដ្ឋបាលក៏មានអាវុធAK៤៧ ចំនួន២ដើមផងដែរ ។ ភ្លាមនោះលោកនាយប៉ុស្ដិ៍បានបញ្ជាឱ្យលោកអនុសេនីយ៍ឯក កឹម កែវរក្សា ជូនលោកសក្ដិ៤ ឈាន ពិសិដ្ឋ ជាប៉ូលិសដៃដល់ទៅលំនៅឋាន ដើម្បីបញ្ចៀសរាល់បញ្ហាដែលអាចកើតឡើងធ្ងន់ធ្ងរជាងនេះ ។
ក្រោយពេលកើតហេតុអង្គភាពបានប្រមូលវត្ថុតាងរួចមាន កាំភ្លើងខ្លីប៉េអាកុលមួយដើមលេខ ៤-៧៩៩៧ បង់មួយមានគ្រាប់ចំនួន៧គ្រាប់ សំបកកាទុស១គ្រាប់ ដែលបាញ់រួច ឯកសណ្ឋាននគរបាលជាតិ និងសក្ដិរបស់លោកសក្ដិ៤ សេម មករា ធ្លាក់ពីលើស្មាខាងឆ្វេងមានស្លាកស្នាមត្រូវគ្រាប់កាំភ្លើង ហើយបានប្រមូលនិងបញ្ជូនទៅការិយាល័យដើម្បីធ្វើវត្ថុតាង ។
ចំណែកឯលោកសក្ដិ៤ ឈាន ពិសិដ្ឋ និងលោកអនុសេនីយ៍ឯក កឹម កែវរក្សា លោកនាយប៉ុស្ដិ៍បានបញ្ជាតាមទូរស័ព្ទឱ្យឡើងទៅបំភ្លឺនៅការិយាល័យ នៅថ្ងៃចន្ទទី១០ ខែមករា ឆ្នាំ២០១៧ ហើយសាមុីខ្លួនក៏បានឯកភាពផងដែរ តែគេមិនឃើញវត្ដមានលោក ឈាន ពិសិដ្ឋ ចូលបំភ្លឺនោះទេ ទំនងភ័យខ្លាច រត់ទាំងខ្លួន រត់ទាំងព្រលឹងគេចបាត់ទៅហើយ ៕
ចែករំលែកព័តមាននេះ