Elon Musk ថា តៃវ៉ាន់គួរជាតំបន់រដ្ឋបាលពិសេសចិន ត្រូវតៃវ៉ាន់តបមួយឃ្លាយ៉ាងចាក់ដោត
តៃវ៉ាន់ ៖ ទីក្រុងប៉េកាំង និងតៃប៉ិ បានចេញនិយាយរៀងៗខ្លួន បន្ទាប់ពីមហាសេដ្ឋីលេខមួយ
តៃវ៉ាន់ ៖ ទីក្រុងប៉េកាំង និងតៃប៉ិ បានចេញនិយាយរៀងៗខ្លួន បន្ទាប់ពីមហាសេដ្ឋីលេខមួយពិភពលោក Elon Musk បាននិយាយថា តៃវ៉ាន់គួរក្លាយជាតំបន់រដ្ឋបាលពិសេសរបស់ចិន។
ស្ថាបនិកក្រុមហ៊ុនរថយន្តអគ្គិសនី Tesla រូបនេះនិយាយក្នុងកិច្ចសម្ភាសន៍ជាមួយកាសែត Financial Times ដូច្នេះថា លោកជឿជាក់ថា រដ្ឋាភិបាលទាំងពីរអាចឈានដល់ការរៀបចំសមហេតុផល។
ជុំវិញការថ្លែងរបស់លោក Elon Musk ឯកអគ្គរដ្ឋទូតចិនប្រចាំអាមេរិកបានសាទរចំពោះលោក ប៉ុន្តែឯកអគ្គរដ្ឋទូតតៃវ៉ាន់ឆ្លើយតបវិញថា សេរីភាពរបស់តៃវ៉ាន់មិនមែនសម្រាប់លក់ដូរនោះទេ។
កាលពីថ្ងៃសៅរ៍កន្លងទៅនេះ លោក Qin Gang ឯកអគ្គរដ្ឋទូតចិនប្រចាំអាមេរិកបានស្វាគមន៍ការលើកឡើងរបស់លោក Elon Musk ដើម្បីបង្កើតៃវ៉ាន់ជាតំបន់រដ្ឋបាលពិសេស។
លោកថ្លែងនៅលើបណ្តាញសង្គម Twitter ដូច្នេះថា «ការបង្រួបបង្រួមដោយសន្តិភាព និងគំរូប្រទេសមួយ ប្រព័ន្ធពីរដែលត្រូវបានប្រើក្នុងការគ្រប់គ្រងហុងកុងគឺជាគោលការណ៍មូលដ្ឋានសម្រាប់ដោះស្រាយរបស់ចិន»។
លោកបានបន្ថែមថា៖ «ដោយសារអធិបតេយ្យភាព សន្តិសុខ និងផលប្រយោជន៍អភិវឌ្ឍន៍របស់ចិនត្រូវបានធានា បន្ទាប់ពីការបង្រួបបង្រួម តៃវ៉ាន់នឹងមានស្វ័យភាពខ្ពស់ក្នុងនាមជាតំបន់រដ្ឋបាលពិសេស និងកន្លែងដ៏ធំសម្រាប់ការអភិវឌ្ឍ»។
ប៉ុន្តែឯកអគ្គរដ្ឋទូតតៃវ៉ាន់ប្រចាំអាមេរិក លោកស្រី Hsiao Bi-khim ថ្លែងថា «តៃវ៉ាន់លក់ផលិតផលជាច្រើន ប៉ុន្តែសេរីភាព និងប្រជាធិបតេយ្យរបស់យើងមិនមែនសម្រាប់លក់នោះទេ»។
លោកស្រីបន្ថែមថា «រាល់សំណើរយូរអង្វែងសម្រាប់អនាគតរបស់យើងត្រូវតែកំណត់ដោយសន្តិវិធី គ្មានការបង្ខិតប.ង្ខំ និងការគោរពតាមបំណងរបស់ប្រជាជនតៃវ៉ាន់»។
សូមបញ្ជាក់ថា មហាយក្សចិនតែងចាត់ទុកកោះតៃវ៉ាន់ជាផ្នែកមួយរបស់ខ្លួន និងប្រកាសរួបរួមគ្នាវិញនៅថ្ងៃអនាគត ប៉ុន្តែមេដឹកនាំតៃវ៉ាន់បដិសេធ និងប្រកាសថានឹងធ្វើអ្វីៗគ្រប់យ៉ាងដើម្បីការពារសេរីភាព និងប្រជាជន៕ (យោងតាមប្រភព៖ BBC)
ចែករំលែកព័តមាននេះ