រាជធានីភ្នំពេញ ៖ តារាចម្រៀងអុ្នកនាង ម៉េង កែវពេជ្ជតា បានព្រមានលោករ័ត្ន មករា ឲ្យឈប់និយាយមិនពិតពីរឿងស្នេហ៍រវាងនាង និងលោក នាំឲ្យមានការភាន់ច្រឡំពីមហាជន ដោយរឿងនេះបាន
រាជធានីភ្នំពេញ ៖ តារាចម្រៀងអុ្នកនាង ម៉េង កែវពេជ្ជតា បានព្រមានលោករ័ត្ន មករា ឲ្យឈប់និយាយមិនពិតពីរឿងស្នេហ៍រវាងនាង និងលោក នាំឲ្យមានការភាន់ច្រឡំពីមហាជន ដោយរឿងនេះបានលេចឮជាយូរមកហើយរហូតដល់បច្ចុប្បន្ន ។
ការព្រមានរបស់អ្នកនាងម៉េង កែវពេជ្ជតា នាពេល ថ្មីៗកន្លងមកបន្ទាប់ពីលោករ័ត្ន មករា បានបង្ហោះសារលើហ្វេសប៊ុកជាភាសាស្នេហាផ្កាសម្តី នាំឱ្យមហាជនសង្ស័យទៅលើរូបនាង។
អ្នកនាងម៉េង កែវពេជ្ជតា និងលោករ័ត្នមករា ត្រូវមហាជន និងអ្នកសិល្បៈសង្ស័យថាភ្ជាប់ចំណងស្នេហ៍នឹងគ្នា ដ្បិតឃើញបណ្តើរគ្នាញឹកញាប់ និងចាប់ដៃគូគ្នាច្រៀងនៅលើឆាកតន្ត្រីនានា ។
អ្នកនាងម៉េង កែវពេជ្ជតា បានបដិសេធ និងចាត់ទុករឿងស្នេហ៍នោះជាការនិយាយពីមួយទៅមួយទាំងមិនពិត និងស្នើកុំឲ្យមានការភាន់ច្រឡំ ។
នៅលើហ្វេសប៊ុករបស់អ្នកនាងម៉េង កែវពេជ្ជតា បានបង្ហោះសារបញ្ជាក់ថា «មើលមុខឱ្យច្បាស់ ! មនុស្សខ្ញុំហ៊ានធ្វើ ហ៊ានទទួល ។ តាមភាសាអ្នកលេងនិយាយថាហ៊ានស៊ី គឺហ៊ានសង សមជាចិត្តកូនម៉ែ ! យ៉ាងណាមិញ រឿងដែលថា រ័ត្ន មករា មានសម្ព័ន្ធភាពស្នេហាជាមួយខ្ញុំនោះ បើជារឿងពិតមែន ខ្ញុំក៏មិនខ្លាចនឹងទទួលដែរ ប៉ុន្តែនេះវាគ្មានទាល់តែសោះ ។ ដូច្នេះសូមម្នាលទាំងឡាយដែលបានយករឿងនេះទៅនិយាយឱ្យក្អែកមួយក្លាយជាដប់នោះ ល្មមសម្រាកបានហើយ កុំយកខ្ញុំទៅលេងសើចទៀតបើមិនចង់មានរឿង ។
សូមអធ្យាស្រ័យផងបងប្អូន ដែលខ្ញុំយកអារម្មណ៍មិនសប្បាយចិត្តមកបញ្ចេញនៅទីនេះ ក៏សូមអធ្យាស្រ័យម្ចាស់ខ្លួនដែលខ្ញុំយកឈ្មោះលោកមកនិយាយ ប៉ុន្តែនេះក៏ព្រោះតែលោកមិនព្រមបកស្រាយតាមការណ៍ពិតទេ តែលោកហាក់មានចេតនាចាក់បណ្តោយឱ្យគេកាន់តែយល់ខុសលើខ្ញុំលើសដើម ។ មិនតែប៉ុណ្ណឹងលោកបែរជាដើរនិយាយមុសាប្រាប់ពីម្នាក់ទៅម្នាក់ធ្វើឱ្យគេសើចយំខ្ញុំ ឱ្យគេមើលងាយខ្ញុំម្តងហើយម្តងទៀត ដោយលោកមិនខ្វល់ពីកិត្តិយសស្ត្រីម្នាក់ក្នុងនាមជារៀមច្បងលោក ជាអ្នកធ្លាប់ផ្តល់តម្លៃឱ្យលោកបន្តិចសោះ ។
ខ្ញុំបានទុកពេលឱ្យលោកជម្រះភាពអាប់ឱននេះជាយូរណាស់មកហើយ តែលោកនៅតែធ្វើមិនដឹងមិនឮ ផ្ទុយទៅវិញលោកបែរជាកាន់តែថែមគ្រឿងថែមល្បោយបន្តរហូតមិនឈប់ដូចឃើញលើរូបភាពនេះស្រាប់ ។ បើដូច្នេះខ្ញុំគ្មានជំរើសទេ ខ្ញុំមិនអាចឱ្យឱកាសទៅនរណាទៀតទេ។ ខ្ញុំមិនអាចគិតតែពីទុកមុខ ទុកកិត្តិយសឱ្យលោកទាំងលោកមិនដែលគិតពីកិត្តិយសខ្ញុំនោះឡើយ !
សូមលោកឈប់ចាប់ពីពេលនេះ ម៉ោងនេះ ថ្ងៃនេះ បើនៅចង់រាប់អាន តែបើលោកមិនព្រមឈប់បំផ្លាញខ្ញុំទេ ចង់ដឹងសាកមើលក៏បាន ព្រោះថាមិនមែនតែខ្ញុំម្នាក់ គឺនៅមានមនុស្សជាច្រើនទៀត ដែលកំពុងមិនសប្បាយចិត្តនឹងលោក ។
ចុងបញ្ចប់ ខ្ញុំចង់ប្រាប់ទៅម្នាលចូលចិត្តស៊ីត្រាវបង្កាច់បង្ខូចខ្ញុំទាំងស្រីទាំងប្រុសទាំងនោះថា សមត្ថភាពប៉ុនខ្ញុំ មិនពិបាករកប្តីល្អខ្ពង់ខ្ពស់ជាងនេះទេ គ្រាន់តែមិនចង់ប៉ុណ្ណោះ។ មិនដូច នាងៗ ចូលចិត្តស៊ី ស៊ីមិនរើសមុខ ស៊ីមិនមើលស្បែកខ្លួនឯង ស៊ីមិនគិតពីសុខភាពខ្លួនឯង ។
បើអ្នកណាចង់តវ៉ា សូមចេញមុខចេញឈ្មោះ ឱ្យច្បាស់មក ខ្ញុំស្វាគមន៍ តែកុំពាក់មុខ បិទម៉ាស់មកនិយាយ បើមិនដូច្នេះទេ មតិរបស់អ្នក យើងចាត់ទុកជាលាមក» ។
ជាការឆ្លើយតបលោករ័ត្ន មករា បានចេញវីដេអូឃ្លីបមួយអះអាងថា ភាសាសរសេរនៅលើហ្វេសប៊ុកនោះមិនមែនលោកជាអ្នកសរសេរទេ គឺសរសេរតាមន័យបទចម្រៀងដោយតារាចម្រៀងផ្សេងម្នាក់ទៀត ។
លោករ័ត្ន មករា បានស្នើឲ្យអ្នកផ្សេងឈប់កកូរកកាយរឿងនោះទៀត ដែលនាំឲ្យមានបញ្ហារវាងលោក និងអ្នកនាងម៉េង កែវពេជ្ជតា ៕
ចែករំលែកព័តមាននេះ