ករណីលួចរថយន្តមន្ត្រីអាវុធហត្ថខេត្តស្ទឹងត្រែង មហាជនសម្ដែងការអាណិតអាសូរជនជាប់ចោទ
ខេត្តស្ទឹងត្រែង ៖ លោក ផន ផល្លា ដែលគេស្គាល់ថា ជាប្រធានអង្គការមណ្ឌលកុមារកំព្រាមែកឈើ នៅថ្ងៃទី០៦ តុលា ២០២២នេះ…
ខេត្តស្ទឹងត្រែង ៖ លោក ផន ផល្លា ដែលគេស្គាល់ថា ជាប្រធានអង្គការមណ្ឌលកុមារកំព្រាមែកឈើ នៅថ្ងៃទី០៦ តុលា ២០២២នេះ…
ខេត្តស្ទឹងត្រែង ៖ លោក ផន ផល្លា ដែលគេស្គាល់ថា ជាប្រធានអង្គការមណ្ឌលកុមារកំព្រាមែកឈើ នៅថ្ងៃទី០៦ តុលា ២០២២នេះ បានប្រកាសរកមេធាវី ចិត្តធម៌ និងសប្បុរសម្នាក់ (ដែលមិនយកលុយ) ដើម្បីប្រឹក្សាផ្នែកច្បាប់ដល់ជនត្រូវចោទម្នាក់ ដែលជាប់ចោទពីបទលួចរថយន្តរបស់មន្ត្រីកងរាជអាវុធហត្ថខេត្តស្ទឹងត្រែង ។
ករណីលួចរថយន្តនេះ មន្ត្រីអាវុធហត្ថបានអោយដឹងថា ជនសង្ស័យម្នាក់ បានជិះម៉ូតូចាស់ម៉ាកវេវ គ្មានផ្លាកលេខ មកចតទុក រួចលួចដូរយករថយន្តមន្ត្រីអាវុធហត្ថម្នាក់ បើកចេញពីមុខស្នាក់ការអាវុធហត្ថក្រុងស្ទឹងត្រែង កាលពីរសៀលថ្ងៃទី៤ ខែតុលា ២០២២ នៅភូមិបាចុង សង្កាត់ព្រះបាទ ក្រុងស្ទឹងត្រែង ។
ជនសង្ស័យឈ្មោះ ប៊ុន ទុំ អាយុ៣២ឆ្នាំ ជាកម្មករក្រុមហ៊ុនចម្ការចេក នៅភូមិសំអាង ស្រុកថាឡាបរិវ៉ាត់ ជាប់ចោទពីបទលួចរថយន្តម៉ាក កាមរីឆ្លាម ស្លាកលេខភ្នំពេញ 2L-5038 របស់ឈ្មោះអុល សៀងវុទ្ធី នាយសេធិការកងរាជអាវុធហត្ថមូលដ្ឋានក្រុង នៅភូមិរាជានុកូល ខេត្តស្ទឹងត្រែង ។
ក្រោយបាត់រថយន្ត ដែលចតនៅមុខស្នាក់ការ ភ្លាមៗនោះកម្លាំងអាវុធហត្ថសហការជាមួយមន្ត្រីនគរបាលចរាចរណ៍ ក៏បើករថយន្តដេញតាមចាប់បាន ជនសង្ស័យ និងរថយន្ត នៅតាមផ្លូវជាតិលេខ៩ ភូមិស្រែឫស្សី ស្រុកថាឡាបរិវ៉ាត់ (ដូចមានក្នុងវីដេអូខាងក្រោមនេះ) ។ រួចបន្តរៀបចំសំណុំរឿងបញ្ជូនទៅតុលាការខេត្ត ។
តាមរយៈវីដេអូឃ្លីប ដែលមហាជនបានទស្សនារួច បានលើកឡើងថា សម្តីឪពុកនៅក្នុងវីឌីអូ បានប្រាប់ថា ទី១- ឲ្យឡានខ្ញុំជិះ បែរជាថា ខ្ញុំលួចឡាន និងទី២- ខ្ញុំអត់ចេះជក់ថ្នាំផង ថាខ្ញុំបែកថ្នាំ ? ។
មតិខ្លះទៀត បានអោយដឹងថា ឲ្យគ្នាជិះឡាន រួចចោទថា គ្នាលួចឡានទៅវិញ ? ខ្ញុំអង្គុយមើលវីឌីអូនេះ ៣ទៅ៤ដងហើយ គ្នាឆ្លើយថា មិនបានលួចទេ ម្ចាស់ឡានគាត់ឲ្យជិះ(ដើម្បីលួងកូនប្រុសកំពុងយំ) គ្នាមិនលក់ថ្នាំទេ ចោទថាគ្នាលក់ថ្នាំទៀត ? បើគ្នាជាចោរមែន គ្នាមិនយកកូនតូច មកលួចជាមួយទេ គួរយល់ផងទាន ? គ្នាបើកយឺតៗទៀត ។ ក្រោយសមត្ថកិច្ចចាប់ខ្លួន ដៃជាប់ខ្នោះ គ្នាអោនមកថើបកូន ខ្ញុំមើលហើយកំសត់ណាស់ ហេតុតែគ្នាក្រ រស់នៅក្នុងសង្គមនេះ វេទនាណាស់ ខ្ញុំមើលហើយអាណិតក្មេងណាស់ ឈរយំមើលឪពុកដែលត្រូវបានគេចាប់ បោកសក់ធ្វើបាបយ៉ាងនេះ តើអារម្មណ៍ក្មេងយ៉ាងម៉េចទៅ ? ឆ្ងល់ឲ្យគ្នានាំកូនតូចចូលទៅលួចឡាន នៅក្នុងស្ថាប័នប៉េអឹមបានយ៉ាងម៉េច ? សុំបញ្ចាក់ខ្ញុំមិនមែនកាន់ជើងចោរទេ តែនេះវាអយុត្តិធម៌ពេក ។
ជាមួយគ្នានេះ ប្រភពមួយក៏បានអោយដឹងដែរថា បើតាមសម្តីជនជាប់ចោទ គាត់ប្រាប់ថា បើកលេងទេ គឺបើកលួងក្មេងកុំអោយយំ ។ ប៉ុន្តែខុស ត្រង់គ្មានការអនុញ្ញាតពីម្ចាស់ឡាន ។
យោងតាមគណនីហ្វេសប៊ុករបស់លោក លោក ផន ផល្លា នៅថ្ងៃទី៦ ខែតុលា ឆ្នាំ២០២២ បានបង្ហោះសារថា ទីបំផុត លោកបានជួបក្មេងប្រុស ជាកូនរបស់ជនជាប់ចោទខាងលើនោះហើយ រូបគេគួរឲ្យស្រលាញ់ណាស់ ឆ្លាតនិងរួសរាយ ដែលមានឈ្មោះហៅក្រៅថា «ឆ្លាត» អាយុត្រឹម ២ឆ្នាំ ។
លោក ផន ផល្លា បន្តថា ក្រោយឪពុកម្ដាយបែកបាក់គ្នា ក្មេងតូចឈ្មោះ«ឆ្លាត»នេះ បានបែកពីម្ដាយតាំងតែពីអាយុត្រឹម ២ខែមកម្ល៉េះ ត្រូវបានឪពុកទទួលយកមកចិញ្ចឹមបីបាច់ជាមួយខ្លួន ពីពេលនោះមក ។ តាមការបញ្ជាក់ពីលោកយាយ របស់ឆ្លាត គឺឪពុករូបនេះស្រលាញ់កូនប្រុសខ្លាំងណាស់
ហើយតែងតែយកកូន ទៅជាមួយជានិច្ច ទោះបីរូបគេទៅធ្វើការក្នុងចម្ការចេក ក៏ដោយ ។
ប្រភពពីបងស្រីម្នាក់ជាបុគ្គលិកនៅក្នុងចម្ការចេក ក៏បាននិយាយប្រាប់លោក ផន ផល្លា ផងដែរថា ពេលធ្វើការជំរះស្មៅ ក្នុងចម្ការចេកម្តងៗ ឪពុករបស់ឆ្លាត តែងតែប្រើដៃម្ខាង បីកណ្តៀតកូនប្រុស ហើយដៃម្ខាងទៀត កាន់ចបជំរះស្មៅ ។ ប្រភពដដែលបានបញ្ជាក់ប្រាប់បន្ថែមថា ៖ តាំងតែពីកើតមក ពួកគេមិនដែលបានឃើញ ឪពុកណា ដែលតែងតែបីកូន អោបជាប់ទ្រូង យ៉ាងដូច្នោះទេ ។ នៅពេលដែលថៅកែ បើកលុយឲ្យឪពុករបស់ឆ្លាត ម្តងៗប្រហែល៣ម៉ឺន-៤ម៉ឺនរៀល គឺឪពុករូបនេះមិនហ៊ានទិញអីហូបខ្លួនឯងផ្តេសផ្តាស់ទេ គឺតែងតែទុកលុយ ដើម្បីទិញនំឲ្យកូន ។
បុគ្គលិកនៅក្នុងចម្ការចេក បានបញ្ចាក់ចំពោះមូលហេតុ ដែលធ្វើឲ្យឪពុករបស់ឆ្លាត លែងមានធ្វើការនៅក្នុងចម្ការចេកនោះ ក៏ព្រោះតែរូបគេ មិនអាចបំពេញការងារបានច្រើន ព្រោះគិតតែរវល់មើលកូនប្រុស ត្រង់ចំណុចនេះហើយ ដែលឪពុករបស់ឆ្លាត បានបីកូនចាកចេញពីចម្ការចេក ជាមួយនឹងម៉ូតូកញ្ចាស់មួយគ្រឿង ដោយមានដឹកឥវ៉ាន់ចងដាក់ពីលើយ៉ាងសំពីងសំពោង ផងដែរ ។
បន្ទាប់ពីចាកចេញពីចម្ការចេកនោះ មិនបានប៉ុន្មានផង ក៏មានផ្ទុះរឿងរ៉ាវ ក្លាយជាជនជាប់ចោទលួចរថយន្តរបស់ មន្ត្រីកងរាជអាវុធហត្ថនៅខេត្តស្ទឹងត្រែងនេះ តែម្តង ។
ក្រោយពីឪពុកត្រូវបានចាប់ខ្លួន ក្មេងប្រុសឈ្មោះ«ឆ្លាត» ត្រូវបានមន្ត្រីកងរាជអាវុធ ធ្វើការទំនាក់ទំនងមកឪពុកមាម្នាក់ឲ្យមកទទួល ដើម្បីនាំយកទៅនៅខេត្តក្រចេះ ជាមួយសាច់ញាតិ ។ ទោះជាយ៉ាងណា ក្មេងប្រុស នៅមានយាយនិងតា ព្រមទាំងអ៊ុំពូមីងដទៃទៀត ។
លោកយាយនិងលោកតា ដែលកំពុងមានជំងឺផងនោះ បានស្នើសុំអោយលោក ផន ផល្លា ទទួលកុមារ៉ាឆ្លាត ទៅនៅជាមួយផង ព្រោះថា ពួកគាត់គ្មានលទ្ធភាពចិញ្ចឹមចៅ និងអាចមើលថែទាំចៅ ឲ្យល្អបាននោះទេ ។ ហើយលោក ផន ផល្លា ក៏រីករាយជានិច្ចក្នុងការទទួលកុមារ៉ា មកនៅជាមួយ «អង្គការមណ្ឌលកុមារកំព្រាមែកឈើ» ប៉ុន្តែត្រូវរងចាំដំណើរការក្តីក្តាំងរបស់ឪពុកកុមារ៉ានេះ ចប់សព្វគ្រប់សិន ។
លោក ផន ផល្លា បញ្ជាក់ថា លោកបានផ្ញើទុកនៅជាមួយយាយតា ឲ្យមើលសិន ព្រមទាំងផ្តល់ចំណីអាហារឲ្យ បានគ្រប់គ្រាន់ដល់កុមារ៉ា រាល់ការចំណាយទាំងអស់ លោក ផន ផល្លា ជាអ្នករាប់រងទាំងស្រុង ។
ទោះជាយ៉ាងណា ករណីលួចរថយន្តមន្ត្រីអាវុធហត្ថខេត្តស្ទឹងត្រែងខាងលើនេះ រងចាំការកាត់ក្តីរបស់តុលាការ នៅពេលសំណុំរឿង និងជនជាប់សង្ស័យ ត្រូវបានបញ្ជូនទៅដល់សាលាដំបូងខេត្តស្ទឹងត្រែង ៕
ចែករំលែកព័តមាននេះ