ខេត្តប៉ៃលិន៖ កម្លាំងនគរបាលអធិការស្រុកសាលាក្រៅ បានចុះធ្វើវិធានការរដ្ឋបាល អប់រំណែនាំ​ស្ត្រី ៥នាក់ ដែលនាំគ្នា លេងល្បែងស៊ីសង (លេងបៀរ) ហើយ​ផាកពិន័យ និងថតរូប​វាស់កម្ពស់​។ ហេតុការណ៍នគរបាល ចុះចាប់ស្ត្រីលេងបៀរនោះ បានធ្វើឡើង កាលពីវេលាម៉ោង ៣ និង ៣០នាទី រសៀលថ្ងៃទី២៥ ខែតុលា ឆ្នាំ២០២២ ស្ថិតនៅក្នុងភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន។

ប្រភពព័ត៌មាន​ បានឱ្យដឹងថា ​ក្រុមញៀននឹងល្បែងស៊ីសង ដែលនគរបាលចាប់ឃាត់ខ្លួនទាំង ០៥នាក់នោះ មានឈ្មោះ​៖ ទី១ – ឈ្មោះ សំ កុលាប ភេទស្រី អាយុ ៣៣ឆ្នាំ។ ទី២ – ឈ្មោះ ថៃ សាវុធ ភេទស្រី អាយុ ៣៧ឆ្នាំ ទី៣ – ឈ្មោះ ភិវឌ្ឍ គុន្ធា ភេទស្រី អាយុ ៣៤ឆ្នាំ។ ៤ – ឈ្មោះ ឃឿន ឃាន ភេទស្រី អាយុ ៣៣ឆ្នាំ និង​ទី៥ – ឈ្មោះ រ៉ាត់ សារួន ភេទស្រី អាយុ ៥៧ឆ្នាំ។​ ទាំងអស់គ្នា រស់នៅភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន។

ពាក់ព័ន្ធនឹងបញ្ហានេះ នគរបាល បាន​ដកហូតវត្ថុតាង រួមមាន៖ បៀរចំនួន ០១ហ៊ូ កំរាលសំរាប់លេងចំនួន ០១កំរាល និងកន្ទេលចំនួន ០១។ ក្រោយពី​អប់រំណែនាំ​ និងផាកពិន័យរួច ស្ត្រីទាំង ៥នាក់ បានសន្យាថា រាងចាល ឈប់លេងបៀរទៀតហើយ។ ប៉ូលិស ក៏បានអនុញ្ញាតឱ្យស្ត្រីទាំងនោះ វិល​ត្រឡប់ទៅផ្ទះវិញ៕ នីយ៉ា