រាជធានីភ្នំពេញ ៖ កាលពីម្សិលមិញក្រសួងវប្បធម៌ បានចេញសេចក្តីប្រកាសព័ត៌មានជម្រាបជូនសាធារណជន ឱ្យបានជ្រាបថា បន្ទាប់ពីបានដាក់បញ្ចូលចាប៉ីដងវែងខ្មែរនៅក្នុងបញ្ជីបេតិកភណ្ឌវប្បធម៌
រាជធានីភ្នំពេញ ៖ កាលពីម្សិលមិញក្រសួងវប្បធម៌ បានចេញសេចក្តីប្រកាសព័ត៌មានជម្រាបជូនសាធារណជន ឱ្យបានជ្រាបថា បន្ទាប់ពីបានដាក់បញ្ចូលចាប៉ីដងវែងខ្មែរនៅក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ កាលពីថ្ងៃទី៣០ ខែវិច្ឆិកា ឆ្នាំ២០១៦រួចមក ក្រុមបច្ចេកទេសរបស់ក្រសួងបានបន្តសិក្សារៀបចំឯកសារល្ខោនខោលខ្មែរ ដើម្បីស្នើសុំចុះក្នុងបញ្ជីបញ្ជីបេតិកភណ្ឌវប្បធម៌អរូបីនៃមនុស្សជាតិ ។
ឯកសារល្ខោនខោលបានផ្ញើជូនអង្គការយូណេស្កូ នៅព្រឹកថ្ងៃទី២៩ ខែមីនា ឆ្នាំ២០១៧ និងបានទទួលការឆ្លើយតបជាផ្លូវការពីអង្គការយូណេស្កូនៅរសៀលថ្ងៃដដែល ។
ជាមួយគ្នានេះឯកសារគុនល្បុក្កតោខ្មែរ ក៏បានផ្ញើជូនអង្គការយូណេស្កូ ដើម្បីស្នើសុំចុះក្នុងបញ្ជីបេតិកកភណ្ឌវប្បធម៌អរូបីនៃមនុស្សជាតិផងដែរ ។
ក្រសួងវប្បធម៌និងវិចិត្រសិល្បៈបញ្ជាក់ថា តាមគោលការណ៍ និងនីតិវិធីរបស់អង្គការយូណេស្កូ ឯកសារ នីមួយៗដែលដាក់ស្នើសុំ ត្រូវឆ្លងកាត់ការពិនិត្យវាយតម្លៃជាច្រើនដំណាក់កាលពីក្រុមជំនាញអន្តរជាតិ មុននឹងដាក់ជូនការពិនិត្យសម្រេចក្នុងកិច្ចប្រជុំគណៈកម្មាធិការអន្តររដ្ឋាភិបាលនៃអង្គការយូណេស្កូ ដែលនឹងប្រព្រឹត្តទៅនៅចុងឆ្នាំ២០១៨ខាងមុខ ។
ក្រុមបច្ចេកទេសរបស់ក្រសួងវប្បធម៌ និងវិចិត្រសិល្បៈបាននិងកំពុងបន្តខិតតខំសិក្សារៀបចំឯកសារមរតកវប្បធម៌អរូបី ផ្សេងៗទៀតរបស់ជាតិ មានជាអាទិ៍ ភ្លេងអារក្ខ តម្បាញសូត្រខ្មែរ ដើម្បីត្រៀមដាក់ស្នើទៅអង្គការយូណេស្កូ ។
កន្លងមកបេតិកភណ្ឌកម្ពុជាមួយចំនួនបានចុះបញ្ជីជាបេតិកភណ្ឌពិភពលោក ដូចជាប្រាសាទព្រះវិហារ ចាប៉ីដងវែង និងតំបន់អង្គរជាដើម ។
ពេលនេះក្រសួងវប្បធម៌ និងវិចិត្រសិល្បៈបានរៀបចំឯកសារល្ខោនខោល សុំចុះក្នុងបញ្ជីបេតិកភណ្ឌពិភពលោកទៀត ហើយរង់ចាំលទ្ធផលនាពេលខាងមុខ ៕
ចែករំលែកព័តមាននេះ