ជាធម្មតាយើងតែងតែបោះចោលសំបកបន្លែ ឬផ្លែឈើទៅក្នុងធុងសំរាមព្រោះគិតថា វាគ្មានប្រយោជន៍ ។ ប៉ុន្តែយោងតាមអ្នកជំនាញសុខភាព សំបកដែលយើងបោះចោលនោះគឺជាផ្នែកមួយនៃអាហារដ៏ល្អរបស់យើង។
យោងតាមលោកស្រីMary Jane Detroyer អ្នកជំនញអាហារូបត្ថម្ភ និងអ្នកឯកទេសខាងចំណីអាហារក្នុងទីក្រុងញូវយ៉កបានបង្ហាញថា មានហេតុផលជាច្រើនដែលអ្នកគួរទទួលទានសំបកបន្លែ និងផ្លែឈើ។ មូលហេតុចម្បងនោះ គឺអ្នកហាក់ដូចជាបង្អត់ខ្លួនឯងក្នុងការមិនទទួលទានសារធាតុចិញ្ចឹម និងវីតាមីននៅពេលអ្នកបោះសំបកវាចោល។
អាហារដូចជាដំឡូង ការ៉ុត និងត្រសក់មានអត្ថប្រយោជន៍ជាច្រើនដល់សុខភាព។ លោកស្រី Detroyer ប្រាប់គេហទំព័រ Daily Mail ថា ៖ «សំបកបន្លែ និងផ្លែឈើមានជាតិកាកសរសៃច្រើន ហើយជាតិកាកសរសៃនេះមិនរលាយទេ ជាពិសេសសំបកណាដែលមានពណ៌ខ្លាំង » ។
ឧទាហរណ៍មួយគឺសារធាតុប្រឆាំងអុកស៊ីតកម្ម និងវីតាមីនK ភាគច្រើនគឺនៅនឹងសំបកពណ៌បៃតងចាស់របស់ផ្លែត្រសក់ ។ ចំណែកឯសំបកដំឡូងមានសារធាតុចិញ្ចឹម ជាតិដែក កាល់ស្យូម ប៉ូតាស្យូម ម៉ាញ៉េស្យូម វីតាមីន B6 និងវីតាមីន C ច្រើនជាងសាច់ដំឡូងទៅទៀត ។
លោកស្រីដដែលបន្ថែមទៀតថា សំបករបស់បន្លែផ្លែឈើមានផ្ទុកសារធាតុប្រឆាំងអុកស៊ីតកម្មដែលជួយប្រយុទ្ធប្រឆាំងនឹងរ៉ាឌីកាល់សេរី ។ រ៉ាឌីកាល់សេរីគឺជាក្រុមអាតូមដែលអាចបង្កឱ្យមានការខូចខាតដល់រាងកាយនៅពេលដែលវាត្រូវបានផលិតច្រើនពេក ហើយអាចបង្កបញ្ហាដូចជាជំងឺបេះដូង ។
លើសពីនេះបន្លែដែលមានពណ៌ដិតខ្លាំងដូចជាការ៉ុត និងម្ទេសមានសំបកដែលសម្បូរទៅដោយជីវជាតិរុក្ខជាតិដែលមានលក្ខណៈសម្បត្តិប្រឆាំងអុកស៊ីតកម្ម ប្រឆាំងនឹងការរលាក និងជំនួយថ្លើម ៕
ចែករំលែកព័តមាននេះ