រវល់ទៅសែនឆែងម៉េងចោរគាស់ផ្ទះលួចអស់របស់មានតម្លៃ
ខេត្តកណ្ដាល ៖ គ្រួសារមួយជាប់សែស្រឡាយចិនដោយសារតែរវល់ទៅសែនសង្កត់ថ្នូរ(សែនឆេងម៉េង)អត់មានអ្នកនៅចាំផ្ទះចាក់សោរផ្ទះទុកផ្ញើអ្នកជិតខាងជួយមើលឱ្យ
ខេត្តកណ្ដាល ៖ គ្រួសារមួយជាប់សែស្រឡាយចិនដោយសារតែរវល់ទៅសែនសង្កត់ថ្នូរ(សែនឆេងម៉េង)អត់មានអ្នកនៅចាំផ្ទះចាក់សោរផ្ទះទុកផ្ញើអ្នកជិតខាងជួយមើលឱ្យ ត្រូវចោរគាស់ផ្ទះចូលលួចអស់របស់មានតម្លៃអស់ជាច្រើនកាលពីចន្លោះម៉ោងជាង៨ព្រឹកថ្ងៃទី២ ខែមេសា ឆ្នាំ២០១៧ នៅភូមិព្រែកគង់ ឃុំសំពៅពូន ស្រុកកោះធំ ខេត្តកណ្ដាល ។ មន្ត្រីនគរបាលស្រុកកោះធំបានឱ្យដឹងថា ជនរងគ្រោះជាម្ចាស់ផ្ទះឈ្មោះ ឃុន លាងឆេង ភេទស្រី អាយុ៣៧ឆ្នាំ ជនជាតិខ្មែរ មានទីលំនៅភូមិព្រែកគង់ ឃុំសំពៅពូន ស្រុកកោះធំ ខេត្តកណ្ដាល ជាអាជីវករលក់ចាប់ហួយ ។
ជនរងគ្រោះបានប្រាប់នគរបាលថា សម្ភារដែលបាត់បង់មានខ្សែដៃមាសចំនួន២ខ្សែទម្ងន់៣តម្លឹង ខ្សែដៃផ្លាកទីន ចំនួន១ខ្សែ ខ្សែ.កផ្លាកទីនចំនួន១ខ្សែ ចិញ្ចៀនផ្លាកទីនចំនួន២វង់ ក្រវិលផ្លាកទីនចំនួន១គូ និងអត្តសញ្ញាណប័ណ្ណសញ្ជាតិខ្មែរចំនួន៣សន្លឹក ។ នគរបាលបានឱ្យដឹងបន្ថែមទៀតថា នៅព្រឹកថ្ងៃទី២ ខែមេសា ឆ្នាំ២០១៧ វេលាម៉ោង៦និង៣០នាទីជនរងគ្រោះបានរៀបចំចាក់សោរផ្ទះហើយក្រុមគ្រួសារជនរងគ្រោះបានទៅចូលរួមសែនសង្កត់ថ្នូរ (សែនឆេងម៉េង) នៅឯផ្ទះឪពុកមាក្នុងភូមិព្រែកស្បូវ ឃុំសំពៅពូន ស្រុកកោះធំ ខេត្តកណ្ដាល ។ ដោយបានចាក់សោបិទទ្វាផ្ទះទុកគ្មានអ្នកនៅចាំផ្ទះទេ និងបានផ្ដាំផ្ញើឈ្មោះ អឿន សុខុម ជាអ្នកលក់ទឹកអំពៅខាងមុខផ្ទះខ្លួនឱ្យជួយមើលផងដែរ ។
លុះនៅម៉ោងប្រមាណ៨និង៤០នាទីព្រឹកថ្ងៃដដែលមានអ្នកជិតខាងបានឃើញទ្វាផ្ទះខាងក្រោយរបស់ជនរងគ្រោះចំហ រួចដើរទៅមើលក៏ឃើញបន្ទប់ក្នុងផ្ទះចំហហើយមេសោររបូតនៅនឹងដីរួចក៏បានប្រាប់ឈ្មោះ អឿន សុខុម ដែលលក់ទឹកអំពៅនៅខាងមុខនោះ ពេលនោះ អឿន សុខុម ក៏បានទូរស័ព្ទទៅជនរងគ្រោះថា ផ្ទះជនរងគ្រោះត្រូវបានគេលួចគាស់ចូល ភ្លាមនោះជនរងគ្រោះបានធ្វើដំណើរត្រលប់មកផ្ទះវិញភ្លាមៗ ។
ពេលមកដល់ជនរងគ្រោះបានចាក់សោរចូលក្នុងផ្ទះហើយបានឃើញក្នុងបន្ទប់ដេករបស់ខ្លួនចំហរួចក៏ចូលទៅក្នុងបន្ទប់ឃើញសំលៀកបំពាក់ត្រូវចោររើរប៉ាត់រប៉ាយពេញបន្ទប់ ហើយគ្រឿងអលង្ការមានតម្លៃ មាស ផ្លាកទីន និងអត្តសញ្ញាណប័ណ្ណ បានបាត់អស់ដូចខាងលើនោះដែលដាក់ទុកក្នុងទូរកញ្ចក់ ។ ចំណែកឯទ្វាផ្ទះខាងក្រោយត្រូវបានបើកចំហ និងចំរឹងដែកបង្អួចផ្ទះបាយមានស្នាមគាស់បំបាក់ចូល ។ លោកអធិការនគរបាលស្រុកកោះធំបានឱ្យដឹងថា ករណីនេះនគរបាលជំនាញ និងប៉ុស្ដិ៍នគរបាលរដ្ឋបាលសំពៅពូនបានចុះដល់កន្លែងកើតហេតុ និងកំពុងបន្តស្រាវជ្រាវដើម្បីកំណត់មុខសញ្ញាជនសង្ស័យ ៕
ចែករំលែកព័តមាននេះ