រាជធានីភ្នំពេញ ៖ ដោយសារតែមានទឹក ចិត្តស្រឡាញ់ និងចង់ចូលរួមអភិរក្សបទចម្រៀងមរតកដើម ក្រុមតារាចម្រៀងនិងក្រុមការងាររបស់ផេកហ្វេសបុ៊កឈ្មោះ «ជួបគ្នាម្តងទៀត» បានសហការផលិតបទចម្រៀង
រាជធានីភ្នំពេញ ៖ ដោយសារតែមានទឹក ចិត្តស្រឡាញ់ និងចង់ចូលរួមអភិរក្សបទចម្រៀងមរតកដើម ក្រុមតារាចម្រៀងនិងក្រុមការងាររបស់ផេកហ្វេសបុ៊កឈ្មោះ «ជួបគ្នាម្តងទៀត» បានសហការផលិតបទចម្រៀងពីដើមបែបក្លាស៊ិកដើម្បីផ្តល់ជូនអ្នកគាំទ្រស្តាប់កម្សាន្ត ។
តារាចម្រៀងបែបមនោសញ្ចេតនា មានទឹកដមសំឡេងស្រដៀងអ្នកស្រីប៉ែន រ៉ន គឺ កញ្ញាស៊ូ ដាណេបានផលិតបទចម្រៀងជំនាន់មុនបញ្ចូលសាច់ភ្លេងថ្មី ដោយចាត់ទុកថាដើម្បីលើកកម្ពស់មរតកបទចម្រៀងពីដើម ។ អ្នកចម្រៀងរូបនេះ បានព្យាយាមផលិតបទចម្រៀងយកបទពីដើមមកសម្រិតសម្រាំងច្រៀងឡើងវិញបញ្ចូលក្នុងប្រព័ន្ធយូធូប បង្ហោះឲ្យមហាជនបានស្តាប់កម្សាន្ត ដោយនាងមិនគិតចង់ចំណេញប្រាក់ទេ ។
ដោយការស្រឡាញ់ និងចង់លើកស្ទួយបទចម្រៀងពីដើម កញ្ញាស៊ូ ដាណេ តែងតែចំណាយពេលផលិតបទពីដើម ហើយ ថ្មីៗនេះនាងបានថតបទពីដើមឡើងវិញក្រោមចំណងជើងថា «ស្រឡាញ់បងណាស់» ជាសំនៀងដើមរបស់អ្នកស្រីហួយ មាស ហើយបានបង្ហោះលើ Pageឈ្មោះ «ជួបគ្នាម្តងទៀត»។ នាងជាសមាជិកក្រុមនេះ និងពេញចិត្តជួយគ្នាក្នុងការយកបទពីដើមមកច្រៀងម្តងទៀតបែបកក្លាស៊ិក តែមិនយកធ្វើអាជីវកម្មទេ ចង់ឲ្យតែប្រិយមិត្តបានស្គាល់ និងស្តាប់កម្សាន្តប៉ុណ្ណោះ ។
តារាចម្រៀងស៊ូ ដាណេ ដែលតែងតែចាប់ឱកាសសម្តែងនៅក្រៅប្រទេសញឹកញាប់នោះបញ្ជាក់កាលពីពេល ថ្មីៗកន្លងមកថា នាងមានបំណងចង់លើកស្ទួយបណ្តាបទចម្រៀងមរតកដើមរបស់រៀមច្បងជំនាន់មុន ក្នុងន័យចង់បង្ហាញថា បទពីដើមពិតជាបង្កប់នូវខ្លឹមសារជ្រាលជ្រៅ ស្តាប់មិនចេះរីងស្ងួតទេ ។ នាងបម្រើសិល្បៈ ដោយយកបទចម្រៀង ពីដើមៗមកច្រៀងនោះ តែងតែនឹកគុណ ហើយខំផលិត និងច្រៀងឡើងវិញបែបលក្ខណៈក្លាស៊ិកចែកដល់ប្រិយមិត្តអ្នកគ្រាំទ្រស្តាប់កម្សាន្ត ។
នៅមានបទចម្រៀងត្រៀមបង្ហាញជាច្រើនទៀតដែលរៀបចំទុកបង្ហាញលើផេក«ជួបគ្នាម្តងទៀត» ចេញផ្សាយជាបន្តបន្ទាប់នាពេលខាងមុខនេះ ។
កញ្ញាស៊ូ ដាណេ មុនក្លាយជាអ្នកចម្រៀងមានឈ្មោះល្បីគួរសមទាំងក្នុង និងក្រៅប្រទេស ជាសិល្បការិនីនៅមន្ទីរវប្បធម៌ និងវិចិត្រសិល្បៈរាជធានីភ្នំពេញ ។ នាងចេះច្រៀងទាំងបទប្រពៃណី សម្តែងរបាំ ល្ខោនបាសាក់។ ដោយមានសំឡេងល្អ នាងក៏បញ្ចូលខ្លួនជាអ្នកចម្រៀង រហូតមានមុខមាត់ក្នុងវិស័យចម្រៀង ដោយស្ថានីយទូរទស្សន៍មួយចំនួនតែងតែផ្តល់ឱកាសឲ្យនាងសម្តែងជាញឹកញាប់ ។
កម្មវិធីជាច្រើនដែលស៊ូ ដាណេ បានឡើងសម្តែងដូចជាកម្មវិធី «តន្ត្រីស្រុកស្រែ» «ប្រជុំតារាតន្ត្រី» «មន្តស្នេហ៍សំនៀង» និងនៅស្ថានីយទូរទស្សន៍នានាដូចជាទូរទស្សន៍អាស៊ីអាគ្នេយ៍ជាដើម ។ ក្រៅពីនេះនាងមានឱកាសទៅសម្តែងនៅក្រៅប្រទេស ដូចជាធ្លាប់ទៅអាមេរិក អូស្ត្រាលី និងប្រទេសមួយចំនួនទៀត ។ នាពេល ឆាប់ៗខាងមុខដាណេត្រៀមទៅសម្តែងនៅប្រទេសបារាំង ។
ស៊ូ ដាណេ រំពឹងថា មហាជននឹងជួយ លើកទឹកចិត្តដល់ផេករបស់នាងដើម្បីមានទឹកចិត្តរៀបចំបទចម្រៀងថ្មីទៀត ៕
ចែករំលែកព័តមាននេះ