ប្រជាជនកម្ពុជានឹងអាចបើករថយន្តលើផ្លូវល្បឿនលឿនភ្នំពេញ-ព្រះសីហនុដែលវិនិយោគក្រោមទឹកប្រាក់ប្រមាណជា២ពាន់លានដុល្លារមានប្រមាណ១៩០គីឡូម៉ែត្រ ចាប់ពីថ្ងៃទីមួយ ខែតុលាខាងមុខ។តាមការកំណត់របស់ក្រសួងសាធារណការ និងដឹកជញ្ជូន ផ្លូវល្បឿនលឿនភ្នំពេញ-ព្រះសីហនុនេះនឹងមានល្បឿនអប្បបរិមាត្រឹម៦០គីឡូម៉ែត្រនៅក្នុងមួយម៉ោងហើយអតិបរិមា គឺរហូតដល់ទៅ១២០គីឡូម៉ែត្រក្នុងមួយម៉ោង។ ដូច្នេះល្បឿននេះ គឺវាលឿនណាស់ ដែលអ្នកបើកបរទាំងអស់ត្រូវលើកកម្ពស់ស្មារតី និងការប្រុងប្រយ័ត្នគ្រប់ពេលវេលា ដើម្បីគ្រប់គ្រងសុវត្ថិភាពដល់អ្នកធ្វើដំណើរ។
ពិសេសអ្នកបើកបរទាំងអស់មិនត្រូវធ្វើអោយផ្លូវល្បឿនលឿនទីមួយរបស់កម្ពុជានេះក្លាយជាផ្លូវមរណ:ដែលបង្កគ្រោះថ្នាក់នាំអោយមានមនុស្សស្លា.ប់ និងរបួសនោះឡើយ។កន្លងមកតាមដងផ្លូវជាតិលេខ៤ពីភ្នំពេញទៅខេត្តព្រះសីហនុ មានគ្រោះថ្នាក់ជាច្រើនបានកើតមានដងផ្លូវដោយបណ្តាលអោយមនុស្សស្លា.ប់ របួស និងការខូចខាតយាន្តយន្ត។ដោយសារបទពិសោធន៍ គេក៏មានការព្រួយបារម្ភអំពីគ្រោះថ្នាក់តាមដងនៅលើផ្លូវល្បឿនលឿនដូចនឹងគ្រោះថ្នាក់បានកើតមានតាមដងផ្លូវជាតិលេខបួនកន្លងមក។
នៅចំពោះមុខការព្រួយបារម្ភបែបនេះ លោក ស៊ុន ចាន់ថុល ទេសរដ្ឋមន្ត្រីនិងជារដ្ឋមន្ត្រីក្រសួងសាធារណៈការ និងដឹកជញ្ជូនបានថ្លែងប្រាប់សាធារណជនថា ថ្មីៗនេះថាយានយន្តដែលប្រើប្រាស់ផ្លូវនេះដាច់ខាតត្រូវគោរពស្តងដាអប្បបរិមា និងអតិបរមានៃល្បឿនដែលបានកំណត់ ដាច់ខាត ហើយយានយន្តដែលប្រើល្បឿនទាបជាងនេះនឹងមិនត្រូវអនុញ្ញាតឡើយ ហើយនៅពេលប្រើប្រាស់ គឺអ្នកបើកបរត្រូវគោរពគន្លងឲ្យច្បាស់លាស់ ហើយត្រូវប្រកាន់ស្តាំជានិច្ច។
បើតាមលោក ស៊ុន ចាន់ថុល ទោចក្រយានយន្ត(ម៉ូតូ)ធម្មតានឹងមិនត្រូវអនុញ្ញាតជាដាច់ខាត លើកលែងតែទោចក្រយានយន្តដែលមានទំហំស៊ីម៉ាំងចាប់ពី៥០០cc ឬ២៧kw ឡើងទើបអនុញ្ញាតប៉ុន្តែអ្នកបើកបរដែលមានបំណងប្រើប្រាស់ផ្លូវល្បឿនលឿននេះ គឺត្រូវបានតម្រូវឱ្យស្នើសុំស្លាកសញ្ញាសម្រាប់បិទបញ្ជាក់ (Sticker) ពីក្រសួងសាធារណការ និងដឹកជញ្ជូនជាមុន។
លោកបានបន្តថា ឡានដឹកទំនិញដែលផ្ទុកកុងតឺន័រនឹងត្រូវបានកំណត់ត្រឹម ៨០ គីឡូម៉ែត្រ ក្នុងមួយម៉ោង ចំណែករថយន្តធុនធ្ងន់ដែលមិនមានផ្ទុកទំនិញ នឹងត្រូវបានអនុញ្ញាតឲ្យបើកបរ ក្នុងល្បឿន ១០០ គីឡូម៉ែត្រក្នុងមួយម៉ោង ហើយក៏ត្រូវប្រកាន់ស្តាំគ្រប់ពេលលុះត្រាតែជែង។ក្រៅពីនេះ លោក ស៊ុន ចាន់ថុល ក៏បានជំរុញឲ្យអ្នកបើកបរទាំងអស់គួរតែស្វែងយល់ពីផ្លូវនេះ និងត្រួតពិនិត្យយានយន្តឲ្យគ្រប់គ្រាន់ មុននឹងត្រូវប្រើប្រាស់ផ្លូវនេះ ដើម្បីសុវត្ថិភាព ទាំងអស់គ្នា។
នេះគឺជាសមិទ្ធិផល និងជាហេដ្ឋារចនាសម្ព័ន្ធដ៏ថ្មីស្រឡាងមួយសម្រាប់កម្ពុជា។ដូច្នេះយើង ខ្ញុំសង្ឃឹមថា យើងទាំងអស់គ្នានឹងមិនប្រើប្រាស់ផ្លូវនេះដោយគ្មានការទទួលខុសត្រូវនោះឡើយ ហើយក៏សង្ឃឹមថានៅពេលដែលផ្លូវនេះត្រូវបានអនុញ្ញាតឲ្យប្រើប្រាស់ហើយនឹងមិនមានគ្រោះថ្នាក់ចរាចរណ៍ដ៏រន្ធត់កើតមានឡើងដូចប៉ុន្មានករណីដែលកើតឡើងនៅពេលដែលផ្លូវនេះកំពុងសាងសង់កាលពីប៉ុន្មានខែមុននេះឡើយ។
ម្យ៉ាងវិញទៀតដោយសារតែផ្លូវនេះ គឺជាផ្លូវដែលវិនិយោគដោយឯកជន ដូច្នេះអ្នកបើកបរ នៅលើផ្លូវនេះ គឺនឹងត្រូវចំណាយប្រាក់ពោល គឺប្រមាណជា១២ដុល្លារសម្រាប់ចម្ងាយពីភ្នំពេញទៅកាន់ខេត្តព្រះសីហនុដោយត្រូវឆ្លងកាត់ខេត្តកណ្តាល កំពង់ស្ពឺ និងកោះកុងផងដែរ។សូមចូលរួមគោរព និងប្រើប្រាស់ផ្លូវនេះប្រកបដោយសុវត្ថិភាព ប្រសិទ្ធភាព និងជាផលប្រយោជន៍សម្រាប់យើងទាំងអស់គ្នាតាមរូបភាពឈ្នះឈ្នះពីព្រោះផ្លូវល្បឿនលឿនភ្នំពេញ- ព្រះសីហនុ គឺជាសមិទ្ធផលនៃហេដ្ឋារចនាសម្ព័ន្ធដំបូងដែលមាននៅកម្ពុជា។
ដូច្នេះវាក៏ជាគំរូមួយ ដែលអាចនឹងដកស្រង់បទពិសោធន៍សម្រាប់កម្ពុជា យើងនៅក្នុងផែនការពង្រឹង និងអភិវឌ្ឈន៍ហេដ្ឋរចនាសម្ព័ន្ធផ្សេងៗទៀតដែលនៅពេលនេះ រដ្ឋាភិបាលកំពុងតែសិក្សាដោយរួមទាំងផ្លូវក្រោមដីការកសាងផ្លូវដែកភ្ជាប់ទៅវៀតណាម និងឡាវហើយជាពិសេស គឺផ្លូវល្បឿនលឿនមួយខ្សែទៀតដែលភ្ជាប់ពីភ្នំពេញទៅកាន់បាវិត ព្រំដែនវៀតណាម។
គម្រោងនេះ គ្រោងនឹងចុះហត្ថលេខានៅខែវិច្ឆិកា ស្របពេលដែលផ្លូវល្បឿនលឿនភ្នំពេញ- ព្រះសីហនុត្រូវសម្ភោធជាផ្លូវការដែរនោះ។ ក្រុមហ៊ុនដែលនឹងទទួលសិទ្ធិសាងសង់ផ្លូវនេះដែរ គឺជាក្រុមហ៊ុនចិនដែលកសាងផ្លូវល្បឿនលឿនភ្នំពេញ- ព្រះសីហនុ នេះស្រាប់ គឺក្រុមហ៊ុនសាជីវកម្មផ្លូវហើយនឹងស្ពានចិន (China Road and Bridge Cooperate)។ គម្រោងទីពីរនេះ គឺអាចនឹងចាប់ផ្តើមនៅពាក់កណ្តាលឆ្នាំ២០២៣ ដោយមានប្រវែង ១៣៥ គីឡូម៉ែត្រមានទទឹង ២៥,៥ ម៉ែត្រ មានពីរគន្លងតាមទិសនីមួយៗ ដើម្បីជំរុញការតភ្ជាប់ជាមួយប្រទេសវៀតណាម និងជំរុញទំនាក់ទំនងសេដ្ឋកិច្ចរវាងខេត្តជាប់ព្រំដែនទាំងពីរ ដោយផ្តោតជាពិសេសលើកំណើនការនាំចេញ។
សរុបមកវិញយើងខ្ញុំសង្ឃឹមថា ប្រជាពលរដ្ឋដែលនឹងមានបំណងប្រើប្រាស់ផ្លូវល្បឿនលឿនភ្នំពេញ- ព្រះសីហនុនេះនឹងបើកបរតាមល្បឿនកំណត់ដ៏ត្រឹមត្រូវគោរពច្បាប់ចរាចរណ៍ ហើយនៅពេលដែលវ៉ាឬជែង ត្រូវមានភ្លើងសញ្ញាគោរពគន្លងនៅក្នុងការបើកបរ ហើយត្រូវប្រកាន់ស្តាំ ជាពិសស គឺមិនត្រូវយកផ្លូវនោះគឺជាកន្លែងសាកល្បងឡាន ឬប្រែក្លាយទីនោះ គឺជាទីលានប្រណាំង ដែលបើកបរគ្មានសណ្តាប់ធ្នាប់គ្មានច្បាប់ ពីព្រោះវាគ្រោះថ្នាក់ខ្លាំងណាស់ ដោយសារទីនោះជាផ្លូវដែលអនុញ្ញាតឲ្យបើកបរលឿនបំផុតនៅកម្ពុជា។
ដូច្នេះយើងរួមគ្នាប្រើប្រាស់ផ្លូវល្បឿនលឿនជាប្រយោជន៍ហើយចៀសវាងអោយបានការប្រែក្លាយផ្លួវល្បឿនលឿននេះអោយទៅជាផ្លូវមរណ:៕ អត្ថបទ ៖ ហេង ចេស្តារ
ចែករំលែកព័តមាននេះ